NAVENDA NUÇEYAN- Fermandarê Giştî yê Hêzên Sûriya Demokratîk (QSD) ji kanala Ronahî TV re li ser dozên girîng ên li tevahî Sûriyeyê û herêmên Bakur û Rojhilatê Sûriyeyê bi taybet axivî.
Mezlûm Ebdî bal kişand ser biryara bilindkirina ala serxwebûnê ya Sûriyeyê li ser tevahî saziyan û got: “Em parçeyek ji Sûriyeyê ne. Em al û sembolên Sûriyeyê qebûl dikin.”
MINBIC Û KOBANÊ Û LIHEVKIRINA AGIRBESTÊ
Ebdî behsa doza kantona Minbicê kir û axivî: “Hêzên wan li gorî agirbestê tev digerin, lê çeteyên dewleta Tirk li gorî wê tev nagerin û lihevkirinê bin pê dikin.”
Mezlûm Ebdî hêvî kir ku agirbest sibe anku roja înê bikeve pratîkê. Her wiha Ebdî diyar kir ku bi hêvî ye ev agirbesta li Minbicê veguhere agirbesteke giştî.
Di dewama axaftina xwe de Ebdî got li gorî agirbestê divê tu hêzên leşkerî li Minbicê nemînin anku Minbic ji tevahî pêkhatên leşkerî were valakirin.
Der barê êrişên li dijî gundewarê başûrê Kobanê de bi taybet li herêmêa Qerekozakê Ebdî axivî ku hêzên wan bi lehengî parastina herêmê dikin.
Ebdî anî ziman ku dewleta Tirk a dagirker ji ber êrişên xwe rastî zextên navneteweyî yên mezin hatin û bi her êrişeke Tirkî li ser Kobanê re dê berxwedana Kobanê ya dîrokî dubare bibe.
Mezlûm Ebdî destnîşan kir ku pêşkêşkirina wan ji bo vegerandina termê Silêman Şah weke niyeta baş ji aliyê wan de bû.
LIHEVKIRINA BI “HEYET TEHRÎR EL ŞAM” RE
Ebdî der barê hebûna lihevkirinekê navbera wan û Heyet Tehrîr El Şam de li Heleb û Dêrazorê got armanca wan a hebûna li rojavayê Dêrazorê ew bû ku rê li pêş pêşketina DAIŞˋê bigirin.
Ebdî aşkera kir ku bi destpêka êrişan re wan agahî ji “Heyet Tehrîr El Şam” wergirtin ku herêmên wan nabin armancên heyetê.
TIRKIYE Û HERÊMÊN DAGIRKIRÎ
Fermandarê Giştî yê QSDˋê Mezlûm Ebdî aşkera kir ku agahiya Rûsyayê ji êrişa “Heyet Tehrîr El Şam” bi rêya Tirkiyeyê hebû û bal kişand ser ku komên girêdayî Tirkiyeyê nikarin biryarekê bêyî vegera li Enqereyê bidin.
Ebdî da zanîn ji bo herêmên dewleta Tirk û çeteyên wê dagir kirine derfetên ji çareserkirinê hene.
Her wiha Ebdî got ew tu xeteriyê li ser ewlehiya Tirkiyeyê çênekin û amade ne bi Tirkiyeyê re bikevin diyalogê.
Ebdî destnîşan kir ku dewleta Tirk a dagirker hewl dide wan ji qonaxa siyasî bi dûr bixe û got: “Ji bilî komên girêdayî Tirkiyeyê tu kes naxwaze şer li Sûriyeyê bibe.”
ÇAREYA SIYASÎ YA SÛRÎ
Ebdî diyar kir ku ji her demê zêdetirî pêdivî bi yekitî û biratiya gelan heye û got ji ber paşguhkirina Rêveberiya Xweser ji diyalogan re krîza Sûriyeyê çareser nabe û wiha axivî: “Beşdariya Rêveberiya Xweser di qonaxa siyasî de dê bi xwe re çareserkirina krîza Sûriyeyê bîne. Divê helwesta Kurdan di qonaxa nû ya Sûriyeyê de yekgirtî be.”
Ebdî hêvî kir ku Rêveberiya Başûrê Kurdistanê ji bo yekitiya Kurdan helwestekê nîşan bide.
Di dawiya axaftina xwe de Mezlûm Ebdî got: “Xeterî hîna bi dawî nebûne. Divê gel bi hêzên leşkerî re hevgirtî be. Em ê bi piştgiriya gelê xwe vê qonaxa hestiyar derbas bikin.”
