BIELEFELD – Li bajarê Bielefeld ê Elmanyayê, di navbera 15-20’ê Îlonê de çalakiya Meşa Dirêj a ciwanên Kurdistanî û enternasyonalîst destpê kir.
“Meşa Dirêj” di sala xwe ya 41’emîn de ye. Armanca meşa ku di 24’ê Nîsana 1984’an de ji Hannover û Hanau’yê li du baskan hatibû plankirin, ew bû ku bigihêje paytexta wê demê Bonnê û qêrîna Kurdistanê ji cîhanê re ragihîne. Şaxa Hannoverê wê 418 km û şaxa Hanauyê jî 280 km bimeşiya. Sembola Berxwedana Cizîrê Binevş Agal, Şervanê Rojnameya Serxwebûnê û damezrînerê Özgür Politika’yê Enver Polat, Rauf Akbay û Vahdettîn Kitay jî di nav meşê de bûn. Berxwedana 24 salên dawî ya “Meşa Dirêj” a ku 41 sal in didome, ji aliyê Kurdistanî û şoreşgerên enternasyonalîst ve, ji bo azadiya fîzîkî ya Rêber APO daxwaz bikin e.
15’ê Îlonê roja Yekşemê bi sedan ciwanên Kurdistanî û enternasyonalîst bi dirûşmeya “Ji Rêber APO re Azadî, Ji Pirsgirêka Kurd re Çareserî” li Navenda Civaka Demokratîk a Kurd a bajarê Bielefeld ê Elmanyayê li hev civiyan, konferansa bi navê “Rastiya Rêbertiyê û rola ciwanan” lidarxistin. Di nava axaftvanên konferansê Rojnameger û Nivîskarê Kurd Sefkan Kobanê û siyasetmedar Muharrem Aral jî hebûn. Di axaftinan de bal kişandin ser rol û mîsyona ciwanan a di misogerkirina azadiya fîzîkî ya Rêber APO de.
Konferans di şexsê şehîdên ku di 24’ê Tebaxa 2024’an de di êrîşên dagirkeriyê yên dewleta Tirk a faşîst a li herêma Xakurkê de şehîd bibûn de ji bo tevahî şehîdên şoreşa Kurdistanê bi deqîqeyek rêzgirtinê destpê kir. Li dû deqîqeya rêzgirtinê axaftina vekirinê hate kirin û perspektîfa Rêber APO ya li ser ciwanan hate xwendin. Piştî perspektîfa Rêber APO salona konferansê bi dirûşmeyên ciwanan bi coş tijî bû.
Piştî temaşekirina sînevîzyona ku li ser Rêber APO, siyasetmedar Muharrem Aral mafê axaftinê girt. Muharrem Aral bi şermezarkirina qetilkirina endamên Çapemeniya Azad Gulîstan Tara û Hêro Bahadîn ên ji aliyê dewleta Tirk a faşîst ve hatin qetilkirin, dest bi axaftina xwe kir.
Muharrem Aral: “Tevî ku berê meş hebûn jî, piştî esareta Rêber APO hemû meş ji bo azadiya fîzîkî ya Rêber APO tên lidarxistin. Muharrem Aral got, “Bila hemû cîhan bizane ku heta Rêber APO azadiya xwe ya fizîkî bi dest nexe, têkoşîna me wê bidome” û got, “Sîstema kapîtalîst dixwaze kesayeteke koledar ku nikare fikra xwe îfade bike biafirîne.” Pêwîst e rastiya dijmin pir baş were fêmkirin. Dijmin taybetmendî û nasnameya te çawa ji holê radike? Divê em van baş fêm bikin”
Muharrem Aral got, “Eger em di nava xwe de kesayeta ku sîstem dixwaze biafirîne, hilweşînin, wê demê em dikarin baştir rola ciwantî pêk bînin û azadiya fîzîkî ya Rêbertî misoger bikin.”
Muharrem Aral vê yekê bîrxist ku Kurdistan ji aliyê xweza û mirovahiyê ve dewlemend e û got, “Dijminê ku ji ber dewlemendiyên wê êrîşî Kurdistanê dike, ji bo ku gel ji ax û çanda xwe dûr bixe, gelek polîtîkayên qirêj dimeşîne. Li dijî van hemûyan çareserî Paradîgmaya Demokratîk, Ekolojîk û Azadiya Jinê ye.”
Roja duşemê danê sibê di roja yekem a meşê de wê çalakger saet di 08:00 de li ber stasyona trenê ya navendî ya Bîelefeldê kom bibin. Çalakgerên bi armanca tecrîda li ser Rêber APO bi dawî bibe wê li vir daxuyaniyê bidin û piştre ber bi navenda bajêr ve bimeşin. Çalakgerên ku bi qasî 18 km meşiyan, wê danê êvarê li Qada Kesselbrînkê meşa xwe bi dawî bikin, biçin Bîelefeldê DKTM û di panela bi navê “Jîna Emînî” de bên cem hev.
Li gorî vê yekê, xalên destpêkê û demên meşê wiha ne;
*17’ê Îlonê roja sêşemê em ê saet di 08.00’an de li stasyona Hamburgê (Bahnhof) bên cem hev. Çalakger piştî ku 10 km ber bi navenda bajêr ve bimeşin wê roja duyemîn li ber stasyona trenê ya Hammê bi dawî bikin. Danê êvarê jî wê biçin Navenda Civaka Kurd a Demokratîk a Dortmûndê û ji bo şeva moralê bicivin.
*Çalakger 18’ê Îlonê roja Çarşemê saet 08.00’an de li ber stasyona trenê ya navendî ya Dortmûndê (Hauptbahnhof) werin cem hev û wê tevahiya rojê li kolanên herî qelebalix ên navenda bajêr 18 km bimeşin û belavokên ku bi mijara “Azadî ji Rêber APO re” belav bikin. Ew ê danê êvarê li Dortmund DKTM di bîranînekê de bên cem hev.
*19’ê Îlonê roja Pêncşemê saet 08:00’an wê li qada Hirschlandplatz a li ber stasyona trenê ya navendî (Hauptbahnhof) a bajarê Essen ê Elmanyayê li hev bicivin û ji navenda bajêr heta Navenda Civaka Kurd a Demokratîk a Essenê 17 km bimeşin. Êvarê dîsa li DKTM’ê ji bo panelek li ser rola ciwanan û çawaniya jiyanê werin cem hev.
*20’ê Îlonê roja Înê saet di 09:00’an de wê çalakger li kolana herî qelebalix a navenda bajarê Dûîsbûrgê Marxloh-Pollman li hev bicivin û tevahiya rojê li tevahiya bajêr 19 km bimeşin. Meşa azadiyê wê danê êvarê li ber stasyona trenê ya navendî ya Dûîsbûrgê (Hauptbahnhof) bi dawî bibe û ber bi Navenda Civaka Kurd a Demokratîk a Duîsbûrgê ve bimeşin. Êvara roja dawî ya meşê jî bi beşdariya hunermendên Kurd Hozan Şemdîn û Rêber Serhed dê li DKTM ya Duisburgê beşdarî bernameya çandê bibin.
*21’ê Îlonê roja Şemiyê saet di 07:00 de wê ji bo Festîvala Çanda Kurd a Ewropayê ya ku li qada Frankfurt Rebstockpark tê lidarxistin, bi rê bikevin.
Hûrguliyên nûçeyê wê bên.
