TÎŞRÎN- Gelê Bakur û Rojhilatê Sûriyê duh di saetên serê sibê de ji bo parastina Bendava Tişrînê û li dijî êrîşan nîşan bidin ji gelek bajaran derketin rê.
Dema konvoya wesayîtan a ji aliyê gel ve hatibû avakirin, nêzî bendavê bû, pêgerên hewayî yên bê mirov ên dewleta Tirk a dagirker konvoy bombe kirin. Di encama êrîşê de 5 kes şehîd bûn û 15 kes jî birîndar bûn.
Tevî êrîşan jî gel ji wesayîtan peya bûn û heta bendava Tişrînê meşiyan. Gelê ku li Tişrînê dest bi nobetê kirin peyama berxwedanê dan û diyar kirin ku ew ê bendava Tişrînê biparêzin.
Hevseroka Konvoya Firatê ya PYD’ê Bêrîvan Îsmaîl jî diyar kir ku ji duh ve ji bo parastina Bendava Tişrînê piştî gelek zehmetiyan hatin vir û got, “Dewleta Tirk a dagirker bi balafirên bêmirov êrîşî gelê me kir. Di encamê de 5 hevalên me şehîd bûn û 11 hevalên me jî birîndar bûn, tenê armanca dewleta Tirk a dagirker ew e ku vî welatê me tine bike.”
Îsmaîl, da zanîn ku ji bo parastina bendava Tişrînê hatine cem hev û wiha got: “Gelê me bi kedeke mezin li derdora bendava Tişrînê kom bûye. Weke ku tê zanîn herî dawî li dijî bendava Tişrînê û pira Qereçoazax êrîşên dijwar tên kirin. Di encama van êrîşan de kehrebe û ava gel qut bû, bi taybetî li Kobanê. Em îro wek jin, wek partiyên siyasî û wek gelê Kantona Firatê li vir in, em dixwazin helwesta me ji raya giştî ve were bihistin. Ger ev pir were xirakirin gelek jiyan bikevin bin xeteriyê de divê em vê pirê biparêzin.”
Îsmaîl da zanîn ku gel li dijî êrîşan helwest nîşan da û got, “Li vir şerê gel ê Şoreşgerî pêk hat. Êrîşên giran li ser gel hatin kirin, lê gelê me bê bersiv neman. Bi maneviyata xwe li vir in. Dayikan stranên şoreşgerî dibêjin, gel li dora agir kom dibin û tên cem hev.”
Di dawiyê de Bêrîvan Îsmaîl diyar kir ku ew li kêleka şervanên QSD, YPG û YPJ’ê ne û got, “Çawa ku ew Bendava Tişrînê diparêzin, em jî li kêleka wan bendava Tişrînê biparêzin. Bijî berxwedana gelê Bakur û Rojhilatê Sûriyê. Serkeftin wê her tim ya me be, binkeftin wê her tim ya dijmin be.”
Ciwanê ji Kobanê Mihamed Mihamed jî diyar kir ku piştî rûxandina rejîma Sûriyeyê dewleta Tirk a dagirker û çeteyên SMO yên di bin serweriya wê de ji vê yekê sûd werdigirin û êrîşên dijwar li ser xaka Bakur û Rojhilatê Sûriyeyê pêk tînin û got “Ev komên çete ji aliyê dewleta Tirk a dagirker ve tên destekkirin. Hem ji aliyê leşkerî û hem jî ji aliyê teknîkî ve desteka dewleta Tirk a dagirker distînin. Êrîşên giran li ser Qereqozax û Tişrînê pêk anîn û li dijî wê em weke gel û ciwanên Kobanê hatin bendava Tişrînê.”
Mihamed, diyar kir ku armanca wan a sereke parastina bendava Tişrînê û dabînkirina ewlehiya wê ye û wiha got: “Em weke gel û ciwan diyar dikin ku em ê ji bo parastina bendava Tişrînê û nobedê li vir bin. Bi ti awayî rê nadin dewleta Tirk a dagirker û çeteyên wê di bendava Tişrînê re derbas bibin. Li ser vê bingehê em careke din diyar dikin ku em ê li vir bin û bi ti awayî rê nedin ku çete ji vir derbas bibin, bijî berxwedana gelên Bakur û Rojhilatê Sûriyê.”
