NAVENDA NÛÇEYAN – Fermandarê Giştî yê QSD’ê Mazlûm Ebdî got, “Her peymana ji bo Qamîişlo û Kobanê divê Efrîn û Serêkaniyê jî bigire nav xwe. Heta ku şervanek me yê dawî bimîne em ê van herêman biparêzin. Kes nikare li vir bi ser bikeve.”
Fermandarê Giştî yê Hêzên Sûriyeya Demokratîk (QSD) Mazlûm Ebdî tevlî Bernameya Taybet ya Ronahî TV bû, êrîşên çeteyên hikûmeta demkî ya Sûriyeyê û agirbesta 15 rojan hatî ragihandin nirxand.
Mazlûm Ebdî diyar kir ku agirbesta dawîn bi sponseriya Amerîka û hêzên navneteweyî hat ragihandin û destnîşan kir ku dan û standin bi hikumeta demkî re dewam dikin, lê hurguliylên din dê demên pêş de werin nîqaşkirin.
Mazlûm Ebdî got, muhleta heyî wê gavên cidî yên ber bi entegrasyonê ve temam bikin û da zanîn ku QSD’ê amade ye di demeke kurt de peymana 18’ê Çileyê pêk bîne. Her wiha destnîşan kir ji bo postên alîkariya wezîrê parastinê û parêzgeriyê Hesekê nav hatin pêşniyarkirin, lê heya niha li ser lîsteya navan negihiştine lihevkirinê.
Ebdî îşaret pê kir ku “li gorî lihevkirinê divê artêşa Sûriyeyê derbasî herêmên Kurdan nebe.”
Ebdî bal kişand ser civîna li Hewlêrê hat lidarxistin jî û diyar kir ku ku civîn bi armanca pêkanîna agirbestê hat lidarxistin û got, “tevahî aliyan xwestin ku çareserî siyasî be, ne leşkerî be û encamên civînê jî erênî bûn.”
Fermandarê Giştî yê QSD’ê da zanîn ku dan û standinên bi hikumeta demkî re bi sponseriya navneteweyî û beşdariya saziyên siyasî û leşkerî yên DYE’yê, serokkomarê Fransasyê Emmanuel Macron tên kirin, lê ev lihevkirin ne yên dawîn ne.
Ebdî destnîşan kir ku hewldanên navneteweyî yên ji bo aramkirinê hene, lê serketina wan girêdayî asta pêkanîna wan ji aliyê Şamê ve ye. Ebdî got: “Eger şerên neqebûlkirî neyên ferzkirin, dê hewldan bi ser kevin.”
Mazlûm Ebdî salvegera serketina rizgarkirina Kobanê ji çeteyên DAÎŞ’ê li gelê Kurd pîroz kir û diyar kir ku berxwedana Kobanê xaleke werçerxê di dîroka Rojava de bû û hişt ku gelê Kurd bibin. Ebdî got: “Êrişên îro li ser Kobanê têne kirin wê têk biçin.”
Her wiha anî ziman ku ji Şamê hat xwestin ku derbasî Koban nebe û wê jî ev daxwaz pejirand. Ebdî hêvî kir ku hikumet pabendî vê daxwazê be
Mazlûm Ebdî bal kişand ser dosyaya koçberên Efrîn, Serêkaniyê û Girê Spî û got, divê koçber vegerin herêmê û got, çareseriyên ji bo Qamişlo û Kobanê têne nîqaşkirin, herêmên din jî eleqedar dike.
Ebdî bal kişand ser binpêkirinên ku li dijî Kurdên li Reqa, Tebqa û herêmên din hatin kirin û got, divê hesab bê pirsîn. Her wiha ji kiryarên nîjadperestî û provokasyonan di navbera Kurd û Ereban de hişyarî da.
Ebdî bi bîr xist ku di nava QSD’ê de şehîdên Ereb bi taybetî ji Reqa û Dêrazorê hene û got, divê siyasetên derxistina fitneyan di navbera pêkhateyan de werin teşhîkirin.
Fermandarê Giştî yê QSD’ê Mazlûm Ebdî bal kişand ser vê yekê ku vekişîna wan a ji Reqa, Tebqa û Dêrazorê ji bo rêgirtina li pêşiya rageşî û herkîna xwînê pêk hat û got, herêmên Kurdan xeta sor e. Ebdî da zanîn QSD’ê ji hemû îhtîmalan re amade ye û bi vebijêrka siyasî ve girêdayî ku wekî çareseriya yekane dibîne. Her wiha anî ziman: “Em ê berxwedanê û parastina herêmên xwe bidomînin ta bigihêjin çareseriyeke siyasî ya giştî.”
