NAVENDA NÛÇEYAN –
Aysel AVESTA nivîsand
Dewleta Tirk bi piştgiriya hêzên navneteweyî ji bo tesfiyekirina tevgera azadiya Kurdistanê her rê û rêbaza qirêj bi kar tîne. Li gel polîtikayên şerê taybet hemûyan, bi komploya navdewletî ya 15’ê Sibata 1999’an xwestin bi dîlgirtina Rêber Apo tevgera azadiya Kurdistanê tasviye bikin.Lê berxwedana gelê Kurd û pêşbîniyên Rêber Apo ji roja destpêkê ve pîlanên komplogeran hemû pûç kirin.
Paşê weke dewama vê komployê, sala 2018’an, Dewletên Yekbûyî yên Emerîkayê ji bo pêşengên PKK’ê Cemîl Bayik, Murat Karayilan û Duran Kalkan biryareke sosret derxist û ji bo tesbîtkirina cihê wan yan jî dîlgirtina wan ji bo serê her yekî ji wan 12 milyon dolar xelat danî. Çawa ku gelê Kurd bi berxwedanê bersiv da êriş û pîlanên dijmin, ev hewldan jî bi berxwedan û xwedîderketina gelê Kurd li pêşengên xwe hat pûçkirin.
Piştî bibinketina dewleta Tirk li Garê, hêzên komploger bi taybetî jî Emerîkayê, dîsa ji bo dilê dewleta Tirk xweş bike, ev komplo nûjen kir. Balkêş e, nûkirina vê biryarê û êrişên dewleta Tirk ên li dijî Herêmên Parastina Medyayê, rastî heman demê hatin. A rastî, tevgera azadiyê û gelê Kurd piştî bibinketina artêşa Tirk a li Garê, li benda êrişeke wiha bûn. Ji ber ku serketina gerîla ya li Garê, gelek pîlan û hesabên wan pûç kirin.
Wisa hatibû pîlankirin ku bi xistina Gerê re di serî de Qendîl, Mexmûr, Şengal, Rojava û tevahiya Başûrê Kurdistanê kontrola bikin. Jixwe, ew ji roja destpêkê ve xeyala Erdogan bû. Heger ev pîlan biçûya serî, Erdoganê ku bi salane ji xwe re qesr û qonax ava kirine, wê bi hêsanî wegeriyana pergala Osmaniya Nû. Ev yek jî bêgûman bi erêkirina PDK’ê hatibû pîlankirin.
Lê hesabê wan li hev derneket. Ew ne li bendê bûn ku bibinketineke wiha dîrokî li Garê bê serê wan. Ji lewma, berxwedana Garê ji bo gelê Kurd û tevgera azadiya Kurdistanê deriyê pêvajoyeke nû vekir û bû mîlad. Ji ber wê, dema mirov vê pêvajoyê binirxîne divê mirov bibêje, beriya Garê û piştî Garê. Serketin û berxwedana Garê, tesîreke mezin li gelê Kurd û raya giştî kir, û vê tesîrê xwe piştre di serhildanên gel û jinan ên 8’ê Adarê û Newrozê de da der. Di çalakiyên 8’ê Adarê de sekna jinan û biryardariya wan ya ji bo xurtkirina tekoşînê û sekna gelê Kurd di Newrozê de nîşan da ku berxwedan dikare herîkîna dîrokê biguherîne.
Dewleta Tirk li hemberî vî ruhê berxwedêr ket nava krîzê û weke caran dîsa berê xwe da Rêber Apo. Derbarê rewşa ewlekarî û tendirûstiya Rêber Apo de, li ser medya dijîtal hin agahî belav kirin da ku rojevê biguherîne û ser bibinketina xwe binixumîne. Ji ber ku ew baş pê dizane, Rêber Apo ji bo gelê Kurd xeta sor e. Ji lewma awir hemû zivirandin ser Îmraliyê. Êrişên li dijî HDP’ê, ji nişkê ve xwe ji Peymana Stanbolê kişandin, bi heman armancê pêk hatin. Ji van êrişan jî diyar e ku Tirkiye di rewşeke kambax de ye. Dibe ku li xwe danaynin, lê heta qirikê ketine nav heriyê û nizane çawa jê derkeve. Ewçend êrişên bê ser û ber ji ber vê yekê ne.
Niha jî berê xwe daye Zap, Metîna û Avaşînê. Ev ne hewldana yekê ya operasyonên dersînor ên dewleta Tirk e. Dewleta Tirk kengê li hemberî tevgera azadiyê dikeve tengasiyê, vê rêbazê bi kar tîne. Her carê jî navên giregir li xwe dike, û deste vala vedigere. Vê care jî navê ‘Pençe-Yildirim’ û ‘Pençe Şîmşek’ li xwe kiriye. Li dijî van operasyonên dagirkeriyê yên dewleta Tirk, gerîlayên YJA Star û HPG’ê jî bi navê Bazên Zagrosê û Cenga Xabûrê dest bi pêngavên şoreşgerî kirin. Artêşa Tirk ku hîna têkçûn û şoqa Serketina Garê ji ser xwe navêtiye, niha dîsa derbên giran ji hêzên gerîla dixwe. Ji roja destpêkê ve ji biryardariya gerîlayan jî diyar e ku ev operasyon jî wê weke yên din bê encam biqede. Çawa ku heta niha li hemberî hemû êrişan cenga parastinê hatiye heye, di vê cengê de jî, Gerîlayên Azadiyê wê rê nedin dagirkeran û têkçûnê ti carî qebûl nekin.
YENİ ÖZGÜR POLİTİKA
