NAVENDA NÛÇEYAN- Koordînasyona KJK’ê têkildarî kuştina Narîn Guranê daxuyaniyek weşand û diyar kir “Ev kuştin bi serê xwe kuştineke bêrehm a rejîma qirker, daîreya kontrgerîla û sîstema şerê taybet e.”
Daxuyaniya KJK’ê bi vî rengî ye:
“Li hemberî kuştina Narîn Guran a li taxa Tavşantepe ya navçeya Rezan a Amedê xemgîniya me nayê vegotin, hêrs û îsyana me mezin e. Yek ji qurbanên dawî yên vê cîhana dojehî ya ku li Kurdan, jinan û gelan tê ferzkirin Narîn e. Mekanîzmaya ku Narîn qetil kir polîtîkaya bi rêk û pêk û taybet a navenda şerê taybet û desthilatdariya faşîst a AKP-MHP’ê ye ku dijminatiyê li jinan dike û qirkirinê li Kurdan ferz dike.
Ev kuştin bi serê xwe kuştineke bêrehm a rejîma qirker, daîreya kontrgerîla û sîstema şerê taybet e. Li hemberî jiyan û hişmendiya azadiyê ya li Kurdistanê ku bi pêşengiya jinê tê meşandin, rastiya rizandinê ya bi polîtîkayên destavêtin, narkotîk û fûhûşê li ser civakê tê ferzkirin, di şexsê Narîn de bi rengekî bêrehm, bi kuştinê xwe nîşan da. Kuştineke gelekî giran e ku ne bi şermezarkirinê ne jî bi nerazîbûneke rûtîn bê derbaskirin. Narîn wezîfe û berpirsyariyek ji me re hişt. Li hemberî êrişên rizandina civakê ku weke polîtîka û rejîma dijminê jinê û qirkirinê tê meşandin, divê em bi îsyan û têkoşîneke encamgir rabin.
Narîn çima hate qetilkirin, ji aliyê kê ve hate qetilkirin, Narîn çi dît ku hate qetilkirin? Divê ev yek weke polîtîkayeke dewletê bê dîtin û di heman demê de her kesên li bersiva van pirsan digerin û hesab dipirsin divê têkoşînê mezin bikin. Gel û jinên Kurd bi bersiva van pirsan zanin. Çavên Narîn şahidê vê rizandin, encamên polîtîkaya astengkirina sekna azad a gelê Kurd û têkoşîna azad a jinê ye; têkoşîna azadiyê ya jinê ya cîhanê û gelê Kurd ê bi rûmet divê tişta ku Narîn dît nîşan bide û hesab ji vê şebeke û polîtîkaya kuştinê bixwazin.
Ji bo kujerên Narîn bêne eşkerekirin, beriya her tiştî divê rastiya li Tavşanlikoyê bê eşkerekirin. Bûyerên ku qewimîn pêwendiya xwe bi avakirina baregeh û navendên rêxistiniyên paramîlîter ên mîna DAIŞ, Hîzbûlkontra û cerdevaniyê heye ku ji aliyê dewleta mêtinger ve hatine afirandin. Eşkere ye ku navendên bi vî rengî di hînderlanda hevpar a dewlet/Huda-Par/DAIŞ/PDK’ê de qereqoleke girîng e. Ev navend yek ji deverên kontra, cebilxane û gora komî ye û yek ji wan deveran e ku gelek jin lê hatin qetilkirin. Ev gund ew gund e ku qirkirina Kurdan û qirkirina jinan temsîl dike: Lewma ji bo kujerên Narîn bê eşkerekirin pêwîstî bi wê yekê heye ku hesab ji rejîma qirker a sed salî û rêxistina wê ya şerê taybet bê xwestin.
Ya ku Narînê dît û hate serê wê, gorên komî û cebilxaneya Hizbûlkontra ye, destavêtina li kursên Quranê ye, tundiya mêrên mîlîtarîst e, amûra şerê qirêjî yê rejîma faşîst a AKP-MHP’ê ye. Kuştina Narîn, daxwaza windakirina wê û astengkirina dîtina wê bi 19 rojan hemû ji bo windakirina van delîlên sûc bû. Di oxira dijminatiya li Kurdan de civaka Tirkiyeyê li rizandin û dejenerebûnê tê mehkûmkirin. Ev sîstema ku hilweşîn û rizandinê li Tirkiyeyê, qirkirinê li jin û Kurdan ferz dike, divê bê redkirin.
Ya ku bi serê vî gundî ve hatiye şebekeya kuştinê ya 17 hezar kuştinên kiryar nediyar e ku dewleta Tirk a mêtinger di salên 1990’î de ji bo tasfiyekirina têkoşîna jinê û gelê Kurd bi rêxistina Hîzbî kontra pêk anî. Rejîma qirker a AKP-MHP’ê şebekeya Hîzbî kontra veguherand Hudaparê, li şaredariyên ku desteser kiribû qadeke rêxistiniya civakî û îdeolojîk pêşkêşî Hudaparê kir û qirkirin hîn berfireh kir. Li gel êrîşên tasfiyeyê ku bi operasyonên li dijî destketî û tevgera jinê têne ferzkirin, li Kurdistanê jî rêxistinên kontra yên çetekar û li Tirkiyeyê tarîqat û cemaetan bi cih kir. Dijminatiya li gelê Kurd, dijminatiya li jinê bi birêxistinkirina neteweperestî û zayendîperestinê pêk anî. Li gel vê yekê li ser bingeha plana têkbirinê ya li dijî gelê Kurd, bi rêxistinên DAIŞ û OSO ji bo tasfiyekirina şoreşa Rojava, qirkirina li Şengalê û dagirkirina Başûrê Kurdistanê êrîş dan destpêkirin. Piştî ku ev êrîş hatin têkibirin, bi piştgiriya ji NATO’yê wergirtî Efrîn, Serêkaniyê û Girê Spî dagir kir. Bi hevkariya hêzên xayin û noker, sîxur û kontra operasyonên dagirkerî û îlhaqê bi rengê siyasî, leşkerî û îdeolojîk li her qadê dewam dike. Serdana Erdogan a li Hewlêrê, di pîrozbahiyên Malazgîrtê de fermîkirina tifaqa AKP-MHP-Hudapar li merasîma dewletê, hevdîtina Mesûd Barzanî û Serokê Giştî yê Hudaparê Zekeriya Yapicioglû ya di dema nêz de hate kirin û di encama vê hevdîtinê de jî yek ji lîderên girîng ên DAIŞ’ê yê 6 salan girtî bû ji aliyê PDK’ê ve hate efûkirin û berdan; ev hemû nîşan didin ku li hemberî gelê Kurd û jinan wê êrişên qirkirinê yên berfireh bêne kirin.
Eşkere ye ku komkujiya jin û zarokan a li Tirkiye û Kurdistanê ne tenê karê kes an jî feraseta feodal e, ew polîtîkaya şerê taybet a bi rêk û pêk e. Zêdebûna komkujî, destavêtin, destdirêjî, fûhûş û narkotîkê parçeyek ji komkujiya jin û zarokan e.
Pêwîstî bi wê yekê heye ku bi sekneke hevgirtî û têkoşînê deng û çalakî bê bilindkirin. Li ser vê bingehê ji bo ronîkirina kuştina Narîn û parastina zarokan ji vê rejîma qirker em bang li jinan û gelê xwe dikin ku têkoşînê hîn mezin bikin.”
