CENEVRE – Çalakgerên TCŞ û TekoJIN’ê vê hefteyê piştgirî dan çalakiya rûniştinê ya li Swîsreyê ya ji bo azadiya fîzîkî ya Rêber APO hate lidarxistin.
Ciwanan bi bîr xist ku teza Rêber APO ya “Heta jin azad nebe civak azad nabe” li Kobanê ket jiyanê, ciwanan salvegera berxwedana Kobanê silav kirin.
Kurdistanî ji 25’ê Çileya 2021’an ve li bajarê Cenevre yê Swîsreyê li Qada Netewan a ku Ofîsa Neteweyên Yekbûyî (NY) lê ye, çalakiya rûniştinê pêk tînin.
Çalakiya vê hefteyê ya ku berxwedana Kobanê hat silavkirin, di şexsê cangoriyên fedaî yên çalakiya TUSAŞ’ê ya Enqereyê de şehîd Asya Elî û Rojger Hêlîn bi deqeyek rêzgirtinê destpê kir. Hevserokê Navenda Civaka Demokratîk a Kurd a Cenevreyê Îbrahîm Yuksel bi bîr xist ku ew ber bi sala 4’an ve diçin. Yuksel got, “Weke gelê Kurd heta azadiya Rêber APO em ê bi çalakiyên xwe li qadan bin.”
Yuksel bi bîr xist ku di encama pêngava “Ji Rêber APO re Azadî, Ji Pirsgirêka Kurd re Çareserî” hefteya borî bi Rêber APO re hevdîtinek pêk hat û der barê pêvajoyê de daxuyaniyeke kurt da.
Piştî Yukselê li ser navê TCŞ û TekoJIN’ê bi Kurdî û Erebî daxuyanî hatin dayîn.
Li ser navê TCŞ û TekoJIN’ê Hakan Yilmaz ku axaftina yekemîn kir; Bi bîr xist ku civaka Kurd her hefte ji bo azadiya Rêber APO û hemû girtiyên siyasî li ber Nûnertiya Neteweyên Yekbûyî nobedê digire.
Yilmaz di berdewama axaftina xwe de diyar kir ku îro weke Tevgera Ciwanên Şoreşger careke din serî li Neteweyên Yekbûyî û hemû aliyên peywendîdar ên di komploya navneteweyî de cih digirin û wiha got;
“Ji bo îxanetên li gelê Kurd tên kirin divê rexnedayîn bê dayîn û êdî li pêşiya azadiya Rêber APO û Kurdistanê nebin asteng. Divê bi dijminên gelê Kurd re hevkarî neyê kirin. Divê hemû cîhan bizane ku gelê Kurd dilsozê Rêberê xwe û têkoşerên azadiya Kurdistanê ye. Weke tevgera ciwanên şoreşger em soz didin gelê xwe ku em ê li ku bin bi ruhê Rêber APO agirê azadiyê geş bikin. Heta ku em azadiyaRêberê xwe û welatê xwe mutleq nekin em ê ji qadên xwe venekişin.”
Piştî Yilmaz daxuyaniya çapemeniyê ya bi zimanê Erebî ji aliyê Delîl Rojava ve li ser navê tevgerên ciwanan hate xwendin. Delîl Rojava ku bi pîrozkirina 1’ê Mijdarê Roja Kobanê ya Cîhanê dest bi axaftina xwe kir û got ku teza Rêber APO ya “Heta jin azad nebe civak azad nabe” li Kobanê jiyanî bû.
Delîl Rojava hovîtiya çeteyên DAIŞ’ê li Sûriye û Iraqê ku di 15’ê Îlona 2014’an de dest pê kir bi bîr xist, şehîdên Kobanê bi taybet Fermandar Arîn Mîrkan bi bîr anî û ev tişt anî ziman: “Li hemberî vê hovîtiyê jinên ciwan, û gelê Kurd ji bo parastina gel berxwedaneke mezin nîşan dan. Ev berxwedana ku di dîroka têkoşînê ya gelên cîhanê de weke mînak cih girt, bi pêkanîna paradîgmaya azadiya jinê ya Rêber APO re serkeftin bi dest xist. Bi pêkanîna paradîgmaya azadîxwaz, ekolojîk û demokratîk a jinan, ev çete ji xaka Bakur-Rojhilatê Sûriyê werin paqijkirin.
Di dema ku îro li her kolan, mal û girên bajarê Kobanê çîrokên van berxwedêran tên vegotin, çîroka berxwedana şervana Fermandar Arîn Mîrkan a li girê Miştenûrê jî yek ji wan e.”
Piştî daxuyaniyê Kurdistaniyan çalakiya xwe ya rûniştinê heta saet 17:00’an berdewam kirin.
