BERN – Gelê Kurdistanê û komên enternasyonalîst beşdarî panela ku li bajarê Bernê yê Swîsreyê bi pêşengiya PYD’ê û endamên TCŞ’ê hate lidarxistin, bûn.
Beriya destpêkirina panelê li ser navê hemû şehîdên Kurdistanê bi taybet şehîdên Rojava û bendava Tişrînê deqeyek rêz hate girtin. Piştre di panelê de bal hat kişandin ser êrîşên li ser Rojava û Bendava Tişrînê.
Berdevka Jinê ya PYD’ê ya Swîsreyê Gulîstan Sadon ku diwanê panelê bûn, bi nirxandina pêvajoya Rojava dest bi axaftina xwe kir û got, “Êrîşên dagirkerên Kurdistanê ji her qadê didomin. Em niha bi dijminên ku dixwazin hêzên me yên leşkerî yên Rojava têk bibin re rû bi rû ne, lê bila bizanibin ku nikarin me biqedînin. Di sala 2011’an de pêkhateyên DAIŞ’ê ber bi Rojava ve birin, lê di encama têkoşîna gelê me yê Rojava û hêza leşkerî de me Kobanê rizgar kir. Niha jî em heman têkoşînê didomînin.”
Parlamenterê berê yê HDP’ê yê Şirnexê Ferhat Encu ku piştî daxuyaniya Sadon mafê axaftinê girtibû, salvegera rizgarkirina Kobanê pîroz kir û gelê Kurd ên di Bendava Tişrînê de li berxwe didin û hemû berxwedêrên ji bo hebûn û tinebûnê têdikoşin silav kir.
Ferhat Encû got, “Bi hilweşîna rejima Esed re li Sûriyeyê geşedanên nû rû dan. Şoreşa Rojava ya 12 sal berê dest pê kir, Kurd û sendîkayên cuda hatin cem hev û bi afirandina şêwazê jiyana xwe li wir avabûneke nû ava kirin. Û ev pêkhate li hemû herêmên Rojava belav bû. Û bi derketina zîhniyeta tarî ya DAEŞê, kurd û gelê kurd li dijî vê zihniyeta tarî têkoşîneke mezin dan. Û vê têkoşînê nehişt ku zihniyeta tarî li Rojhilata Navîn, ciwanên Kurd û gelê Kurd belav bibe. Li ser vê bingehê em hemû hêza xwe ya leşkerî ya di Bendava Tişrînê de şer kirine û hemû şehîdên xwe bi taybet Bavê Teyar bi rêzdarî bi bîr tînin û têkoşîna wan silav dikin.”
Em ê têkoşîna xwe ji bo her parçeyekî Rojava bidomînin
Enternasyonalîst Robîn ku piştî axaftina Encû li ser şoreşa Rojava bi zimanê Elmanî axaftinek kir, li ser navê komîteya Rojava wiha got: “Em hêzên xwe û gelê xwe yên li berxwedêrên Rojava bi rêzdarî silav dikin. Em spasiya têkoşîna wan dikin. Çawa ku me di şerê li Kobanê de alîkarî kir, em ê têkoşîna xwe ya li her parçeyê Rojava jî bidomînin.”
Em ê nîşanî cîhanê bidin ku ev sûcê şer e
Endamê TCŞ’ê Xerzan Derîk jî got ”Em weke ciwanên Kurd di pêvajoyeke wiha de divê çi bikin? Divê em weke ciwanên Kurd li dora ketina Rojava bibin lokomotîfa ku em ji vê prensîbê beşdarî vê şoreşê bibin û tenê bi parvekirina li ser medyaya dîjîtal û cihên din xwe têr nekin. Divê em bi ciwanên Kurd û gelên enternasyonalîst re Rojava biparêzin.”
Xerzan Derîk di dawîya axaftina xwe de “Em sûcên şer ên dewleta Tirk a faşîst nîşanî hemû sazî û dezgehên Ewropa, saziyên weke CPT û NY’ê bidin. Em ê li hemberî sûcên li dijî hunermend û rojnamegerên me tên kirin bêdeng nemînin. Em ê nîşanî cîhanê bidin ku ev sûcê şer e. Em tenê bi rûniştina li vir nikarin tiştekî bi dest bixin,” got.
Piştî daxuyaniya Xerzan Dêrîk panel bi pirs û bersivan berdewam kir û bi dirûşmeyan bi dawî bû.
