NAVENDA NÛÇEYAN- Komîteya Têkiliyên Derve ya KCK’ê bertek nîşanî sûcdariya Wezareta Navxweyî ya Iraqê ya têkildarî şewatên li Başûrê Kurdistanê yên li ser KCK’ê da û diyar kir ku ev daxuyanî ji bilî îftîrayên MÎT û Parastinê ne tiştekî dine.
Berdevkê Wezareta Karên Navxweyî ya Iraqê diyar kir ku 3 kes ji ber şewata ku navenda bazirganî û bazarên Kerkûk, Hewlêr û Duhokê kirine hedef hatin girtin û wek KCK’yî pêşkêşî çapemeniyê kirin. Di heman daxuyaniyê de hat îdiakirin ku 2 ji wan kesên hatine girtin endamên hêzên ewlekariyê yên Başûrê Kurdistanê ne û ji aliyê KCK’ê ve hatine wezîfedarkirin.
Komîteya Têkiliyên Derve ya KCK’ê di daxuyaniya xwe ya nivîskî de bi tundî bertek nîşanî daxuyaniya Wezareta Navxweyî ya Iraqê da û wiha got: ““Li ser navê Wezareta Karên Navxweyî ya Iraqê me bi rêya çapemeniyê zanî ku li parêzgehên Kerkûk, Hewlêr û Duhokê hinek şewat ku tê îdîakirin ji aliyê komek KCK’ê ve hatine kirin. Em hewldanên berpirsyar nîşandana tevgera xwe ya ji bo van êrişên ku tu eleqeya wan bi rastiyê re nîne û ji raya giştî ve tê zanîn ku ji aliyê MÎT-Parastin ve hatine kirin, red dikin.”
Di daxuyaniya KCK’ê de wiha hate gotin; “KCK’ê bi berxwedana ku ji berê heta niha nîşan daye û bi helwesta xwe ya bi pîvan û bi biryar, hêza ku gelên Kurdistan û Rojhilata Navîn nas dike, pê bawere û hebûna wê bi rûmete. KCK’ê ku li her cihê ku xeterî û neheqî li ser civakê hebe, helwesteke rast nîşan daye, îro li dijî kolonyalîzma Tirk ya ku gav bi gav Iraq û Başûrê Kurdistanê dagir dike, şerekî dijwar û bênavber dimeşîne. Bi derfet û desteka rêveberiya PDK’ê, leşkerên artêşa Tirk a dagirker li Zaxo, Duhok û Hewlêrê bêhurmetiyê li gelê me dikin û bi awayekî eşkere dagirkeriya xwe ya ku bi dizî dest pê kirine, didomînin. Artêşa Tirk a dagirker di saetên rojê de rêyan li ser xaka Iraqê digire, bi darê zorê nasnameyan kontrol dike, mirovan digre, bi êrişên SÎHA, û topan şehîd dike û koçberkirina bi darê zorê ji xwe re kiriye armanc.”
Di daxuyaniyê de hate destnîşankirin ku PDK li dijî sûcên artêşa Tirk a dagirker ku her roj li Başûrê Kurdistanê zêde dibin, hevkariya xwe ya herêmî didomîne û hikûmeta Sûdanê jî bê bersive û bêdenge û wiha hate gotin; “Gerîlayên Azadiya Kurdistanê li dijî van êrişên dagirkeriyê yên li dijî Başûrê Kurdistan û Iraqê bi hemû derfetên xwe li ber xwe dide. Tevî bikaranîna bêhejmar çekên qedexekirî û bombeyên kîmyayîî li dijî gerîlayan, pêkanîna her cûre sûcên şer û xistina teknolojiya herî pêşketî di xizmeta artêşa Tirk de jî, dewleta Tirk a faşîst şikestineke giran li beramberî berxwedana dîroka ya Gerîlayên Azadiya Kurdistanê dixwe. Artêşa Tirk a dagirker ku li nuqteyên ku heta niha dagir kirine bi zehmetî tevdigere, tenê bi cilên Iraqî û PDK’ê tevdigere.
Di dema ku tevgera me li dijî van êrişên dagirker berxwedaneke mezin dimeşîne, em li ser daxuyaniya Wezareta Navxweyî ya Iraqê şermezar dikin. Dema êrişên çeteyên DAIŞ’ê li Iraqê destpê kirin, tevgera me bêyî berjewendiyên xwe bifikire bi hemû hêza xwe ji bo parastina gelê Iraqê û gelê Kurd kete tevgerê û şer kir. Hewler bi awayekî aktîf beşdarî operasyona rizgarkirina herêmên Mexmûr, Kerkûk, Şengal û Mûsilê ji çeteyên DAIŞ’ê bû. Di vê oxirê de tevgra me berdêlên giran dan. Ji bo vê yekê jî Serokwezîrê Iraqê spasiya tevgera me kir. Îdîayên ku dibêjin me sûk û bazarên xelkê Kerkûk, Hewlêr û Duhokê şewitandin, ku di dema êrişên DAIŞê de me bi hemû hêza xwe parastina wan kir û şehîd dan, bêbextî û manîpulasyoneke ji aqil dûre. Em van îdiayan ji wijdana gelê Kurd û Iraqî re ku em li ber çavên wan li dijî dagirkeriyê li berxwe didin, dihêlîn.”
Di daxuyaniyê de hat destnîşankirin ku KCK’ê li hemberî dewlet û civaka Iraqê tu dijberiyek nîne û wiha hate gotin; “Tevgera me ne li hemberî dewleta Iraqê û ne jî li hemberî civaka Iraqê tu dijberiyek nîne. Bi van îdiayên li jor behsa tevgereke ku ji bo azadî û refaha gelên Rojhilata Navîn têdikoşe, tenê îftiraya MÎT’ê ye. Eşkere ye ku Wezareta Navxweyî ya Iraqê bi pêşengiya hin koman ev daxuyanî da. Çavkaniya van îddîayan rêxistina sûc ya navnetewî ya Komara Tirkiyeyê MÎT’ê ye ku hewl dide gav bi gav Iraqê dagir bike û Parastin şaxa wê ya li Kurdistanê ye. Ji bilî kiryarên li dijî Komara Tirk a ku hewl dide Iraq û Başûrê Kurdistanê dagir bike, tu têkiliya me bi tu bûyer û çalakiyan re nîne. Hemû Iraqî û Kurd dizanin ku aktorê sereke yê êrişên li ser aramî û ewlehiya Iraqê dewleta Tirk a dagirkere. Li hember îdiayên Wezareta Navxweyî ya Iraqê ku ji rastiyê dûrin û armanca wan beralîkirina rojevê ne, pêwîstî bi vê gotinê hebû.”
Di daxuyaniya Komîteya Têkiliyên Derve ya KCK’ê de bang li hikûmeta Iraqê û Wezareta Navxweyî ya Iraqê hat kirin û jê hate xwestin ku li beramberî arastekirinên MÎT’ê hîn bi berpirsyartir tevbigerin û ev tişt hatin gotin. “Em bang li hikûmeta Iraqê û Wezareta Navxweyî ya Iraqê dikin ku bi tohmetên ku tu pêwendiya wan bi tevgera me re nîne û berpirsên rast eşkere bikin. Her wiha em bang li gelên Iraqa demokratîk û berxwedêr dikin ku li hemberî van derewan helwesta xwe ya pêwîst nîşan bidin û li dijî kiryar û axaftinên ku êrişên dagirkeriya Tirk rewa dikin, têbikoşin.”
