NAVENDA NÛÇEYAN – Koordînasyona YPS-YPS JIN’ê ji bo bîranîna şehîd Çiyager Hêvî (Cîhad Turkan) û şehîdên berxwedana rêveberiya xweser a Sûrê daxuyaniyek nivîskî da.
Daxuyaniya YPS-YPS JIN’ê wiha ye:
“Şehîd Çiyager Hêvî sala 1982’an li Êlihê ji dayik bûye û bi awayek çalak tevlî xebatên ciwanan bûye. Piştî xebatên ciwanan sala 2004’an tevlî nava refên gerîla bûye. Pêşniyara Şehîd Çiyager a şerkirina li Bakurê Kurdistanê, sala 2011’an guncaw hat dîtin. Dema ku weke rêwiyekê çû pêşberî kamerayê wiha gotibû, ‘Em bi awayek fîzîkî jî azadiya Rêbertî dixwazin. Baweriya me ya li vê yekê, bê dawî ye. Em bi vê bawerî û ruhî diçim Amedê. Ez ê ji bo azadiya Rêbertî biçim Amedê. Tevlîbûnek min a li gorî vê yekê wê çêbibe. Ya din jî dilsoziya min a bi hevalên şehîd re ye. Hewldana min a herî mezin wê ew be ku ez bibim layiqê hevalên şehîd. Her tiştê ku hetanî niha ji bo wê şer kirine, ez ê ji vê noqteyê ve dewama wê bînim. Qadên ku em diçinê, em ê pêdiviyên vê yekê pêk bînin. Ez bi vê îdîayê diçim Amedê’.”
Li Amedê di raporên xwe yên nivîsandî de wiha gotibû, ‘Ez destnîşan dikim ku ez ê bi tevlîbûnek a bi temamî xwe fedakirinê, nêzî pêvajoya zihniyeta şerê gel ê şoreşgerî bibim. Ji vî alî ve fedayîtî, di pêvajoyên herî zor de pêkanîna derketinên herî bi hêz e. Ez dixwazim ku li hemberî pêvajoyê hêza xwe derxînim. Ji vî alî ve min hêza xwe ya ku divê paşerojê derxistiba holê, dernexist. Yanî bi cih neanîna berpisyariya xwe û nebûna hevrêyek ji Rêbertî re, dixwazim bi pratîka xwe rexnedayîna wê bibim. Ez diyar dikim ku wê hemû ‘ezezîtiyên’ di hundirê xwe de bavêjim aliyekê, bala xwe bidim armanca xwe û xwe ji bo her cure erkê amade bikim’ û lêhêrbûnên xwe yên pêşengiya ji Şerê Gel ê Şoreşgerî re danîbû holê.
Dema ku roj hat bi parastin û qezenckirina armancên şehîdan a li ser esasê Şerê Gel ê Şoreşgerî; bêyî teredut û bi coşek mezin bi rê ket. Şehîd Çiyager û komek hevrêyên wî ji bo pêşengiyê ji berxwedanên rêveberiya xweser a hêzê parastina sivîl bike û gel biparêze ji çiyayan çûn navendên bajaran.
Li navçeya Sûr a Amedê ji mehên dawî yên sala 2015’an heta meha Adarê ya 2016’an berxwedanek mezin meşiya. 105 rojên vê berxwedanê bi dijwarî derbas bûn. Bi ciwanên Kurd ên bi cesaret re, li dijî artêşa mezin a duyemîn a NATO’yê di parastina cewherî de bi awayek çalak cih girt. Dewleta Tirk a dagirker û mêtinger, li hemberî wan balafir, tank, top, leşker, cerdevan û hemû derfetên dewletê li navenda bajêr bi awayek faşîst bi kar anî. Di destê berxwedêrên rêveberiya xweser de jî çekên ferdî, dilên wan ên mezin û fermandek mîna Şehîd Çiyager hebû. Ji bo heqê vê berpirsyariya giran bidin, her tim di nava lêgerîn û hewldana ku ‘ez çawa dikarim baştir bibim’ de bû.
Şehîd Çiyager bi tevlîbûn, bi hestiyarbûn, moral û bala xwe dayîna serkeftinê, bû pratîkvanê gotin û îdîayên xwe. Hem ciwanên Kurd ên çek hildane, hem jî xelkê Sûrê; şahidî ji mîlîtaniya wî ya fedayî û lehengiya wî ya gel re kiriye. Şahidî kirin ku yên jiyana xwe fedayê rêya azadiyê dikin, xwedî kesayetek çawa ya şerker û pêşengiya jiyanê ne. Dîrokê di sedsala 21’an de ji ‘dawiya bi heybet’ bawer kir û car din dilnizmî, bedew û sekna bi rûmet a şeran nivîsand. Nivîsand ku bi hêrsa Çiyager li dijî dagirkerî, mêtingerî û faşîzmê rabûn û mîna Çiyager lêxistin, îradeyek çiqas mezin ava kir.
Em bûyîna şopdarê sekna Şehîd Çiyager a mîlîtanî, hevrêtî û fermandariyê weke rûmetekê û bi serxistina îdîa û xeyalên wan jî weke erkekê dibînin.
Em di şexsê Şehîd Çiyager ê 12’ê Adara 2016’an şehîd bû û şehîdên berxwedana rêveberiya xweser a Sûrê hemûyan de, şehîdên xwe yên li qadên din ên rêveberiya xweser bi rêzdarî, heskirin û minetdarî bi bîr tînin. Em soza xwe ya geşkirina têkoşîna azadiyê û serkeftinê, dubare dikin.”
