NAVENDA NÛÇEYAN – Dewleta Tirk li gel êrîşên dagirkeriyê yên li ser Başûrê Kurdistanê, hewl dide ku li herêma Bradost komên çekdar ên paramîlîter ava bike. Hat diyarkirin ku Tirkiye li gel hin partiyên Kurd û serok eşîran civînan çêdike û dixwaze li dijî Tevgera Azadiya Kurdistanê derxîne.
Derbarê êrîşên dagirkeriyê ku dewleta Tirk li ser Başûrê Kurdistanê didomîne û hewldanên wê yên nepenî de, çavkaniyên pêbawer ku geşedanan ji nêz ve dişopînin û nexwestin navên wan bên eşkerekirin, zanyariyên girîng dan Ajansa Rojnews.
Li gorî van zanyariyan, dewleta Tirk a dagirker ji bilî êrîşên ji bo dagirkirina herêmê yên her roj berdewam dikin, di nava hewldanên nepenî de ye.
Beriya Newrozê civîn çêkirin
Bi taybetî li herêma Bradost, dijî Tevgera Azadiya Kurdistanê civîn û hevdîtinên veşartî çêdike. Çavkaniyan destnîşan kirin ku rayedarên Teşkîlata Îstixbarata Netewî (MÎT) a Tirkiyeyê, beriya Newroza 2019’an li herêma Bradost bi serok eşîr, rusipî û nûnerên hinek partiyan re civîn çêkirine. Çavkaniyan gotin ku nêzî 100 kes beşdarî van civînan bûne û hewl hatiye dayîn li dijî Tevgera Azadiya Kurdistanê plan bên çêkirin.
Hêza paramîlîter
Heman çavkaniyan bal kişandin ku dewleta Tirk hewl dide ku dijî Tevgera Azadiya Kurdistanê komek çekdar a paramîliter ava bike û di vê çarçoveyê de gelek kes perwerde kirine. Van hewldanên xwe jî dibin navê oldariyê de dike û li hinek kesan jî çek belav kirine.
Civînên bi partiyên Başûr û Rojhilat re
Çavkaniyan da zanîn ku dewleta Tirk di demeke nêzde jî li herêma Bradost bi nûnerên hinek partiyên Kurd ên li Başûr û Rojhilatê Kurdistanê civîn çêkiriye. Di vê civînê de jî li ser dijberiya Tevgera Azadiya Kurdistanê axaftin hatine kirin û hatiye gotin; Ger ku li Îranê tiştek çêbibe, em nahêlin ku geşedanek wekî Rojavayê Kurdistanê çêbibe. Em ê li vir hêzek ava bikin.”
Liv û tevger zêdetir bû
Balkêş e ku piştî van geşedanan li herêma Bradost liv û tevgera hin hêzan jî zêde bû. Di 1’ê Hezîrana 2019’an de di navbera herdu partiyên demokrat ên Rojhilatê Kurdistanê HDK-Î/HDK’ê û Sazûmanî Xebatî Kurdistanî Îran de li çiyayê Helgurt ê girêdayî parêzgeha Hewlêrê alozî rû da. Herçend alozî veneguherîbe şereke çekdarî jî, lê alozî hîn çareser nebûye û têgotin herdu HDK dixwazin Sazûmanî Xebatî Kurdistanî Îran ji herêmê vekişe.
Li aliyê din hat ragihandin ku hêzên PDK’ê roja Înê (31 Gulan 2019) li herêmê dest bi tevgerê kiriye û bi şev konvoyek a ji 15 wesayîtan pêk tê ya hêzên pêşmergeyan şandiye herêma Sîdekan. Çavkaniyan destnîşan kirin ku li hêzên pêşmerge wesayîtên kar ên wekî kepçe û grayder her wiha konteynirên ku bi armanca li wir bimînin jî di konvoyê de hebûn.
