NAVENDA NÛÇEYAN
Seevan SAEED nivîsand —
Di 15 Sibata 1999´an de, Serok û Rêberê mezintrîn tevger û şoreşa Kurdistanê bi Komployeke navneteweyî hat êsîrkirin.
Di 15 Sibata 1999´an de, Serok û Rêberê mezintrîn tevger û şoreşa Kurdistanê bi Komployeke navneteweyî hat êsîrkirin. Pirr baş tê bîra min ku ew roj li her derê dinyayê gelê Kurd rabû ser piyan. Tenê cihek hebû ku lê xelkê nikarîbû dakeveke meydanan; ew jî sê bajêrên Başurê Kurdistanê bûn, sê bajarên Hikûmeta Hewlêrê ya ku hingê hîna fermî nedihat nasîn, Dihok, Hewlêr û Silêmanî. Îro di salvegera pîlangêriya qirêj de, ez dibînim ku dîsa ew her sê bajar bê deng in. Zilma dijmin, qebûl kirine, xemsar vê roja reş derbas dikin.
Pirsa min ev e: Gelo xelkê me li Başur ewqas neagah û nezan e ku li serokek û tevgereke ewqasî mezin xwedî dernakeve? Gelo dewletên dagirker ewqasî dil û can û mêjiyê gelê me dagir kirine, wisa kirine ku êdî rojeke reş a wekî îro bi hêsanî derbas bibe?
Ya rastî ew e ku ev demeke bêhtirî 30 salan e ku gelê me li Başûr di bin zilm û zoreke pirr giran û qirêj de dijî. Partîyên siyasî bi tevahî ketine bin Ferman û hegemoniya dijminên Kurd û Kurdistanê. Şerê taybet bi tevahî pirranî ya xelk û rayedarên Kurd li Başûr xistine bin destê xwe. Bi hêsanî em dikarin bibînin ku civaka Başûr di bin bandora dijmin de dijî.
Çi rojeke ji vê rojê reştir, yanî ti roja ji ya wekî îro reştir gelo di dîroka me de heye; vê rojê kiriye ku hizirvanek, serokek û mezinekî wekî Apo Ocalan 23 salan li zindanê ragirtî be, bêbextî û zilma mezin bê serê wî? Gelê me li Başur bi hezar bela û derdan re rû bi rû maye. Dijminên me li derdorê û li hundurê welatê me, bi hezaran hîle û bi pîlanên qirêj dor li me girtine. Ji her rojê zêdetir, em îro hewcedarê hizr û ramanên birêz Abdullah Ocalan in. Naskirina vî rêberî bi qasî nan û avê ji bo me girîng e. Lê belê, mixabin, ev dibin 30 sal ku Tevgera Azadiya Gelê Kurd jî nikariye ku hizr û ramanên Ocalan û şoreşa wî ya hizrî bi me bide nîşan. Rexneya min ne li dijmin û ne jî li gelê me ye, bi tenê rexneya min li min û li hevalên min û beriya her tiştî jî li Tevgera Azadiya Kurdistanê ye. Bila êdî gelê me li Başûr ji hizr û ramanên birêz Abdullah Ocalan û hevrêyên wî bêpar nebe.
Bersiv û nêzikbûna me ji bo roja reş gelo divê çawa be? Ez bawer dikim, bersiv lazim e hem şexsî, hem kolektîf û hem jî civaki be. Bila her kes bi sekna xwe êş û kula vê roja reş tercûmeyî çalekiyekê bike. Ez soz didim ku wefadar bim ji bo ked û xebata birêz Ocalan. Şehîdên vê rêyê weke serok û mezinên xwe ji dil û can bi rêz û hurmet bi bîr bînim. Gelê me li Başûr lazim e li rêber û mezinê xwe xwedî derkeve. Ez jî ji xelkê Başûr im û wê soza xwedîderketina li Ocalan û rêya wî didim. Bi pratîkkirina hizr û ramanên birêz Ocalan, em roja reş bikin roja geş.
YENİ ÖZGÜR POLİTİKA
