ESSEN – Meşa dirêj a ku her sal bi pêşengtiya ciwanên Kurd û enternasyonalîst bi awayekî domdar tê li darxistin, îro jî li bajarê Essen ya Elmanyayê hate li darxistin. Meşa dirêj ya vê salê bi dirûşmeya “Ji bo azadiya Rêber Apo, Werin Cenga Azadiyê” hate li darxistin. Ciwanên Kurd û enternasyonalîst ji gelek welatên weke Elmanya, Îngilîstan, Fransa, Swîsre, Kolombiya, Awûstralya, Îtalya, Spanya û Hollandayê tevlî meşê bûne.
Di derbarê meşê de yek ji ciwanên ku cihê xwe di komîteya Amadekar digire ji ajansa me re axivî. Ciwanê bi navê Kamîlo Torres got; “Em weke ciwanên Ewrupa emê heya hefteyekê bimeşin, lê wê çalakiyên me bi vê re bi dawî nebin. Emê têkoşîna xwe ya ji bo azadî û rûmetê bidomînin. Em ji hêzên hegomanîk daxwaza azadiya Rêber Apo nakin, emê bi avakirina şoreşa Kurdistanê re, azadiya Rêber Apo misoger bikin.”
“Destpêkê ez tevahî hevalên ku li dijî faşîzm û dagirkeran têkoşîn dikin, gerîlayên ku li çiyayan li berxwe didin û tevahî gelê Kurd yên li 4 perçeyên Kurdistanê têkoşîn dikin silav dikim û serkeftinê ji wan re dixwazim. Niha em li vir di Meşa Dirêj a Ewropayê ya 2022’an de ne, ji gelek deverên cîhanê gelek ciwanên Kurd û enternasyonal beşdarî meşê bûne. Ji Awustralya, Latîn Emêrîka û hemû deverên girêdayî Ewrupayê ciwan beşdar bûne. Em îro hatine vê derê da ku dengê xwe ya ji bo azadiya fîzîkî ya Rêber Apo bilind bikin. Ji ber ku azadiya Rêber Apo azadiya me hemûyan e. Bi taybet ji ber ku em ber bi salvegera komploya 9’ê Cotmehê ve diçin. Di wê rojê de tevahî hêzên hegomanîk yên cîhanî li dijî Rêber Apo komployeke bi pêşxistin. Bi taybet jî serkêşiya wê Emêrîka, dewletên girêdayî Ewrupa, dewleta Tirk û Rûsya kirin, xwastin ku bi vê komployê têkoşîna şoreşgerî ji holê rabikin. Lê li tersî wê berxwedana Rêber Apo ya ji bo azadiyê mezin bû û paradîgmaya Netewa Demoqratîk ji bo tevahî gelan hêvî bi xwe re anî, ji ber vê jî bandora wê her ku diçe zêde dibe.
Di pêvajoya niha de jî dixwazin ev komploya ku di pêşengtiya wan de bi pêşketî înkar bikin û li kêleka wê dixwazin şoreşa Kurdistanê tune bikin. Ji ber vê jî hemû hêza xwe seferberî şerê li dijî gelê Kurd û Kurdistanê kirin e. Şerê ku niha dewleta Tirk jî li Kurdistanê dike, şerekî ku ji aliyê hêza giştî ya NATO’yê ve tê destek kirin. Hem di aliyê aborî, hem çek û hem jî ji aliyê lojîstîkê de pê re dibe alîkar. Heman demê de aliyê medya de jî pê re dibin alîkar û hemû sûcên wî vedişêrin. Gelê Kurd û Kurdistanê li dijî van tevahî êrîşên dagirkeriyê ku dixwazin bi riya wê împratoriya Osmaniyan nû bikin, berxwedaneke mezin û bê hempa raber dikin. Aliyeke din jî heye ku dewleta Tirk dixwaze krîz û qeyranên xwe yên hundirîn bi şerê li Rojhilata Navîn re bi dawî bike, ji ber vê jî bi awayekî rêxistinkirî şerê xwe ya li dijî gelê Kurd û tevahî gelên din didomîne.
Gelê ku li pey fikir û felsefeya Rêber Apo dimeşe, bi berxwedana xwe tevahî êrîşên qirkirinê vala derdixe. Em baş fam dikin jî ku hêzên hegomanîk ketine nava panîkê de, di van deman de demên xwe yên herî kirêtîk jiyan dikin. Weke mînak em dikarin bêjin, me dît çawa di van 2 salên dawiyê de bi riya tektîka pêşketî ya gerîla bi bin dikevin. Berxwedana gel û gerîla ya ku bûye yek ew têk birin. Nikarîbûn têkoşîna gel û gerîla ya ji bo parastina şoreşê tune bikin, nikarin gavekê jî pêş de werin.
Ji bo me ciwanên Kurd û enternasyonalîst ve têkoşîneke bi vê rengî têrê nake, êdî armanca me azadiya fîzîkî ya Rêber Apo ye. Divê em jî weke ciwan cihê xwe di nava vê pêvajoya dîrokî de bigirin. Em xwe di nava gel de bi gel re bi rêxistin bikin, em ji bo maf û hebûna xwe ve têkoşîn bikin. Em wisa dikarin tevahî êrîşên mêtînger û qirker vala derbixin. Divê em çavên xwe li kuştina jin, ciwan û zarokan negirin. Em bi têkoşîna azadiya jinê, azadiya xwezayê û azadiya gelan dikarin dawî li van kiryaran bînin. Ji bo me xwaserî pêwîst dike.
Tişta ku em tînin ziman, ne weke xewn û xeyalekê ye. Tişta ku em dibêjin rastiyeke tê jiyan kirin. Ji ber vê jî pêwîste em hemû weke gelên cîhanê xwe ji parastina Kurdistanê berpirsyar bibînin. Kurdistan dilê me ye, şoreşa wê şoreşa me ye, ji ber ku şoreşa Kurdistanê hêz dide tevahî şoreşên cîhanê. Em weke ciwanên Ewrupa emê heya hefteyekê bimeşin, lê wê çalakiyên me bi vê re bi dawî nebin. Emê têkoşîna xwe ya ji bo azadî û rûmetê bidomînin. Em ji hêzên hegomanîk daxwaza azadiya Rêber Apo nakin, emê bi avakirina şoreşa Kurdistanê re, azadiya Rêber Apo misoger bikin.
Em silav û hezkirinên xwe ji tevahî têkoşer û berxwedêrin her çar aliyên cîhanê re dişînin. Em weke ciwan ji meşa dirêj ji tevahî ciwanên Kurdistanê re silavên xwe dişînin û ji we hemûyan re serkeftinê dixwazin. Emê di rojên serkeftî de bi hevre bicivin.”
NC// Cemîl Cûdî
