BEHDÎNAN – Endama Koordînasyona PAJK’ê Ayten Dêrsim Newroza 2023’an di serî li Rêberê Gelê Kurd Abdullah Ocalan, li gelên Kurdistanê, jin, ciwan û hemû mirovahiyê pîroz kir. Dêrsim Mazlûm Dogan û Zekîye Alkan di serî de hemû şehîdên Newrozê bi bîr anî.
Endama Koordînasyona PAJK’ê Ayten Dêrsim da xuyakirin ku gelê Başûrê Rojavayê Kurdistanê û Hatayê bi êşeke mezin ketine 2023’an û ji bo kesên ku xizmên wan jiyana xwe ji dest dane sersaxî û ji birîndaran re jî şîfaya xêrê xwest. Dersimê anî ziman ku encamên erdhejê careke din nîşan dide ku nêta dewletê ev e ku civak û civakîbûnê ji holê rake û got “Divê gelê me baş bi vî tiştî bizane. Dewlet tu carî nebû rizgarkerê vî gelî û ew ê nebe jî.”
Dersimê anî ziman ku gel tenê bi alîkarî û hevgirtina hev dikarin birînên xwe bipêçin û bal kişand ser vî tiştî ku gel û jinan ji bo alîkariyê berê xwe dane herêmê.
Dersim berxwedan û çalakiyên 8’ê Adarê yên jinan silav kir û diyar kir ku ev berxwedan wê di Newrozê de tacîdar bibe. Dersim destnîşan kir ku civak bi berxwedan û bi rêxistinbûneke xurt dikare êşên xwe derman bike û got, “Di vî warî de divê Newroz bi nêzîkbûna wate û ruhê xwe, bi wekhevî dikare were pîrozkirin. Gel li dora Newrozê dikarin kom bibin û pîrozbahî wisa dikare were kirin.”
Dêrsim da xuyakirin, ku dewleta Tirk ji bo di hilbijartinan de bibe desthilatdar, wê hewl bide her cure xapandinê bikar bîne û îradeya gelan ji nedîtî ve were û got, “Divê em karibin nîşan bidin ku faşîzma AKP-MHP’ê, êdî belaya serê gelan e. Ji bo ji vê belayê em rizgar bibin divê em berxwedanê geştir bikin.”
Dersim diyar kir ku tevgera azadiyê û gel bi berxwedanê heta îro hatiye û got, “Dewamkirina vê kevneşopiya berxwedanê felsefeya me ya herî bingehîn a jiyanê ye” û bal kişand ser vî tiştî ku di sala 2023’an de armanca wan azadiya fîzîkî ya Rêberê Gelê Kurd Abdullah Ocalan e.
