NAVENDA NÛÇEYAN – Înîsiyatîfa Ciwanên APOYÎ daxuyaniyek nivîskî weşand û daxuyakirin ku ev demeke dirêje taybet li ser torên nîgaşî (sanal) hindek kes li ser nirxên Gelê Kurd, derheqê Rêberê Gelan Abdullah Ocalan û Tevgera Azadiyê heqareta dikin û wan kesan hîşyar kir. Înîsyatîfê diyarkir ku wê li dijî wan kesan ji niha û pê ve têkoşînek tûj bide meşandin.
Berfirehiya daxuynaiya Înîsiyatîfa Ciwanên APOYÎ wiha ye:
“Destkeftiyên mezin ên ku ji hêla Têkoşîna Azadiya Kurdistanê ve, bi pêşengiya Rêber APO, hatine afirandin, bi xeta xwe ya berxwedan û serokatiya hemdemî, rewşa gelek kurd, ku ber bi xirabiyê ve diçû, vegerandiye ser riya baş. Têkoşîna Azadiya Kurdistanê, ku qehremanên mezin, mîlîtan û pêşengên gel afirandiye, li dijî hemû êrişên tesfiyekariyê, xayîntî, hevkarî û serkirdayetiya derewîn têkoşiyaye û berxwedana xwe ya ji bo kesayeta azad, civaka azad û welatê azad bi navber domandiye. Dema ku em li dîroka Têkoşîna Azadiya Kurdistanê dinêrein, em dikarin bibînin ka ew di kîjan şertan de bi awayekî fedekarî têkoşîn dane, bedelên çiqas mezin dane û bi têkoşîna xwe dîrokeke çendî mezin ava kirine. Têkoşîna Azadiya Kurdistanê bi şêwaza xwe ya têkoşînê, pênas û nirxên mezin, bi tevahiya cîhanê daye zanîn, ku ew têk naçe.
Çawa, ku bi Tekoşîna Azadiyê re destkeftinên mezin çêbûbin, encamên dîrokî û lehengên mezin derketibin, her wisa terikandin û îxanet jî rû dane.
‘DIVÊ CIWANÊN KURD BI LÎSTOKAN NEYÊN XAPANDIN’
Pergala dagirker û emperyalîst ji roja ewil ve ji bo ku rastiya şoreşgerî ya Tevgera Azadiyê, xeta rêbertiyê tasfiye bike, hewl daye, ku kes û komên îxanetkar, hevkarên rejîmê, opûrtinîst û reformîst xwedî bike û bixe rojeva gelê me. Dijmin ji roja yekem û vir ve van siyasetên li ser gelê me bi plansazî û israr dimeşîne. Bi taybetî li Ewropa siyasetên taybet li ser ciwanên kurd tên meşandin, da ku wan bînin ser xeta îxanetê yan jî ji rihê ciwanên APOCÎ qut bikin. Pêwîst e hîç ciwanên kurd bi van lîstikan nexapin, li dijî van êrîşên şerê taybet ên dijmin bisekinin û ji helwesta xweza rihê ciwanên APOCÎ tavîz nedin.
‘BI KLAVYEYÊ ŞOREŞ Û KURDISTAN NAYÊ AVAKIRIN’
Hin kesên ketine bin bandora polîtîkayên dijmin û bûne berdevkên hişmendiya dijmin, bi navê “kurdbûnê” bi awayekî bê exlaqî êrîşî Rêber APO, paradîgmaya wî û Îradeya Kurdîtiya Azad a bi têkoşînê ava bûye, dikin. Ev kes bêyî ku bidin ber çav, ev nirx bi bedeleke çendî mezin hatine afirand, li ser medyaya civakî bi klavyeya xwe şoreşê pêk tînin dewlet ava dikin. Ev leqleqên, ku tenê gotineke kin jî li dijî dagirkeran nabêjin, êrîşî Rêber APO, ku di şertên herî dijwar yên tecrîdê de bi awayekî bê hempa li ber xwe dide, Têkoşîna Azadiyê, ku di tekoşîneke dîrokî ya li dijî êrîşên tunekirinê de her roj şehîdan dide û paradîgmaya, ku bi rêveberiya xwe re îro hêviya azadiyê dide tevahiya gelan, dike. Ev helwest tê wateya ku ew di nav refên dijmin de cî digirin, ku bi her awayî êrîşên qirkirinê didomîne.
Em wekî Ciwanên APOCÎ, ji rewşa van kesan haydar in, ku bi hevkariya dijmin dixwazin Têkoşîna Azadiyê tasfiye bikin û zirarê bidin destkeftiyên gelê kurd. Divê kes ji me hêvî neke, ku em li hember van kesên kirêt, ku zimandirêjiya Rêbertiya me ya, ku derfeta wî tune ye peyvek ragihîne derve, Têkoşîna Azadiyê, ku her roj şehîd û bedelên mezin dide û nirxên me yên bi fedekariyên mezin hatine bidestxistin, dikin, bê deng bimînin! Em ê vê yekê tu carî qebûl nekin! Em, wekî Înîsiyatîva Ciwanên APOCÎ, diyar dikin ku em ê êdî li dijî vê xeta xiyanetê têkoşîneke dijwar bidin.
‘LI DIJÎ NÊZÎKATIYÊN HEVKAR, ÎXANETKAR Û DIJMINÎ EM Ê BÊDENG NEMÎNIN’
Divê her kes pir baş bizanibe, ku kî helwestek wisa bigire, ew ê bersiva xwe bistîne. Divê kes nefikire, ku em ê li hember nêzîkatiyên, ku helwestên dijminane li hember Rêber, Gel û Têkoşîna Azadiya Kurd digirin, bê deng bimînin. Dabeşek girîng a serfiraziya Têkoşîna Azadiya 42 salî, bi encama şerekî tund ê li dijî hevkarên rejîmê, xayîn, reformîst û opûrtinîstên wisa e, pêk hatiye. Ciwanên kurd her dem li dijî têgihiştinên wisa xwedî helwest û sekna xwe ya diyar bû û îro ev sekn û helwest wisa bidome.
Em ê li dijî her cûre helwestên hevkarariya bi dagirkeriyê re û îxanetê têkoşin û biryardariya serkeftinê bi rihê tolhildanê bi tundî diyar dikin. Ne hêzên modernîteya kapîtalîst, ne dagirkerî û ne jî hevkarên wan dikarin meşa me ya ber bi azadiyê ve asteng bikin. Em ê her û her mizgîniya hatina şoreşê bi dengekî bilind li ser dinyayê bixin.”
