NAVENDA NÛÇEYAN – KCK’ê ji bo hilbijartinên 14’ê Gulanê yên li Tirkiyeyê daxuyaniyek da û bang li hilbijêrên li derveyî welat kir.
Daxuyaniya Konseya Rêveber a KCK’ê wiha ye:
“Li ser esasê konsepta tasfiye û qirkirinê ya ku 24’ê Tîrmeha 2015’an kete dewrê, desthilatdariya AKP-MHP’ê ya faşîst ji wê rojê û vir ve bi rêbazên şîdet û şerê taybet ku di dîrokê de mîna wê hatiye dîtin, hewl dide ku Tevgera Azadiyê ya Kurd tasfiye bike, destketiyên Kurdan hemûyan ji rolê rake û Kurdan qir bike. Rejîma faşîst dema ku li hemberî berxwedana gerîla ket zoriyê, dest bi bikaranîna çekên kîmyewî, çekên taktîk nukleer û her cûre çekên qedexe kir. Li gel zext, girtin, êşkence û şerê taybet ê li ser gelê me, sîstema êşkence û tecrîdê ya li ser Rêber Apo hate girankirin. Desthilatdariya AKP-MHP’ê ya faşîst ji bo ku şerê li dijî Kurdan bimeşîne û Kurdan qir bike, zextek giran li ser gelê Tirkiyeyê kir, dewlet bi temamî veguherand sîstema çete û mafyayê û Tirkiye ber bi hilweşîn û krîza civakî, siyasî û ekonomî ve biriye. Niha bi qasî gelê Kurd, gelên Tirkiyeyê jî dixwazin ji desthilatdariya AKP-MHP’ê ya faşîst rizgar bibin.
EGER DESTHILATDARIYA AKP-MHP’Ê WERE XISTIN, WÊ PÊŞIYA TÊKOŞÎNA DEMOKRATÎK VEBE
Têkoşîna ku em weke gel û Tevger dimeşînin, desthilatdariya AKP-MHP’ê ya faşîst aniye ber hilweşînê. Desthilatdariya AKP-MHP’ê li hemberî têkoşîna me têk çû û vê têkçûn û hilweşîna xwe her roj hinekî din kûrtir dike. Bi hilweşîna AKP-MHP’ê Kurdistan û Tirkiye wê bikeve pêvajoyek nû, astengiya herî mezin a li pêş têkoşîna demokratîk wê ji holê rabe. Hilbijartinên 14’ê Gulanê ji bo ku geşedanek wiha biafirîne, pêvajoyek gelek girîng îfade dike. Eger di hilbijartinên 14’ê Gulanê de tifaqa AKP-MHP’ê ya faşîst ji desthilatdariyê were xistin, wê pêşiya têkoşîna demokratîk vebe. Ev yek jî girêdayî wê yekê ye ku gel di hilbijartinên 14’ê Gulanê de îradeya xwe bi rengekî xurt raber bike. Lewma 14’ê Gulanê ji bo rizgariya ji desthilatdariya dijminê Kurd, nîjadperest, qirker, mêtinger û faşîst, pêvajoyek têkoşînê ya gelek girîng îfade dike.
TEQEZ DIVÊ HER KES BIÇE SER SINDOQAN Û DENGÊ XWE BI KAR BÎNE
Bi qasî gelê me yê li Tirkiye û Kurdistanê, gelê me yê li derveyî welêt jî divê gelek girîngiyê bidin vê hilbijatinê û teqez biçin ser sindoqan û dengê xwe bi kar bînin. Îradeya gelê me yê li Ewropayê, divê teqez li ser sindoqan diyar bibe. Di tevahiya dîroka têkoşîna me de, di serî de li Ewropayê gelê me yê ji derveyî welêt piştgiriyek mezin dane têkoşînê û her fedakariya ku jê dihat hêvîkirin, pêk anî. Bêguman welatparêzî vê yekê ferz dike. Gelê me yê li derveyî welêt, her tim bûye parçeyek ji têkoşîna li welêt û bûye layiqê rûmetiya vê yekê. Li gel vê yekê divê baş were fêmkirin ku astek girîng a vê têkoşînê jî, hilbijartin e. Ji ber şertên civakî, siyasî û aborî yên Tirkiyeyê, girîng e. Me gel û tevger, desthilatdariya faşîst a AKP-MHP’ê aniye ber xerabûnê. Bi xurtî tevlîbûna li hilbijartinê, derfeta ku em desthilatdariyê ji ser hikum bînin xwarê, çêbûye. Dengên gelê me yên li derveyî welêt, ne hindik in. Bandora dengên derveyî welêt, wê li encamên hilbijartinê gelek be. Lewma divê her kes teqez biçe ser sindoqan û ji bo AKP-MHP bikeve û hêzên demokrasiyê kar bikin, divê dengê xwe bide. Piştgiriya dengên derveyî welêt, wê li têkoşîna li welêt û dengê ku wê gelê me bide, gelek be. Lewma divê gelê me li derveyî welêt, dayîna dengê xwe wek erkekî welatparêziyê bibîne. Divê her kes hizira vê bike û hev û din teşwîqê dayîna dengê xwe bike. Divê bi teşwîqkirinê jî nemîne, hev hişyar bike û li yên bi hizir tevnegerin rexneyan bike. Her kes, li gel ku mafê wan ê dayîna deng ji berê ve heye, ji ber ku deng nedaye, divê lê bipirse, xwe bide ber rexneyan û biryar bide ku wê teqez vê hilbijartinê biçe û di dema dayîna dengê xwe de ku li derveyî welêt hatiye diyarkirin, dengê xwe bide.
DIVÊ GELÊ ME DENGEKÎ JÎ KÊM NEKE
Berê gelê me pir nediçû ser sindoqan û deng nedida. Ev ji bo gelê me, kêmasiyeke mezin e. Çawa Kurdek naçe dengê xwe nade û piştgiriya ku wê bi vî awayî bide têkoşîna azadî û demokrasiyê ya li welêt û nade. Divê gelê me bi ti awayî vê qebûl neke. Gelê Kurdistanê yê li derveyî welêt, divê dengek jî kêm neke û bi awayekî xurt tevlî hilbijartinê bibe û kêmasiya berê telafî bike. Ev hilbijartin, ji hilbijartinên din gelek cudatir e. Divê ti kes nebejê ‘min dengek heye, bidim çi ye, nedim çi ye’. Dengek jî gelek girîng e û divê ti deng bi avê de neçe. Banga me li Kurdistaniyên welatparêz ên li Ewropayê û derên din ên derveyî welêt hemûyan ew e ku biçin ser sindoqan û dengê xwe bidin.”
