Koordînasyona Komalên Ciwan bang li hemû ciwan û gelê Kurdistanê kir ku tev li çalakiyên li dijî tecrîdê di 19 û 20 Çileyê de li hemû qadan were lidar xistin bibin.
NAVENDA NÛÇEYAN- Koordînasyona Komalên Ciwan di malpera xwe ya fermî de daxuyaniyekî bi sernivîsa ‘’Ji bo tecrîdê bişkînin, Faşîzmê birûxînin û Kurdistan azad bikin Serî Hilde’’ weşand. Di daxuyaniyê de bangawazî hate kirin ku li dijî tecrîda giran li ser Rêberê Gelan Abdullah Ocalan di 20’ê Çileyê de di roja salvegera dagirkirina Efrîn’ê de tev li çalakiyên ku were kirin bibin û banga mezinkirina berxwedanê kir.
Daxuyaniya Komalên Ciwan wiha ye:
Berxwadana Gelê me û Gerilayên Azadiya Kurdistanê Qomployan Wala Derxistiye
Tecrîd û îşkenceya giran a li ser Rêber Apo 20 salê xwe paş de hêşt. Dewleta Tirk a qirker û hêzên emperyal ê ku dewleta Tirk cendirmetiya wî dike ji bo destkeftiyê gelê me û tesfiyekirina Tevgerê me di kesayeta Rêber Apo de bi qomloyekî xwest ku erdnigarî û gelê Kurdistanê tune û îmha bike. Ev politikaya qirêj bi çalakiyên ku di pêşengtiya ciwanan de ‘’Hûn nikarin Roja me tarî bikin’’ ve xwe derdorê Rêber Apo de kir xelkeyeke ji agir û bi berxwedana gerillayên Azadiya Kurdistanê di her qadê de ve hatiye vala derxistin.
Ji bo ‘Serî hildanê, tecrîd şikandinê, faşizm ruxandinê û Kurdistan azadkirinê’ re tenê rêyek heye ew jî berxwedan e
Îro jî li dijî tecrîd û îşkenceya giran a li ser Rêberê me bi pêşengtiya Hevseroka KCD’ê Leyla Guven ve berxwedanek hatiye destpêkirin û ev pêl bi pêl di hemû qadan de gihiştiye bi sedan kesan û ev dewleta Tirk ya qirker matmayî kiriye û li dijî çanda berxwedana gelê me dewleta Tirk teng maye ku gav paş ve bavêje. Di vê bingehê de dewleta Tirk a qirker wisa hesibandiye ku ji bo vê berxwedanê bişkîne, bi van leyîstokên qesrê ve û bi serî lê dana polîtikayên qirêj a şerê taybet ve wê serbikeve. Ciwanên Kurdistanê û gelê me yê welatparêz pêwîste di ferqa van polîtikayên şerê taybet de bibe û li dijî wî hestiyar be û di her qadê de têkoşînê mezintir bike. Îro ji bo ‘Serî hildanê, tecrîd şikandinê, faşizm ruxandinê û Kurdistan azadkirinê re tenê rêyek heye ew jî berxwedan e, di qadan de bûyin e.
Gelê me yê welatparêz û fedakar li dijî vê qirkirinê berxwe daye û berxwe dide
Bi vê girêdayî dîroka 20’ê Çileyê 2018’an, ji ber êrîşên ku li hember destkeftiyên Tevgera Azadiyê, li dijî welatê me Kurdistanê û gelê me yê welatparêz ê ku bi dagirkirina Efrîn’ê re şenber bûye rojekî reş e. Salekî ku me pey xwe hêşt de erdnigariya Efrîn’ê û gelê me ye Efrînê bi her cure komkujî, talan û bi dizîtî re rû bi rû maye. Herçiqas ev êrişên li dijî gelê me ‘’qirkirinek’’ jî bibe, gelê me yê welatparêz û fedakar li dijî vê qirkirinê berxwe daye û berxwe dide.
Dewleta Tirk a qirker di nav amadekariya êrîşên nû ye
Di pêvajoya ku em di tê de ne dewleta Tirk a qirker û dagirker ji bo bi giştî Kurd tunne bike û Tevgera me ya Azadiyê tesfîye bike bi hevkartiya hêzên emperyalist ve dixwaze ku dubare êrîş bike. Dewleta Tirk a qirker di nav amadekariya êrîşên xwe yên dagirkeriyê ku berê bi gelek caran ceribandiye lê binketiye û li hember tevgera me şikandinek jiyaye û ji xwe re vê pêvajoyê wek ‘’hebûn û tunebûnê’’ pênase dike de ye.
Em bang li Ciwan û Gelê Kurd dikin ku li qadan bin
Di vê bingehê de di rojên ku salvegera dagirkirina Efrîn’ê de ye, em bang hemû ciwanên Kurdistanê û gelê Kurd dikin ku li dijî êrîşên dewleta Tirk a dagirker û polîtikayên qirêj ên şerê taybet tev li çalakiyên 19 û 20 Çileyê ya ku bi şiyara ‘’Ji bo tecrîdê bişkinî, faşîzmê birûxînî û Kurdistan Azad bikî Serî Hilde’’ were lidar xistin bibin û di derdorê Rêber Apo de xelkeyeke ji agir bibin.
