Parlementera HDP’ê Dersim Dag a çalakiya xwe ya greva birçîbûnê berdewam dike, bertek nîşanî daxuyaniyên Soylû da. Soylû bi daxuyaniyên xwe fermanê dide darazê. Soylû wezîrekê ku hatiye tayîn kirin. Tenê derdekê Soylû heye, ew jî HDP, HDP’î ne û ev berxwedane. Ev nîşaneya herî mezin a tecrîdê ye. Rewş wisan bûye ku Soylu fermanê dide darazê.”
AMED – Parlementera HDP’ê ya Amedê Dersim Dag, bersiva da fermana Wezîrê Karê Hûndir Suleyman Soylû ya serdegirtina avahiya HDP’ê ya Amedê û binçavkirina çalakgerên digreva birçîbûnê de û got: “Ligel hemû ferman û hedefnîşandanên Soylû jî emê çalakiya xwe berdewam bikin.”
Parlamentera HDP’ê ya Amedê Dersim Dag û endamên HDP’ê Salîh Cansever, Îsmet Yildiz, Sevîcan Yaşar, Salîh Tekîn û Bîlal Ozgezer duh bi armanca rakirina tecrîdkirina Rêberê Gelan Abdullah Ocalan bi civînek çapemeniyê li avahiya Rêxistina HDP’ê ya Amedê dest bi greva birçîbûnê ya bêdawî û bêdorveger kiribûn. Çend saet şûn de polîsan bi ser avahiyê de girtibûn û 5 endamên HDP’ê binçav kiribûn. Ligel serdegirtin û binçavkirinê jî, wekîla HDP’ê Dersim Dag û endamên HDP’ê yên dibin çavan de çalakiya xwe berdewam dikin.
Piştî serdegirtinê Wezîrê Karê Hundir Suleyman Soylu di civîna danasîna namzetên partiya xwe ya li Navçeya Beypazari ya Enqereyê axivî û got: “Li bajarekî (Amed) di hundirê partiya xwe (HDP) de wê bikevin greva birçîbûnê. Min ji hêzên me emniyetê re got wan di nava nîv saetî de ji wir rakin. Beriya niha telefon hat. Wan ji wir hildan.” Soylu bi vê gotinê li xwe mûkir hat ku wî fermana binçavkirinê daye.
‘WEZÎREKÊ KU HATIYE TAYÎNKIRIN FERMANÊ DIDE DARAZÊ’
Parlementera HDP’ê Dersim Dag a çalakiya xwe ya greva birçîbûnê berdewam dike, bertek nîşanî daxuyaniyên Soylû da. Soylû bi daxuyaniyên xwe fermanê dide darazê. Soylû wezîrekê ku hatiye tayîn kirin. Tenê derdekê Soylû heye, ew jî HDP, HDP’î ne û ev berxwedane. Ev nîşaneya herî mezin a tecrîdê ye. Rewş wisan bûye ku Soylu fermanê dide darazê.”
‘BERXWEDANA ME DÊ BIDOME’
Dag, da zanîn ku ewê çalakiya xwe berdewam bikin û wiha bilêv kir: “Endamên HDP’ê yên hatine binçavkirin jî, çalakiya xwe berdewam dikin. Soylû wisan difikire ku dê bi zextên xwe vê berxwedanê têk bibe. Va ye em li virin û berxwedana me dewam dike. Heya ku em encamê bigirin, emê berxwedana xwe dewam û mezintir bikin.”
‘HIKUMET BI HESTÊN ŞER TEVDIGERE’
Dag, di dewama axaftina xwe de wiha bilêv kir: “Êrîş û zextên li ser HDP û çalakiyên greva birçîbûnê, dewama polîtîkayên şer ên hikûmetê yên li dijî gelê Kurde. Em ber bi hilbijartina herêmî ve diçin. Hikûmeta bi hestên polîtîkayên şer û netewperestiyê tevdigere. Bi vê dixwaze di hilbijartinê de bi ser bikeve. Lê ev xwe xapandinek mezine. Bi awayekê pir zelal em li Kurdistan û Tirkiyeyê hirs û kîna gel a li dijî hikûmetê dibînin.”
‘GEL DÊ DI 31’Ê ADAR’Ê DE BERSIVÊ BIDE SOYLÛ’
Dag, di dawiya axaftina xwe de ev peyam da: “Gelê Kurd û gelên Tirkiyeyê li hemberî polîtîkayên AKP’ê bi bertekin. Li dijî polîtîkayên tecrîdê yên hikumeta AKP’ê, li Kurdistan û Tirkiyeyê bertekek mezin heye. Gelê Kurd û gelên Tirkiyeyê, dê di 31’ê Adarê de, bersivek xweş hem dê bidin Soylû û hem jî dê bidin Serokê Giştî ye AKP’ê Tayyîp Erdogan.”
