QEREQOZAX- Berxwedana destanî ya şervanên QSD’ê li dijî dewleta Tirk a dagirker û çeteyên wê bi îradeyeke mezin didome. Şervanên QSD’ê Erdal Efrîn, Bekir Kobanê û Cûd Kobanê di vê berxwedana destanî ya li eniya Qereqozaxê de li dijî êrîşên dagirkeriyê li tekoşîn dikin, ji tunelên şer peyama berxwedanê dan.
Şervanan di axaftinên xwe de bang li gel û bi taybet ciwanan kirin û tevlîbûna nava refên QSD’ê bibin.
Şervanê QSD’ê Erdal Efrîn ê ku li Cepheya Qereqozaxê ye, di axaftina xwe de diyar kir ku ew li dijî dewleta Tirk a dagirker û çeteyên DAIŞ’ê yên ku wê afirandine şer dikin û bi vî rengî li ber xwe didin.
Şervanê QSD’ê diyar kir ku ew bi ruhê hevaltiyê şer dikin û bi ruhê hevaltiyê wê serkeftinê bi dest bixin û got, “Ev ruh me mezin dike û digihîne armanc û hedefê me yên herî mezin. Em li dijî dagirkeriya dewleta Tirk, bi ruhê şoreşgerî û bi rihê rêhevalên me yên ku di vê dozê de canê xwe feda kirine, şer dikin.”
Efrîn da xuyakirin ku têkoşîna li vir tê meşandin ji bo gelan e û got, “Em ne tenê ji bo gelê Kurd, ji bo hemû gelan têdikoşin. Em bi daxwaza biratiya gelan têdikoşin. Heta ku gel li pişt me be. Em ê destûrê nedin ku ev şoreş birûxîne, dewleta Tirk a dagirker dixwaze me tine bike lê berovajî emê wî tine bikin. ”
Şervanê QSD’ê Erdal Efrîn diyar kir ku dewleta Tirk a dagirker nikare vîna gel bişkîne û got, “Em heta dawiyê bi vîna vî gelî bawer in. Ev îrade dihêle ku em li ser piyan bimînin.”
Efrîn, anî ziman ku ji hevdîtina bi Rêber APO re moraleke mezin girtine û got, “Axaftinên Rêbertî moral û hêzeke mezin dide me. Rêberê me her tim dibêje pêwîste em bi hêz bin. Em jî li gorî bangên Rêbertî tevdigerin. Em bi hêztir dibin, em dibin xwedî rol û mîsyon, ji ber ku dengê serokatiya me pir girîng e.”
Şervanê QSD’ê Erdal Efrîn bi van gotinan dawî li axaftina xwe anî: “Têkoşîn û şerê ku em li Qereqozax, Tişrîn û Minbicê dimeşînin ji bo vî gelî ye. Banga min ji gel re ew e ku li dora QSD’ê kom bibin. Em şerê gel ê Şoreşgerî dikin. Li cihê ku gelê me tune be, têkoşînek nayê meşandin.”
Şervanê QSD’ê Bekir Kobanê diyar kir ku wan bi ruhê hevrêtiyê li dijî dewleta Tirk a dagirker li ber xwe didin û ev tişt anî ziman: “Em ê dewleta Tirk a dagirker û çeteyên wê bişkînin. Dîrok jî dizane, her kes dizane, çawa ku me di sala 2014’an de DAIŞ têk bir. Em ê dewleta Tirk a dagirker û çeteyên wê jî têk bibin. ”
Şervanê QSD’ê diyar kir ku moralê xwe ji gel digirin û got, “Divê gelê me ti carî netirse. Divê bê xem û rehet be. Şervanên wan li vir li dijî dewleta Tirk a dagirker li ber xwe didin. Bi balafirên xwe yên şer û keşifên xwe êrîşê me dikin lê ev nayê wê wateyê ku îradeya me wê bişkê.”
Şervanê QSD’ê Bekir Kobanê di berdewamiya axaftina xwe de wiha got: “Ez bang li gelê me û taybet ciwanên me dikim. Werin tevlî nava refên QSD’ê bibin, li cem şervanên xwe bin. Bijî Rêber APO, Bijî Şerê Gel ê Şoreşger, Bijî Berxwedana Qereqozax.”
Şervanê QSD’ê Cûd Kobanê diyar kir ku ew li dijî dewleta Tirk a dagirker û çeteyên wê li ber xwe didin û got, “Em zarokên vî gelî ne. Em li ber xwe didin. Bila gelê me rehet be. Em bang li gel û ciwanên xwe dikin. Werin em li kêleka şervanên QSD’ê bibin yek û em gelê xwe ji zilm û zordariyê biparêzin. Ji vir slavên xwe yên herî germ ji gel û ciwanên me re dişînin. Bijî Berxwedana Tişrin û Qaraqozax.”
