NAVENDA NÛÇEYAN – Salvegera 47’emîn a damezrandina PKK’ê ku 27’ê Mijdara 1978’an ava bû, li gelek qadan bi coşeke mezin tê pîrozkirin. Li Herêmên Parastinê yên Medyayê bi beşdariya gelek gerîlayan pîrozbahiyek hate lidarxistin. Yek ji fermandarên HPG’ê Yaser Dersim li pîrozbahiyê axivî.
Yaser Dersim destpêkê şehîdên şoreşê bi bîr anî û anî ziman ku 27’ê Mijdarê ji bo wan manewiyateke mezin e û got, “Divê em hemû 27’ê Mijdarê weke mîladekê bibînin. Di dîrokê de gelek serhildanên Kurdan çêbûn, dewletên dagirker jî xwestin Kurdan parçe bikin, tine bikin. Dema ku Rêber Apo ev têkoşîn da destpêkirin got, ew ê ne tenê ji bo parçeyekî lê ji bo hemû parçeyan têbikoşe û yekîtiya Kurdan ava bike. Li ser vê bingehê tevgeriya. Ji serhlidanên berê tecrûbe bi dest xist û di 27’ê Mijdarê de PKK bi vî rengî ava kir.
Dewletên dagirker Kurd parçe kir, lê belê Rêbertî kir yek. Rêber Apo 26 sal in di nava çar dîwaran de ye, li gel vê yekê jî ji bo aştiyê, ji bo azadiya gelê Kurd, ji bo mirovahiyê têdikoşe. Rêber Apo dema ku dest bi meşa şoreşê kir bi navê Kurdîtiyê, bi navê çanda Kurd tiştek tine bû. Du kes nikarîbû li hev bicive. Lê belê ew dara hişk a ku Rêber Apo li Kurdistanê çand şîn bû. Kir ku partiya me bigihêje bi milyonan mirovî. Divê em Rêber Apo baş fêhm bikin, ji nêz ve bişopînin. Ji bo civaka komuanl, ji bo civaka azad dema ku em manîfestoya wî fêhm bikin, em ê xwe hîn baştir nas bikin, em ê gaveke hîn baştir biavêjin. Divê em dilsozê Rêbertî û şehîdan bin, vê pêvajoyê hîn baştir fêhm bikin û destê Rêberê xwe hîn xurt bikin.
Em careke din ji damezrînerên PKK’ê hevalên Fûat, Riza, Sara, heval Sofî, Sabrî, Koçero û Masîro bi bîr tînin. Ji ber ku tevgera me tevgereke şehîdan e. Dibe ku me piraniya van hevalan nas dikir, em hemû ji bajarên cuda hatibûn, di nava me de yên ji neteweyên cuda jî hene, lê belê armancek heye ku em gihand hev. Ya ku dijmin herî zêde ditirsîne jî ev e; jiyana me, felsefeya me, îdeolojiya me, hebûna me ye. Eger em vê pêvajoyê bi rengekî rast karibin binirxînin, em ê gavên mezin biavêjin. 27’ê Mijdarê careke din li Rêber Apo û li gelê me pîroz be.”
Gerîlayan bi gerandina govendê û lîstikên xweser ên gerîla Cejna Berxwedana Neteweyî ya Kurd pîroz kirin.
