NAVENDA NÛÇEYAN – Şîlan Polat (Eylem Zêvkan) li Geverê li nava malbateke welatparêz ji dayik bû û hîn di zarokatiyê de Tevgera Azadiyê ya Kurd nas kir. Ji malbata Polat gelek kes tevlî nava refên PKK’ê bûbûn, di têkoşîna azadiyê de berdêlên gelekî giran dabû. Şîlan Polat jî PKK’ê bi rastiya şehîdan nas dike. Zext û êrîşên dewleta Tirk a dagirker ên li ser gelê Kurd di dilê Şîlan de bû sedema kîn û hêrseke mezin. Şîlan ev êrîş ti carî qebûl nekir û ji bo dagirkeriya li ser Kurdistanê bêbersiv nehêle, kete nava lêgerînan. Di encamê de jî li çiyayên Kurdistanê cihê xwe di nava têkoşînê de girt.
Şîlan çû herêma Zapê û di nava PKK’ê de navê Eylem Zêvkan li xwe kir. Xwe bi felsefeya Rêberê Gelê Kurd Abdullah Ocalan bi pêş ve bir û di demeke kurt de hînî jiyana gerîla bû. Piştî perwerdeyê derbasî Zapê bû. 3 salan li Zapê di nava karê pratîkî de ma. Di mijara Îdeolojiya Rizgariya Jinê de xwe perwede kir û di heman demê de tevkarî li perwerdeya hevrêyên xwe kir. Destnîşan kir ku wezîfeya wê ya herî girîng misogerkirina azadiya fîzîkî ya Rêberê Gelê Kurd e.
Bi qasî aliyên xwe yên leşkerî ji aliyê îdeolojîk ve jî xwe bi pêş ve bir. Bi tevlîbûna xwe ya li nava jiyanê bû mînak ji hevrêyên xwe re. Li Zap, Garê, Metîna û gelek herêmên Kurdistanê karên gerîla kir. Ji bo bibe gerîlayeke profesyonel xwe ji bo perwerdeya leşkerî pêşniyar kir. Ji bo vê jî derbasî Akademiya Şehîd Mahîr bû. Perwerdeya xwe bi serketî qedand û bû sekvaneke hosta.
TEVÎ 4 HEVRÊYÊN XWE HETA FÎŞEKA DAWÎ LI BER XWE DA
Gerîla Eylem ku PKK weke qada avakirina jiyaneke nû dît, ji bo jiyana gerîla hîn bêhtir pîroz bike, têkoşiya. Ji xwe re kir esas ku bide ser şopa Zîlan û Sema. Bi rengekî fedaî li hemberî dijmin şer kir. Eylem ku xeyal û hêviyên xwe hebûn, pratîka xwe jî li gorî vê armanca xwe bû. Bersiv da her cûre êrîşan. Hêrsa xwe li hemberî dijmin bi rêxistin kir, soza tolhildanê da û hêrsa xwe ya li hemberî dagirkeran kir bingeha têkoşîna xwe. Bi vî rengî bû milîtaneke hêja ya YJA Starê ku jiyaneke mezin kir para xwe.
Gerîla Eylem bi perwerdeyên îdeolojîk û leşkerî bû gerîlayeke profesyonel û ev yek di pratîka xwe de nîşan da. Eylem gotina Rêber Apo ji xwe re kir esas ku digot, ‘Jinên ji min hez dikin bila berê xwe bidin Botanê’. Ji ber vê yekê sala 2017’an derbasî herêma Botanê bû. Li vê herêmê tevlî gelek çalakiyan bû ku derbên giran li dijmin hate xistin. Bi vî rengî soza ku dabû şehîdan bi cih anî. Ji bo karibe berpirsyariyên xwe pêk bîne hewl da ji aliyê îdeolojîk û jiyanê ve xwe bi pêş ve bibe. Bi vê têgihiştinê tevlî nava jiyanê bû û ji hevrêyên xwe re bû pêşeng.
Dewleta Tirk a dagirker 3’ê Çileya 2021’ê li ser herêma Gabarê dest bi êrîşeke mezin kir. Di vê êrîşê de Eylem Zêvkan û 4 hevrêyên wê heta fîşeka dawî li hemberî dewleta Tirk a dagirker şer kirin û bi rengekî fedaî li ber xwe dan, bi vî rengî tevlî nava karwanê nemiran bûn.
Agahiyên li ser nasnameya Şehîd Eylem Zêvkan bi vî rengî ne:
Nasnav: Eylem Zêvkan
Nav paşnav: Şîlan Polat
Cihê jidayikbûnê: Gever
Dema tevlîbûnê: 19.07.2013
Dem û cihê şehadetê: 03.01.2021 Gabar
