BEHDINAN – Gerîlabûyîn tê wê wateyê ku dema ji bo welatekî tê gotin ‘her tişt li vir qediya’ rabe û bibêje ‘ez li vir im’. Di rewşeke welê de ku her kes ji ber zext û zilma tirsê bêdeng bûne, qîrîna ji bo rûmeta welatekî ye. Gerîla rabûna li ber zilmê ye, mîna dara şoreşê ye. Mîna Devrîm e, dilên mîna şoreşê ye. Devrîm di sala 1999’an de li Êlihê ji dayik bû. Ji malbateke koçer bû. Li kolanên Êlihê ji destanan hînî Egîd bû. Welatparêzî kete nava rehên wî, bi rengê Egîdî hêrs li dijî dijmin mezin kir di dilê xwe de. Berê xwe da çiyayên Kurdistanê.
DESTPÊKÊ BERÊ XWE DA ŞOREŞA ROJAVA
Tevî ku berê wî li çiyayên Kurdistanê bû, ji ber bûyerên giran ên wê demê yên Şoreşa Rojava li dijî zilma DAÎŞ’ê xwest bibe şoreşgerê azadiyê yê gelê xwe.
JI WIR DERBASÎ ÇIYÊ BÛ
Sala 2017’an dema ku xwe gihand çiyê, li herêma Avaşînê hate wezîfekirin. Di demê herî giran ên şer de li dijî dagirkeran li nava Zagrosan yekîneyên gerîla meşand. Bi serbilindî, bi rûmet li Zagrosan meşiya.
EM HENE Û EW Ê NEBIN
Zagrosan di Nîsana 2021’ê de careke din xwe ji şerekî giran re amade dikir. Yên ku mîrateya têkoşerên rê nedidan dagirkeriyê dewr wergirtin, ji bo serketina vî şerî taktîkên nû diafirandin. Gerîlayan mîna ku bi neynûkên xwe bikolin, li çiyê çeper û tunel ava dikirin. Devrîm jî yek ji van afirînerên serketinê bû. Li Werxelê ku berxwedana herî bi rûmet a dîrokê lê pêk hat, tevî Cûmalî, Çavrê û Mahîran çeper amade dikir. Wê demê ku dijmin xwe nêzî tunelên şer dikir, ev gotin ji dilê wî diherikî; ‘Tiştekî bi rengê em û ew nîne, tenê em hene, tiştek ji wan re nîne’.
120 ROJAN RÊ NEDAN
Devrîm yek ji milîtanên xwedî exlaqa Apoyî bû ku tenê tiştên dikir digot, tiştên digot jî dikir. Ji ber vê yekê di Berxwedana Werxelê ya 120 rojan de li tunelên şer pêşengî kir. Bi wêrekiyeke ku tirs bi xwe ditirsand, dagirker ceza dikir. Devrîm piştî Berxwedana Werxelê baştir fêhm kir ku şûrê şer bi îrade, bawerî û tolhildanê bêhtir tûj dibe. Piştî vî şerî li Avaşînê ku şert û merc girantir bûbû, kar dewam kir. Weke Fermandarê Herêmê di sala 2022’an de derbasî qada Mamreşo bû. Li vê derê fermandarî ji tîmên bi tevger ên gerîla re kir û gelek çalakî pêk anî.
ROJ WÊ BÊ, XWÎN JÎ WÊ ZIWA BIBE
Artêşa Tirk di Nîsana 2022’an de careke din dest bi êrîşên dagirkeriyê kir. Devrîm vê carê li tunelên şer ên Şehîd Têkoşer ên qada Werxelê li ber xwe dida. Bi saya tecrûbeyên xwe yên şerê tunelan, vê carê hîn bi tecrûbe, pêşdîtî û xwînsar bû. Mîna ku henekê xwe bi dijmin û mirinê re bike çalakî pêk dianî, baş zanîbû ku kengî derba giran li dijmin bixe. Di pêvajoya şerê tunelan de, li ser taktîkên gerîlatiya serdema nû kûr bû û bi hostatî xiste meriyetê. Dema ku li tunelên şer ên Şehîd Têkoşer di berxwedanê de bû digot, ‘Êdî xwîna me jî heta dilopa xwe ya dawî nîne, roj wê bê xwîn jî wê ziwa bibe. Em ê êdî heta parçeyê dawî yê hestiyên xwe li ber xwe bidin’.
BÊ RAWESTAN ŞER KIR
Fermandar Devrîm heta sala 2023’an hem li qadê hem jî li tunelên şer, li her bihosta xaka Avaşînê şer kir, ked da, birîndar bû û pêvajoyên gelekî zehmet ji holê rakir. Rojekê jî ji ber şert û merc, ji ber şer, ji ber birçîbûnê, ji ber bêxewmayinê gilî û gazin nekir.
FERMANDARIYA EYALETÊ DEWR WERGIRTIBÛ
Ew ciwanê ku li Êlihê dixwest bibe mîna Egîd, niha di şerê herî giran de, li Avaşînê ku berxwedaneke bi heybet lê dihate meşandin Fermandarê Eyaletê bû. Ala ku ji Cûmaliyan wergirtî nehişt bê xwarê. Bi ruhê pêşeng ê serketinê şer kir û gelek caran mirin kuşt. Di 7’ê Hezîrana 2023’an de ber bi şehadetê ve meşiya.
