BORDEAUX- Li bajarê Bordeauxê yê Fransayê, bi pêşengiya ciwanên endamên TCŞê (Tevgera Ciwanên Şoreşger), ji bo azadiya fizîkî ya Rêber APO mîtîngek hate lidarxistin.
Mîtîng bi deqeyek bêdengiyê ji bo bîranîna Şehîdên Kurdistanê dest pê kir. Paşê, Adar Serhed li ser navê TCŞê axivî û got ku ew dikarin Bangewaziya Demokratîk û Civakî ya 27ê Sibatê ya Rêber Apo bi rêxistinkirina li her derê û bi têkoşînê mezin bikin. Her wiha got, “Divê tecrîda li ser Rêber APO bi dawî bibe, azadiya wî ya fîzîkî were peyda kirin û li Kurdistanê aştiyeke mayînde were avakirin.”
Serhed bal kişand ser girîngiya perspektîfa çareserî û aştiyê ya Rêber APO û wiha dewam kir; “Berî her tiştî, divê were zanîn ku pêvajoya nû ya ku dest pê kiriye ji bo her kesî girîng e. Ji bo me tiştê herî girîng azadiya fîzîkî ya Rêber APO ye. Divê em hemû piştgiriyê bidin vê pêvajoya ku bi pêşengiya Rêber APO dest pê kiriye. Divê em qet guh nedin daxuyaniyên ku di medyayê de têne kirin an jî bawer nekin. Ya ku ji bo me girîng e, daxuyaniyên ku Rêber APO û Partiya me dê bidin in.”
Adar Serhed dawiya axaftina xwe de bang li raya giştî ya Ewropî û saziyên navneteweyî yên peywendîdar kir ku pêvajoyê bişopînin.
Mîtîng bi dirûşmeyên “Bê Serok Jîyan Nabe” bi dawî bû.
