NAVENDA NUÇEYAN- Yek ji gaziyên şer ê Federasyona Gaziyên Bakur û Rojhilatê Sûriyeyê Rêzan Masîro têkildarî 25’ê Mijdarê Roja Têkoşîna li Dijî Şîdeta li ser Jinê ji ajansa me re axivî.
Rêzan Masîro got, “Bi wesîleya salvegera 25’ê Mijdarê ez tevahî hevalên jin ên şehîd bi bîr tînim û li hember wan bejna xwe ditewînim. Bi têkoşîna xwişkên Mîrabel li hember dîktatorê Domînêkê yê bi navê Rafael Trujillo dest pê kir. Xwişkên Mîrabel ji bo jiyaneke bêzext, azad û wekhev têkoşîneke mezin meşandin. Dîktator Rafael Trujillo yê di dîroka 25 Mijdarê 1960’î her sê xwişk qetil kirin, wer difikirî ku wê êdî kes nikaribe li hember bisekine. Lê belê piştî qetilkirina her sê xwişkên şoreşger serhildana çavkaniya xwe ji xwişkên Mîrabel digirt di demeke kurt de bû sedema ew dîktator û desthilatdariya wî hilweşe.”
Gaziyê şer Rêzan Masîro diyar kir ku di roja me ya îro de li Rojhilata Navîn û bi taybet li Kurdistanê di pêşengiya Tevgera Azadiyê ya Jinan de li hember her cure desthilatdariya bi serweriya mêr û dagirkeriyê têkoşîneke muezem heye û wiha dewam kir, “Ev têkoşîn bi saya ked û hewldanên bi salan ên Rêber APO derket ser dika dîrokê. Gelek hevalên me yên jin ên weke Bêrîtan, Zîlan, Sara ev têkoşîn di asta herî bilind de temsîl kirin. Îro eger bi dirûşma Jin, Jiyan Azadî ji Îranê heya Hindistanê û li tevahiya cîhanê jin ji bo jiyaneke azad û wekhev serî radikin, bi têkoşîn û berxwedana hevalên me yên jin e.”
Rêzan Masîro bal kişand ser têkoşîna Rêber APO û got, “Rêber Apo bi paradîgmaya ekolojîk demokratîk û azadîxwaziya jinê her tişta ji bo jinan û gelên bindest hewce dike, bi modernîteya demokratîk a li hember pergala sermayedar a bi serweriya mêr derxist holê. Dîsa li Bakur û Rojhilatê Sûriyeyê di pêşengiya jinan de şoreşeke li ser esasê fikir û felsefeya Rêbertiya me ava bû. Bi hezaran jin û ciwan ji her aliyê cîhanê herikîn nav vê têkoşînê. Ev ji bo me cihê şanazî û serbilindiyê ye.”
Rêzan Masîro destnîşan kir ku weke hevalên gazî heya dawiyê ji bîrdoziya Rêbertiya xwe bawer in û ev bang li ciwanan kir, “Em pir şad û bextewar in ku di nav vê tevgera pîroz de cih digirin. Li ser vî esasî weke hevalekî gazî ez bang li tevahî ciwanên Kurd, Ereb, Asûrî, Tirkmen dikim. Cihê herî azad ê mirov dikare xwe lê îfade bike, li hember her cure zilm û zorê li ber xwe bide refên Tevgera Azadiyê ne. Lewma divê hemû ciwanên xwedî şeref û rûmet tevlî nav refên Tevgera Azadiyê bibin.”
Gaziyê şer Rêzan Masîro di dawiyê de jî got, “Her wiha ji bo şikandina tecrîda li ser Rêbertiya me li ku dibe bila bibe pêwîst e em berxwedan û têkoşînê hê zêdetir pêş bixin. Bi wesîleya vê rojê ez careke din hemû şehîdên me bi rêz û hurmet bi bîr tînim, dilsoziya xwe ya bi Rêbertiya xwe û gelên xwe re dubare dikim.”
