HESEKÊ- Tevgera Mezopotamya ya Çand û Hunera Demokratîk vê êvarê li Parka Xabûr ya Hesekê bi diruşma ˊJi Rêber Apo re azadî, ji pirsgirêka Kurd re çareseriya demokratîk’ konserek li dar xist.
Di konserê de endamê rêveber ê Tevgera Mezopotamya ya Çand û Hunera Demokratîk Sîpan Xelat got Rêber APO di tecrîdeke giran de ye û têkoşîna xwe dewam dike û wiha pê de çû: “Îro bi deng û mûzîka me, em piştgiriyê didin kampanyaya navneteweyî ya bi daxwaza azadiya fîzîkî ya Rêber APO.”
Hevserokê rêxistina Partiya Yekitiya Demokratîk (PYD) a Hesekê Ferhan Dawûd axivî û bang li rêxistinên navneteweyî kir ku bi erkên xwe li hember rewşa Rêber APO rabin.
Piştre koma Şehîd Zîlan a ji Dirbêsiyê stranên li ser Rêber APO û şehîdên azadiyê gotin.
