Navenda Nûçeyan – Ciwan û jinên ciwanên Başûr kurdistanê li bajarê Silêmanî li dijî tecrîda ku li ser Rêber APO tê meşandin û tevahî komployên di dîrokê de ku li ser rêberên gelê Kurd pêk hatine, her wiha êrîşên dagirkeriyê yê li ser jîngeh û xelkê Başûrê kurdistanê daxuyaniyek dan û dar li çiyayê guyêje yê ku beriya demekê hatibû şewitandin çandin.
Ciwan ku ji gelek bajarên Başûr kom bibûn, bi çalakiya dar çandin û daxuyaniyê helwesta xwe ya li hember komploya ser Rêber APO û êrîşên dagirkeriya Tirk raber kirin. Heman demê di salvgera pêngava azadiya fîzîkî ya Rêber APO de xwedî derketina xwe nîşan dan.
Kurdistan di dîrokê de heta roja me gelek caran bi êrîşên dagirkerî û mêtingeriyê re rû bi rû maye. Bi taybetî jî di sedsalên dawiyê de êdî hêzên dagirker û mêtinger ji bo ku Kurdistanê bi giştî bixin bin kontrola xwe û mêtingeh bikin gelek cûre polîtîkayên qirkirinê xistin dewrê. Gelek caran gelê Kurdistanê bi komkujiyên gelek hovane re rû bi rû hîştin, bi sed hezaran mirovên Kurd di komkujiyên fîzîkî re derbas kirin. Komkujiyên Halepçe, Dersîm, Qeladizê, Efrîn, Grmiyan, Şengal, Geliyê zîlan, Kobanê, Serdeşt, Sînema Amûdê, Qamişlo û bi sedan nûmûneyên van hovîtiyên di asta komkujiyan de li ser gelê Kurd pêk anîne.
Her wiha êrîşên qirkirina çandî li kêlaka van hovîtî û komkujiyan li ser gelê Kurd dane meşandin. Nasname, ziman, cil û berg, govend û şahî, stran û tevahî çanda Kurdayetiyê bi qedexekirinê ve xwestin van êrîşên qirkirina çandî bi encam bikin.
Ji bo ku qirkirina çandî û fîzîkî temam bikin bi alîkariya xîyanetkar û nokeran her cûre êrîşên hovane li ser jîngeh û dîroka Kurdistanê pêk anîn. Tevahî dar û daristan, çiya deşt, zozan û şênwarên dîrokî, her çi şahîdî ji dewlemendiya Kurd û Kurdistanê re kiribe êrîşên birin ser, xerab kirin, birîn, şewitandin û bi van êrîşan re armanc kirin ku li holê tiştekî bi navê Kurd û Kurdistanê nemîne.
Her çiqas di dîroka Kurd û Kurdistanênde îxanet, dagirkerî û mêtingerî hebe jî li beramberî van qehremanên ku li berxwedan serîhildan Rêbertî û pêşengayetî kirin neheqî û dagirkerî qebûl nekirin. Xak, welat, çand, Kurd ê Kûrdayetî parastin jî derketin. Li beramber zilm û zordariya Împaratoriya Asûriyan Kawayê Hesinkar gurzê azadiyê bilind kir û bû sembol ji jiyanek nû, jiyanek azad û newrozê diyarê gelê Kurd û Kurdistanê kir. Bi hezaran rêber û pêşeng xwedî li vê mîrateya Kawayê Hesinkar derketin, li ser ev rêyê meşiyan û îro jî dimeşin.
Qazî mihemed, Şêx Mehmûd Berzencî, Şehîd Aram, Sadiq Omer, Şêx Seîdê Pîran, Seyîd Riza, Mame Rîşe, Mam Reşo, Elîşêr û Zarîfe, Viyan Soran, Arîn Mîrkan, Bêrîtan û Zîlan, Sîmkoyê Şikakî, Leyla Qasim, Diyar Xerîb, Mam Zekî Şengalî, Egîd Cviyan û Rêberê mirovahiyê Rêber APO.
Ev navên ku me anîn ser ziman ji deh hezaran canbexş, rêber, pêşeng û serokê Kurd û Kurdistanê yê ku li beramberî dagirkerî, mêtingerî, bêedaletî, zulim û zordariyê xwedî helwest bûn, qebûl nekirin, her tişt dan ber çavê xwe û doza azadiya Kurdistanê bilind kirin.
Hemû pêşengên xwedî li doza azadiya Kurdistanê derketin an bi sûqastan hatin şehîd xistin an jî bi komployan dîl hatin girtin. Herî dawî Rêber APO bi komployekî navnetewî û namerdane dîl hate girtin û xwestin bi vê komployê di şexsê Rêber APO de doza azadiya Kurdistanê pêşî lê bigirin û têk bibin. Her kesekî ku xwsteka wî ya jiyana demokrarîk û ekolojîk û azadîxwaziya jinê hebe pêwîste li beramberî vê komployê xwedî li hebûna xwe derkeve û xwedî helwest bin.
Heman demê li beramberî êrîş û xiyanetê xwedî helwest bin û li hember her cûre êrîşên dijmin serî netewînin û xwedî çand dîrok û xwezaya xwe derkevin
Li ser vê esasê em wek ciwanên Başûrê Kurdistanê dibêjin, dijminê me her çend êrîşên xwe dijwar bike jî lê belê bi têkoşîna xwe emê bersiva pêwîst ji komplo û dagirkeriyê ser rêber û welatê xwe bidin.
Bimre îxanet û dagirkerî
Bimre komployên li beramber Rêberên gelê Kurd
Bijî Rêber APO
BijîKurdistan
