SALZBÛRG – Li bajarê Salzbûrg ê Awûstûryayê bi meşek girseyî êrîşên dewleta Tirk a dagirker ên bi ser Bakur û Rojhilatê Sûriyeyê û Komploya 9’ê Cotmehê hat şermezarkirin. Meş bi pêşengiya Civaka Azad Lînz, Civaka Azad Salzbûrg û RiseUp4Roava li ber statsyona navendî ya trenê hat lidarxistin. Li vir ewilî ji bo giyanê şehîdan rêz hate girtin û piştre axaftin hatin kirin.
‘TIRKIYE SÛCÊ ŞER DIKE, DIVÊ TEQEZ BÊ ŞERMEZARKIRIN’
Berdevka Federal a Partiya Komunîst a Awûstûryayê (KPO) û Parlamentera Eyaleta Salzbûrgê Sarah Pansy axivî. Pansyê sûcên şer ên dewleta Tirk rêz kirin û got: “Dewleta Tirk ji hefteya borî ve êrîşên xwe yên li dijî Rêveberiya Xweser a Rojava li Bakur û Rojhilatê Sûriyê zêde kiriye. Erdogan bi balafirên şer û balafirên bêmirov qadên jiyanê yên weke santralên elektrîkê, tesîsên ava vexwarinê, zeviyên petrolê û kargehan dike armanc. Di encama bombebarana Tirkiyeyê de bi temamî nexweşxaneyek ji holê hat rakirin. Ji destpêkê ve Tirkiye li dijî Kurdan bi milîsên Îslamê re di nava hevkariyê de ye. Ji sala 2016’an ve xaka Bakur û Rojhilatê Sûriyeyê dagir kiriye. Êrîşên Tirkiyeyê yên li dijî qadên jiyanê sûcê şer e, divê teqez bê şermezarkirin.”
‘POLÎTÎKAYA QIRKIRINA ETNÎKÎ Û DAGIRIRINÊ TÊ MEŞANDIN’
Sarah Pansyê bal kişand bêdengiya navneteweyî ya li dijî êrîşan û wiha got: “Di serî Awûstûrya û gelek welat li hemberî êrîşên li ser Bakur û Rojhilatê Sûriyeyê bêdengin. Ev rewş ji bo welatekî ku îdiaya polîtîkayên bêalîbûnê dike, şerm e. Tirkiye û hevkarên xwe hinek herêmên Bakur û Rojhilatê Sûriyeyê dagir kiriye. Niha jî qada dagirkeriya xwe berfireh dike. Li herêmê politikaya qirkirina etnîkî û dagirkeriyê tê meşandin. Ev mijareke mafên mirovan û yasayên navdewletî ye û divê dawî li bikaranîna hêzê were.”
‘PIŞTEVANIYA BI ROJAVA RE XURT BIKIN’
Parlamentera KPO’yê Sarah Pansy anî ziman ku gelê Rojava tiştên mezin bi ser xistine û wiha dawî li axaftina xwe anî: “Di têkoşîna li dijî DAÎŞ’a terorîst de bi biryar tevdigerin. Nîşan dan ku di şert û mercên dijwar de jî ji bo avakirina civakek azad, demokratîk û wekhevî dikare xebat were meşandin. Divê piştevaniya bi Rojava re hîn bêhtir bê xurtkirin.”
‘DEWLETA TIRK HIQÛQA NAVNETEWEYÎ BINPÊ DIKE’
Hevserokên Civaka Azad Ciwan Ş û Dîlan K jî axivîn û wiha gotin: “Divê dewleta Tirk ji êrîşên bi salan ên li dijî sivîlan û binesaziya sivîl û sûcên şer ên din ên li Bakur û Rojhilatê Sûriyeyê û Başûrê Kurdistanê kiriye, berpirsyar bê dîtin. Dewleta Tirk bi êrîşên xwe yên li ser qadên sivîl hiqûqa navnetweyî binpê dike. Li gel êrîşa leşkerî ya nû, dewleta Tirk pêleke nû ya zextê li nava welat da destpêkirin û ji 1’ê Cotmehê û vir ve bi awayekî keyfî bi sedan siyasetmedarên Kurd girtin û avêtin zindanan.
EM JIYANEK BÊ RÊBER APO QEBÛL NAKIN
Em bang li saziyên navneteweyî û raya giştî dikin ku ji bo çareseriya siyasî û azadiya hemû girtiyên siyasî, nûnerê rewa yê Tevgera Kurd Abdullah Ocalan bikevin nava liv û tevgerê. Dem dema azadiya Rêber Apo hatiye. Pêwîste her kes erka xwe bi cih bîne. Em jiyanek bê Rêber Apo tu carî qebûl nakin.”
Piştî axaftinan girseya gel bi dirûşmeyên “Bijî Serok Apo”, “Bê Serok jiyan nabe” û “Bijî berxwedana Rojava” heta qada Residenplatzê dest bi meşê kirin.
