ZURÎCH- Bi deh hezaran kes ji bo pîrozbahiya Newrozê ya li bajarê Zurîh ê Swîsreyê hat lidarxistin hatin cem hev. Di çalakiyê de bal hate kişandina ser têkoşîna gelê Kurd û daxwaza azadiya Rêber APO hate kirin.
Çalakiya Newrozê bi peyamên azadî û hevgirtinê dewam kir.
Di daxuyaniyan de li ser navê KCDK-E Engîn Sever ev daxuyanî da.
SEVER: DÊ KURD MASÊYAKU RÊBER APO HEYE WINDA NEKIN
Hevserokê KCDK-E Engîn Sever di axaftina xwe ya ku bi pîrozbahiya Newrozê li gelê Kurd destpê kir de bal kişand ser girîngiya banga dîrokî ya Rêber APO. Da zanîn ku banga Rêber APO ne tenê ji bo gelê Kurd û Tirk, ji bo pêşeroja gelên Rojhilata Navîn jî xwedî girîngiyeke mezin e. Engîn Sever got, “Rêber APO ji bo siberoja gelên Rojhilata Navîn banga dîrokî kir. Ya ku divê ji niha û pê ve bikevin nava liv û tevgerê dewlet e. Em weke gelê Kurd ê li Ewropayê dijîn li pişt vê banga dîrokî ne. Em ê têkoşîna xwe li her qadê mezin bikin da ku destê Rêbertiya xwe xurtir bikin. Em Kurd baş dizanin ku gelê Kurd û gelên Rojhilata Navîn li ser maseya Rêber APO ti carî winda nake.”
Engîn Sever, anî ziman ku bertekên dewletên Ewropayê yên li hemberî banga dîrokî ya Rêber APO erênî bûn û got, “Daxuyaniyên hatin dayîn ji bo me girîng bûn. Ya girîng gavên berbiçav ên di pêvajoya pêş de bên avêtin. Divê Ewropa berpirsyariya xwe ya ji bo serketina bangeke wiha dîrokî bi cih bîne. Divê bi awayekî aktîf rola xwe bilîze ku dewleta Tirk gavên berbiçav bavêje.”
Piştî ku Sever îfadeya xwe bi dawî kir, ji ciwanên TCŞ’ê daxuyanî hat.
Peyama Newrozê ya Endamê TCŞ’ê Yusuf Tayfur
Endamê Tevgera Ciwanên Şoreşger (TCŞ) Yusuf Tayfur di berdewamiya pîrozbahiya Newroza 2025’an de daxuyaniyek da. Tayfur di axaftina xwe de destnîşan kir ku Newroz ne tenê cejna gelê Kurd e, di heman demê de roja berxwedan û azadiyê ye.
Tayfur diyar kir ku agirê ku Mazlûm Dogan û hevrêyên wî pêxistî îro jî di têkoşîna gelê Kurd de geş dibe û got, “Ev Newroz diyarî Rêber APO ye. Meşa gelê me ya azadiyê 52 sal in bênavber dewam dike û em bawer dikin ku serketin nêzîk e.”
Tayfur diyar kir ku heta azadiya fîzîkî ya Rêber APO bi dest bixin dê têkoşîna xwe bidomînin û bang li ciwanan kir ku berxwedanê mezin bikin. Daxwaza têkoşînê kir û got, “Divê ciwan ji bo azadiya gelê me rabin ser piyan û ruhê şoreşgerî zindî bihêlin.”
Di dawiyê de Tayfur destnîşan kir ku Newroz sembola azadiya gelan e û axaftina xwe bi dirûşmeyên “Bijî Rêber APO, Bijî Newroz” bi dawî kir.
Piştî govendê ciwanên Kurd ku ji ajansa me Nûçe Ciwan re axivîn wiha gotin;
Ciwanên ku peyama “Azadiya Rêber APO azadiya hemû gelên Rojhilata Navîn e û em ê banga sedsalê ya ku Rêbertiya xwe daye hembêz bikin. Em Newroza Rêber APO bi berxwedana xwe ya herî dilsoz pîroz dikin” dan pîrozbahiyên xwe heta şevê bi dîlanên govendê û dirûşmeyên “Bijî Serok APO” berdewam kirin.
