STRASBOÛRG- Endamên TekoJIN û jinên ciwan ên enternasyonalîst diyar kirin ku ji bo balê bikşînin ser 40 meh in tû agahî ji Rêber APO nayên girtin û tecrîda girankirî ya li ser Rêber APO, heta 7’ê Tîrmehê wê di nava çalakiyan de bin.
Jinên ciwan ên ku ji duh ve li dijî tecrîda li ser Rêber APO zêdetirî 25 sal in di sîstema qirkirina Îmraliyê de tê hiştin, li meydana Strasboûrg Place de Clebert di çarçoveya “Ji Rêber APO re azadî, Ji Pirsgirêka Kurd re Çareserî” hatin cem hev.
Jinên ciwan ên ku duh bi dirûşma “Bijî Serok APO” li nava bajêr geriyan, îro jî şanoyê li dar xistin û pirsgirêkên ku îro jinên ciwan pê re rû bi rû ne, ji nû ve zindî kirin.
Di performansa şanoyê ya hevdem de bi giştî 4 mijar hatin nîqaşkirin.
Jinên ciwan ên ku di mijarên şanoyê de pêşeng hatin hilbijartin, pirtûkên Rêber APO yên ku felsefeya Rêber APO temsîl dikin ji berga pirtûkê hildan û dan zanîn ku rizgariya ji zehmetî û zextên ku jinên ciwan di jiyana xwe de jiyan dikin, wê bi felsefeya Rêber APO pêk were.
Lîstikên ku di şanoyê de tên lîstin wiha ne:
Hate diyarkirin ku çawa jinên ciwan ji ber bandora medyaya dîjîtal ji civakê û virtualîzekirina jiyanê qut bûne.
Di şanoya duyemîn de bal hat kişandin ser gewriya serfkirinê û bi armanca kontrolkirina psîkolojîk û pasîfkirina jinên ciwan ên ji aliyê pergala kapîtalîst ve, pirbûna maddî û bikaranîna zêde hate nîşandan.
Di lîstika sêyemîn de tundî û tacîzên ku jinên ciwan ji aliyê mêran ve tên kirin, hatin pêşandan.
Di dîmena dawî de bal hat kişandin ser wê yekê ku dewletên Ewropayê der barê leşkerkirina jinan a ji bo artêşê de qanûn amade kirine û hat nîşandan ku dewlet çawa dixwaze jinên ciwan bi tevahî veguherîne kadroyên pergalê.
Piştî lîstika şanoyê bi zimanê Fransî “Ji Rêber APO re azadî” hate xwestin.
Jinên ciwan diyar kirin ku armanca wan bi şanoyê ew e ku balê bikşînin ser paradîgmaya Demokratîk, Ekolojîk û Azadiya Jinê ya ku ji aliyê Rêber APO ve hatiye pêşxistin ji bo hemû jinan çiqas gerdûnî û pêwîst e.
Jinên ciwan ên ku ji bo azadiya fizîkî ya Rêber APO şanoyî kirin jî bi pirtûk û broşurên Rêber APO yên li ser azadiya fîzîkî stand vekirin. Di standê de broşurên ku bi taybetî ji bo danasîna TekoJIN hatibûn amadekirin jî hatin vekirin.
Çalakiya şanoyê ku bala civakê kişand ser xwe bi dirûşmeyên “Bijî Serok APO” bi dawî bû.
