REQA – Li Stadyuma Şaredariya Reqqayê amadekariyên ji bo pîrozbahiyên salvegera rizgarkirina bajêr ji rêxistina terorîst DAIŞê bi lez û bez didomin.
Ji saetên serê sibê ve xebat ji bo organîzekirina platforma sereke li cihê çalakiyê û xemilandina stadyûmê bi al û pankartên ku berxwedan û fedakariya gelê Reqqayê sembolîze dikin, berdewam dike.
Komîteya Ciwanan û Werzîşê, Şaredariya Gel û saziyên li Kantona Reqqayê bi hev re beşdarî organîzekirina pîrozbahiyan dibin. Kesên erkdar bê westan dixebitin da ku amadekariyên vê roja taybet, ku îradeya gel û pabendbûna wan bi nirxên azadî û aştiyê temsîl dike, temam bikin.
Bername dê axaftinên fermî yên ku şervanên fedaî bi bîr tînin, û her weha performansên hunerî û welatparêzî yên ku pêvajoya ji nû ve avakirin û aramiya bajêr ronî dikin, di nav xwe de bigire.
