PAJK: “Kêlî kêliya afirandina dîrokê û serdema xwe ye. Dem ew dem e ku bi vê nasnameyê re sekna Kurdîtiyê nîşanî her kesî bidin û bi ser bikevin. Li cih û warê ku faşîzm teslîmiyet û dîlgirtinê ferz dike, agirê berxwedanê geş bûye.”
NAVENDA NÛÇEYAN- Koordînasyona PAJK’ê nameya bi sernavê “Ji pêşengên berxwedanê; girtiyên azad ên PKK û PAJK’ê û hevala me Leyla Guven re” hate weşandin.
Di nameyê de hate ragihandin, di vê demê de ku jiyan ziwa bûye, gef li paşerojê tê xwarin, zilm û zordarî her serdest e û azadî ya hatiye tinekirin ya jî li ber pûçkirinê ye, ji berxwedanê bêhtir watedar tiştek nîne.
Di nameyê de hate gotin, “Em li ber xwe didin, ji ber ku cîhana me li ber tinebûnê ye û têkiliyên mirovî diqedin. Em li ber xwe didin, ji ber ku mêtingerî, qirkirin û komkujî li gelan, baweriyan, jinan, ciwanan û zarokan tê ferzkirin. Em li ber xwe didin, ji ber ku hesreta me ya ji bo rojên bedew û ronî mezin û zindî ye. Em li ber xwe didin, ji ber ku ENCAM WÊ BÊHEMPA BE Û EM Ê TEQEZ BI SER BIKEVIN. Hêviya vê yekê me hemûyan dixe nava coş û kelecanê.”
Di nameyê de işaret bi tecerîdkirina Rêberê Gelan Abdullah Ocalan ahte kirin û hate ragihandin, hewldana esasî û xala bingehîn a berxwedana wan, têkbirina sîstema êşkence û tecrîdê ye.
Koordînasyona PAJK’ê got, “Bawerî bi wî nû dibe, wate li wir mezin dibe, hezkirin li gel wî şîn dibe û armanc li cem wî no dibe. Lewma hêvî bi wî re şîn dibe, paşeroj jî bi nêrînên wî yên mezin diafire. Ji ber vê yekê, ev hêrs, ev raperîn, ev berxwedana li dijî tecrîdê, bûye berxwedaneke dîrokî. Ji bo pêvajoyê pêwîstî bi milîtaniyeke dijwar, bi berxwedaneke bê sekn, bi lehengiyeke bê eman heye. Mirovên ku dibin bersiv ji pêwîstiyên pêvajoyê re, dîrokeke watedar dinivîsînin. Navê vê yekê jî; şoreşgeriya kêliyê ye ku cîhan tev dibîne bê mirovên li armancên xwe asê bûne dikarin çi bikin.
Kêlî kêliya afirandina dîrok û serdema xwe ye. Dem ew dem e ku bi vê nasnameyê re sekna Kurdîtiyê nîşanî her kesî bidin û bi ser bikevin. Li cih û warê ku faşîzm teslîmiyet û dîlgirtinê ferz dike, agirê berxwedanê geş bûye. Her kes bi tîna vî agirî têdikoşe.
Grevên birçîbûnê yên di şexsê Leyla Guven de dest pê kirin, nîşanî her kesî dan ku em dîlgirtina Rêbertî qebûl nakin, bi vî rengî nikarin bijîn û heta tecrîdkirina Rêberê me biqede û Rêbertî azad bibe em ê têkoşîna xwe bi rengekî no bidomînin. Yanî me dest bi serdemeke nû ya têkoşînê, saleke nû ya têkoşînê kir. Ev têkoşîn wê bi ser bikeve.
Çalakiyên ji bo armancên mezin û xwebirçîhiştina bi mehan a ji bo van armancan, mîrateyek e ku 14’ê Tîrmehê, ji Mazlûm, Kemal û Sarayan ji me re maye. Têkoşîna me ya azadiyê bi berxwedana zindanê re felsefeya hezkirina ji jiyanê afirandiye ku di oxira wê de dikare bimire. Rûmeta têkoşîna di vê oxirê de temsîl kiriye. Hûn niha vê felsefeyê, vê xeta lehengiyê bi cih tînin û di nava çalakiyeke wiha ya bi rûmet û mezin de ne. Têkoşîna we digihêje mirovên azadîxwaz ên li Kurdistanê, Rojhilata Navîn û cîhanê. Her wiha tirseke mezin dixe dilê zalim û komplogeran.
Gelê Kurdistanê gelê berxwedanê ye. Şoreşgerên vî gelî jî bi berxwedanê bûne xwedî nasname. Şoreşgeriya li Kurdistanê ew yek e, ku mirov xwe bike çavkaniya hêviyê. Rabûna li ber ya neqebûlkirinê ye, biryardariya têkoşîna bi her berdêlî ye. Li ku derê zilm hebe, mirov li wir bi berxwedanê bedew dibin. Milîtaniya ku serî li ber zilma zaliman natewîne û celadan têk dibe, nasnameya mirovên azad ên vê sedsalê ye. Ev mîrateya berxwedanê di kesayetiya milîtaniya PKK û PAJK’ê de berbiçav bûye. Berxwedan dibe vejîn û serketin.”
Di dawiya nemayê de hate ragihandin, tasfiyekirina sîstema Îmraliyê, hilweşandina faşîzmê û afirandina azadiyê armanca wan a bingehîn e û hate destnîşankirin ku heta encam bê kirin wê ev têkoşîn nesekine.
Di nameyê de hate gotin, “Zarokên agir û rojê, berxwedêrên Kurdistanê yên navê xwe li dîroka Rojhilata Navîn û cîhanê neqişandin, wê rê li ber azadiya Rêbertî vekin. We bi sekna xwe ya berxwedêriyê ku bûye tirsa herî mezin a kujeran, bandor li cîhanê kirin û dengê xwe gihandin her kesî. Leyla û hûn hemû ku bi mîrateya têkoşîna azadiya jinê ev meşale dewr girtin, rûmeta me ne. Bi navê milîtanên azadiyê yên li çiyê em berxwedana we silav dikin û bi ruh û hişmendiya têkoşînê dibêjin; serketin wê ya berxwedêran be.”
