NAVENDA NUÇEYAN – Komîteya Rêveber a HBDH’ê daxuyaniyek weşand û bal kişand ser êrîşên dagirkeriyê yên li ser Fîlîstîn û Rojava.
Di daxuyaniyê de hate gotin, “Rêxistinên Fîlîstînî 7’ê Cotmeha 2023’an ji bejahî, hewayî û deryayî ve êrîşên surprîz birin ser gelek nuqteyên Îsraîlê. Bi van êrîşên dawî re êrîşên dewleta Îsraîlê yên li ser xaka Fîlîstînî gihîşt asteke gelekî mezin. Îsraîl li gel teknolojî û dîwarên xwe yên bilind ên parastinê, li pêşberî êrîşan şoq bû û hewl dide vê şoqê bi êrîşeke hîn mezintir û bombardûmana topyekûn a li ser sivîl-leşkeran derbas bike. Li ser vê bingehê weke hewldanek ji bo komkujiyê bombe li nexweşxaneyan hatin barandin, deriyên sînor hatin girtin, herêm hate dorpêçkirin.
Hewl tê dayin ku têkiliya Gazzeyê ya bi cîhanê re bi temamî bê qutkirin. Hejmara mirovên hatine kuştin û yên hatine birîndarkirin gelekî zêde ye. Îsraîl bi gotina ‘ez ê bi temamî biqedînim’ mebesta xwe bi eşkere tîne ziman. Her tişt, her cûre komkujî, her kiryarên li hemberî mirovahiyê li nava vê gotinê dikare bê bicihkirin.
Têkoşîna ku salên dûr û dirêj e dewam dike, têkoşîneke mafdar û bi rûmet a gelê Fîlîstînê ye. Şerekî ji bo armanca Fîlîstîneke azad a ji çem heta deryayê ye. Aliyekî wê xaka Fîlîstînê ya bi şerê man û nemanê yê gelê mezlûm e, aliyê din jî dewleta Îsraîlê ye ku navê dagirkerî û mirinê ye. Êşa giran a gelê Fîlîstînê ku bi salan e dikişîne tenê bi jiyaneke azad û wekhev dikare bi dawî bibe. Gelê Yahûdî ku di dîrokê de komkujî, qirkirin û cihêkarî lê hate kirin, bi esasî pirsgirêkeke xwe bi gelê Fîlîstînê re nîne. Yên ku ev nakokî afirand dewleta Îsraîlê û hêzên emperyalîst ên li pişt wê ye. Ji ber vê yekê li gel hewldanên berevajîkirinê yên dewletên rojavayî û dewleta Îsraîlê, kes nikare têkoşîna gelê Fîlîstînê neheq nîşan bide. Heta dawiyê têkoşîneke mafdar e. Wezîfeyeke şoreşgerî ya vê demê ye ku jiyaneke hevpar li tevahiya Rojhilata Navîn bê birêxistinkirin.
Lê belê di heman demê de desthilatdariya faşîst a AKP-MHP’ê ku bûye belayê serê gelên Rojhilata Navîn feraseta xwe ya durû dewam dike. Erdogan û rejîma wî li televîzyonan dibêje ‘Em bi Fîlîstînê re ne’ û hewl dide demagojiyê bike. Hewl dide bingeha xwe ya gel biparêze. Lê belê têkiliyên xwe yên aborî û siyasî yên bi Îsraîlê re roj bi roj mezin dibe. Hîn bêhtir pê ve tê girêdan. Rejîma Erdogan dixwaze çavkaniyên enerjiyê yên Îsraîlê di ser Tirkiyeyê re derbas bike û bi milyaran dolar pere qezenç bike. Ji bo rejîma Erdogan can û xwîna Fîlîstîniyan ne tiştek e. Ji bo wan jiyana gelên bindest tenê gotineke.
Cografya Rojhilata Navîn a kevnar ji bo gelan û baweriyan bûye hêlîn. Wê qada jiyana azad û wekhev a gelên Tirk, Kurd, Ereb, Suryan, Ermenî û gelên din be. Yekane rêya vê jî hilweşandina dagirkerî û desthilatdarên talanker e. Bûyerên ku niha li Fîlîstînê diqewimin gotin bi gotin, hevok bi hevok li Rojava jî diqewimin. Di navbera rejîma Erdogan a dagirker û hikumeta Netanyahû de ti cudahî nîne. Niha li Rojava bombe li çavkaniyên enerjiyê têne barandin, êrîş li ser nexweşxaneyan têne kirin, sivîl têne kuştin, li Fîlîstînê jî heman tişt dibe.”
Di dewama daxuyaniyê de hate ragihandin ku çarenûsa gelên bindest dibe yek û hate gotin, “Yên ku têkoşîna gelên bindest bi gotin û pratîka xwe mezind ikin şoreşger in. Hêza ku Fîlîstînê, Rojava û bindestan hemûyan rizgar bike, hesabê komkujiyan bipirse, di nava têkoşîna mafdar a gel de mezin dibe.
Em ê hesabê komkujiyên li Fîlîstîn û Rojava bipirsin. Em ê bi şoreşa yekbûyî hesab ji desthialtdariya AKP-MHP’ê ya mêtinger bipirsin. Hêzên dagirker wê têk biçin. Fîlîstîn, Rojava û gelên bindest wê bi ser bikevin.”
