KOBANÊ – NPG’ê di 18’ê Cotmehê de daxuyaniyek da û nasnameya 17 gerîlayên ku di êrîşên çekên kîmyawî yên dewleta Tirk a dagirker-qirker de şehîd bibûn eşkere kir. Ji nava wan gerîlayên azadiyê ku şehîd bûne, du gerîlayên ji bajarê Kobanê şehîd Erdal Besta (Muhammed Xelîl) û şehîd Demhat Têkoşîn (Bahadîn Ahmet) hebûn.
Xizmên herdu şehîdên azadiyê jî ji me re axivîn û diyar kirin ku divê ciwan tola van şehîdan rabikin û ewê heya dawiyê li ser têkoşîna nirxandar a van lehengan dewam bikin.
HER DEMA BIÇÛK JÎ BÛ FERMANDAREK BÛ
Di serî de Apê şehîd Erdal Besta anî ser ziman ku şehîd Erdal her dema biçûk jî bû xuya dikir ewê bibe fermandarek û got; “Navê min Ferhadînê Qeremûx e, ji bajarê Kobanê me, apê şehîd Erdal im. Şehîd Erdal kesayetekî drust, bi hêz û xwedî îrade bû. Cihê xwe di şerê Kobanê de jî girt. Ji kesayeta wî diyar bû ku wê mêrxaz û egîd derbikevin, her riya fermandariyê dişopand. Heval Erdal di encama êrîşên bi çekên kîmyawî yê dewletê Tirk a hov de, ku li ser zarok û ciwanên me dike şehîd bû. Êrîşî Kurdan, hevalên me û ciwanên me dike û dinya hemû li hember wî bê denge û çavên xwe li ber êrîşên wî digirin. Dijminê me dijminekî terorîste, dixwaze şoreşa me ya Rojava jî bixetimîne û wê tune bike. Hemû çek û amûrên ku di nava qanûnên cîhanî de qedexe ye li ser me Kurdan bikar tînin. Dema ku di Başûrê Kurdistanê de jî hatî bikaranîn dîsa ser Kurdan bû, îro jî li ser me û ser gerîla ev çek tên bikaranîn. Yek jî wî şermezar nakin û li pêşiya wî nabin asteng. Pêwîste dewleta Tirk bajarê Kobanê ji bîr neke, bajarê Kobanê ya ku weke erdnîgarî biçûk e, îro bûye xwedî hêz û îrade û ji bo Sûriyeke demoqratîk têkoşîn dike.”
DAYÎKÊN ŞEHÎDAN, DAYÎKÊN BERXWEDANÊ NE
Ferhadîn axaftina xwe domand û got; “Dayîkên 17 gerîlayên ku şehîd bûne ji bo me mînak in, ji ber ku ew dayîkên berxwedanê ne. Eger ew dayîk bi tenê jî bimînin wê van êrîşên kîmyawî bi berxwedana xwe bisekinîn in. Wê di pêşengtiya wan dayîkan de şoreşeke azad û berxwedêr bi pêş bikeve. Şoreşa Rojava jî xwe bi hêza van dayîkên şehîdan berdewam dike.”
WELATÊ ME KURDISTAN E, HÊZA ME JÎ GERÎLA YE
Herî dawî Ferhadîn diyar kir ku ger Kurdek dixwaze azad jiyan bike, divê ew xwedî li şehîdan xwe derbikeve û di Kurdistanê de bimîne; “Welatê me Kurdistan e, hêza me jî gerîla ye. Bila kesek xwe nexapîne û nebêje ezê biçim Ewrupa jiyana keyîfî ji xwe re jiyan bikim, çiqas jiyan bike nikare bi rihetî jiyan bike, ji ber ku ew der ne welatê wî ye û nikare li wê derê jiyan bike. Ger dema tu dev ji axa xwe berdî tu dev ji xwe berdidî. Bila em bi xwe ji dijmin re zemînan çênekin. Li ser axa xwe jiyan bikin û bila dijmin hesabê hebûna we bike. Ger dijmin hesabên xwe derbarê me de neke, wê demê em tune ne. Ger ew dixwazin azad jiyan bikin, ancax dikarin azadiyê di şexsê heval Erdal û 16 hevalên wî yên din de bibînin. Em ji bilî li axa Kurdistanê nikarin azadiyê li cihekî din peyda bikin.”
GELEKÎ JI JIYANA GERÎLA BANDOR BIBÛ
Heman demê de kurê apê şehîd Demhat jî diyar kir ku heval Demhat ji jiyana gerîla gelekî bandor bibû û her daxwaza wî ya tevlîbûnê hebû; “Navê min Celal e, ez pismamê (Kurê Apê wî ye) şehîd Demhat im. Heval Demhat beriya ku tevlî bibe di sala 2017’an de hate gel me, me bi hevre kar dikir. Bandora hevalan gelekî li ser heval Demhat hebû, hertim wêneyên wan mêze dikir. Hertim digot ezê tevlî bibim, ji bo wê jî dîsa vegerî hate bajarê Kobanê û piştî çend mehan agahî hat ku ew tevlî nava refên gerîla bûye.”
BIKARANÎNA ÇEKÊN KÎMYAWÎ BÊ HÊZIYA DEWLETÊ YE
Celal axaftina xwe bi van gotinan bi dawî kir; “Beriya çend rojan jî ji me re agahî hat ku ew li çiyayên Kurdistanê şehîd bûye. Dewleta Tirk li dijî wan çekên kîmyawî bikartîne. Cesareta wî nîne ku li hember gerîla bisekine û pê re şer bike. Ji bo vê jî tiştên ku di zagonên navnetewî de qedexe ne, wan li dijî gerîla bikartîne û gerîla şehîd dixe. Ev jî nîşan dide ku dewleta Tirk a faşîst bê hêz e, ji xwe PDK’ê jî riya wî hêsan dike. Pêwîste ciwanên tevahî Kurdistanê xwedî li tolhildana wan şehîdan derbikevin.”
NC// Dıjwar Firat
