BERN – Çalakiya nobedê ya li Berna paytexta Swîsreyê li dijî êrîşên li ser Rojava dest pê kir, kete roja xwe ya 6 an.
Di dema çalakiya nobedê ya berdewam de, ciwan û Kurdên ji her çar parçeyên Kurdistanê li ber Parlamentoya Bernê kom bûn û diyar kirin ku ew ê berxwedana xwe heta dawiyê bidomînin.
Di daxuyaniyekê de, endamên ciwan ên Tevgera Ciwanên Şoreşger (TCŞ) banga “yekîtî û berxwedana dîrokî” kirin û wiha gotin:
“Em, ciwanên Swîsreyî yên TCŞ bang li gelê xwe, jinên ciwan û ciwanên xwe dikin: Werin em meydanan vala nehêlin. Koban bi gelê me dorpêçkirî ye; werin em piştgiriyê bidin vejîna wan. Werin em meydanan vala nehêlin. Em, ciwanên Swîsreyî, li ber Parlamentoya Bernê bi berdewamî nobedê digirin. Em bang li hemû hevalên xwe, bi taybetî jî li hemû jinan dikin: Piştgiriya xwe kêm nekin; werin em li kêleka ciwan û gelê Rojava bin.”
Piştî daxuyaniyên endamên TCŞ’ê, Fadil Kerkük ê ji Rojhilat ku beşdarî çalakiya nobetê bû jî banga yekîtiyê kir û ev tişt got:
“Îro, em ji bo dîroka Kurd rojên bi rastî dîrokî dibînin. Xewna mezin a ku me bi salan di dilê xwe de xwedî dikir, xewna ku me bi nifşan hesreta wê dikir – yekîtiya bêdawî ya Kurdan – êdî ji xewnekê derketiye û dest pê kiriye ku veguhere rastiyê.”
‘Em bi hev re bi ser ketin, em ê bi hev re bi ser bikevin.’
Binêre, ruhê mezin ê ku îro li Rojava geş dibe me hemûyan îlham dike. Niha, xwişk û birayên me li seranserê Kurdistanê bi mîlyonan meşan meydanan tijî dikin û bi dengekî bilind mafên xwe diqîrin. Tu hêz nikare li hember vê şiyarbûnê bisekine. Bila her kes bizanibe ku gelê Kurd êdî ne gelekî çokdayî û teslîm e. Em gelekî ne ku li hember hêzên herî mezin ên cîhanê û li hember her cûre zilmê radiwestin. Yên ku duh me paşguh kirin, niha neçar in ku hebûna me qebûl bikin û bi me re li ser maseya danûstandinan rûnin. Ev serkeftinek e ji bo helwesta we ya bi rûmet.
Ez spasiya xwe ji bo ciwan û pîr, mêr û jinan dikim, yên ku li eniyên pêş, li kolanan û di her aliyê jiyanê de şer dikin û vê berxwedanê geş dikin. Ez bi hestên xwe yên herî dilsoz silav li gelê xwe yê birûmet li her goşeyekî Kurdistanê dikim.
Çalakiya nobeda berxwedanê ya li ber Parlamentoya Bernê heta ku êrîş bi dawî bibin wê bidome.
