Endama Konseya Rêveber a KCK’ê Sozdar Avesta got ew ê tola Zekî Şengalî ku bi suikasta dewleta Tirk şehîd bûyî, bi teqezî bistînin û dom kir, ‘’Em ê alaya heval Zekî ku bi keda 35 salan anî van rojan li erdê nehêlin’’.
NAVENDA NÛÇEYAN – Endama Konseya Rêveber a KCK’ê Sozdar Avesta derbarê Endamê Konseya Rêveber ê KCK’ê Zekî Şengalî (Îsmaîl Ozden) ku bi suikasta dewleta Tirk şehîd bûyî û li ser êrîşa li ser Şengalê ji ANF’ê re axivî.
Sozdar Avesta got şehîdbûna Zekî Şengalî ew gelekî xembar kirine û got, ‘’Ez bi hurmet û minet hevrê Zekî Şengalî bi bîr tinim. Em di şexsê Zekî Şengalî û Atakan Mahîr de, soza xwe ya serfiraziyê ya ku me dayî Rêber Apo em dubare dikin.’’
Avesta bi bîr xist ku Şengalî 35 salan di têkoşîna Azadiya Kurdistanê û Êzîdxanê de bûye xwedî ked û kêferateke mezin û domand, ‘’ Li hemû qadan ji bo avakirina civaka azad, welatê azad û neteweya azad têkoşiya. AKP/MHP ya faşîst û dîktator Erdogan bi vê êrîşa nemerdî careke dî rûyê xwe yê komkuj û faşîzan şanî gelê me daye.’’
‘’PÊŞENGÊ CIVAKA ÊZÎDÎ BÛ’
Avesta got dewleta Tirk ji roja ku ava bûye ji bo ku vîna gelê Kurd bişkîne polîtîkayên qirker daye ber xwe û domand, ‘Êrîşa li ser Mam heval Zekî Şengalî berdewama van polîtîkayên qirker e. 2007’an dema êrîşa ser Êzîdxanê jî Tûgaya Tolhildêr a Tirk (TÎT) anîbû ser xwe. Ev jî nîşan dide ku êrîşa li ser heval Zekî êrîşa li ser gelê Êzîdî û li ser wan civakan e ku têkoşîna azadiyê didin.’’
Avesta got Zekî Şengalî bi salan e weke pêşeng û lîderê civaka Êzîdî dihate dîtin û domand, ‘’Heval Zekî li hemû qadan ji bo domdariya jiyanake demokratîk, bi îdeolojî û felsefeya Rêber Apo, alaya berxwedanê ya ku ji Bêrîvan, Abdullah, Îrfanan wergirtî, anî heta îro.’’
‘CIWANÊN KURDISTANÊ DIVÊ TÊKOŞÎNA ŞENGALÎ JI BO XWE MÎNAK BIBÎNIN’
Avesta got divê civaka Êzîdî vê êrîşê weke bûyereke şexsî nebînin û got: ‘’Divê gelê me yê Êzîdî vê baş bizanibe, ev pêvajoyeke nû ye. Armanca sereke ya vê êrîşê xweseriya demokratîk e û civaka Êzîdî ye ku dixwaze li ser van xakên pîroz bijî. Divê hemû Êzîdiyên li diaspora, Ermenîstan, Rûsyayê zanibin, ev êrîşa li ser Şengalê, berdewama komkujiya li ser Efrînê ye. Ji bo vê jî, li bara vê şehadeta mezin divê gelê me yek be. Bi taybeyî jî ciwanên Êzîdî, ciwanên Kurdistanê, divê têkoşîna heval Zekî ku ji 18 saliya xwe ve didomîne, ji bo xwe mînak bibînin.’’
Avesta got Zekî Şengalî divê bi rengekî bêhempa were veşartin û wiha pê de çû: ‘’Gelê me yê li Şêxanê, li Êzîdxanê dijî, li ser şopa heval Zekî divê li têkoşîna wî xwedî derkeve. Heval Zekî çawa ku ev 35 sal in, bi ked û fedakariyeke mezin alaya berxwedan û azadiyê heta bi îro anî be, em jî soz didin ku vê alayê nehêlin. Em ê xeyala heval Zekî Kurdistana azad û Êzîdxana azad ava bikin. Bi vê çarçoweyê, ez wek hevrêyeke heval Zekî careke dî em sond dixwin ku di rêya Wî de em bimeşinû tola Wî hilînin.’’
‘TOLA HEVAL ZEKÎ WÊ WERE HILANÎN’
Avesta got dewleta Tirk a dagirker û Serokkomarê Tirk Tayyîp Erdogan bi van êrîşan wê negihe miraza xwe û domand: ‘’Dewleta Tirk û Erdogan ê faşîst divê baş zanibin, ev dawiya wan e. Ev êrîş qelsî, neçariya Erdogan nîşan dide ku dixwaze rojevê biguherîne. Erdogan bi van êrîşan wê tiştekî bi dest ve neyine.
Careke dî di şexsê heval Zekî û Atakan Mahîr de ez hemû şehîdên azadiyê bi hurmet bi bîr tînim. Heval Zekî, em sond dixwin, wê tola te were hilanîn. Bila çavê te vekirî nemîne, Êzîdxana azad ku te xeyala wê dikir, em ê diyarî gelê xwe bikin.’’
