BEHDINAN – Dîmenên ku dema artêşa Tirk a dagirker 13’ê Tîrmehê di saet 10.12’an de bi bombeyên taktîk nukleer êrîşî çeperên gerîla yên li Qada Berxwedanê Girê FM a li herêma Rojavayê Zapê ya Şehîd Delîl a girêdayî Herêmên Parastinê yên Medyayê dike, gihiştin ANF’ê. Dîmen ji aliyê gelê herêmê û gerîlayan ve hatin kişandin. Di dîmenan de bandora teqîna bombeya taktîk nukleer tê dîtin.
Navenda Ragihandin û Çapemeniyê ya HPG’ê di daxuyaniya xwe ya 14’ê Tîrmehê de ev tişt diyar kiribû: “Artêşa Tirk a dagirker 11 û 13’ê Tîrmehê bi bombeyên taktîk nukleer ên qedexe, rojavayê û rojhilatê Zapê bombe kiribû. Dengê bomberdûmanan di kîlometre dûrahiyê de hatibû bihîstin û bandora teqînê li derdoreke gelek fireh belav bûbû.”
Fermandarê Biryargeha Navenda Parastina Gel Mûrat Karayilan jî roja 12’ê Tîrmehê di nirxandinên dayî ajansa me de, bal kişandibû ser çekên qedexe yên ku artêşa Tirk bi kar tîne û ev tişt gotibû:
“Hema bibêje 2 sal û nîv in bi sed hezaran bomberdûman li vê qadê hatin kirin. Her cure madeyên kîmyewî hatin ceribandin. Bombeyên termobarîk hatin bikaranîn; bombeyên fosfor hatin avêtin û herî dawî bombeya ku tenê li envantera welatên endamên NATO’yê tê dîtin û encex bi erêkirina NATO’yê dikare were karanîn, li Zap, Avaşîn û Metînayê li hemberî hêzên me hat bikaranîn.”
Êrîşên artêşa Tirk a dagirker ên bi bombeyên taktîk nukleer, piştî civîna NATO’yê zêde bûne û ev yek bal dikişîne.
