NAVENDA NÛÇEYAN – Xweziya li Zapê bama, şikeftek ji evîndarên azadiyê re bama,bibama şikefteke ku zinarên wê bilind in tunelên wê kûr in. Di nava vê şikeftê de ez bibama kaniyeke zelal û biketama hinava pekrewanan. Xweziya li Zapê bama.
Min xwe dikir ewrên reş û tarî, min xwe dixist nav dilê dijmin û ez dibûm tirsa xewnên heresê dijminê xwînxwar. Min xwe dikir baran û ez dibûm mertal li ber gerîlayên qehreman. Min xwe dikir tirêjên rojê û her tîrek min dibû mizraq, diket ser mêjiyê dijmin.
Xweziya li Zapê di bin lingên meqaba soran de bibama tolerêgeyek ,di her pîçekî de, min gulek bidaya wan pakrewanan. Gulek sor di sora şoreşê de, gulek sor di bedewbûna Zapê de. Ey Zapa evîndara gerîlla! ev bedewbûna te diteyîsîne bejn û bala gerîlla, an te bedewbûna wan ji wan diziye? Ez di bedewbûna te de gerîlatiyê dibînim, her awirek gerîla bi qasî çiyayê te asê ye, her kenek wan bi qasî gulên te rengîn e, di her fermêskeke wan de rûbarên te dibînim. Wan bi xemla te xwe xêz kirine te bi rihê wan xwe afirandiye.
Zap zap e, zap ne tenê çiyayek e. Zap gelekî serhildêr e. Zap navê gelê çiyayî yê Gotiyan e. Zap bangawaziya azadî û serkeftinê ye. Ev evîna azdiya ku dilê ciwanan geş dike ye. Bi bedewbûna xwe ya bakîr ji bo her ciwanekî serinckêş e û balkêş e. Bi agirê wê yê bilind gerîlayan li dora wê govend gerandiye . Ji qilanên yekem heya serdema gerîlayên nûjen agirê li ser lûtkeyên Zapê venemiriye.
Tu kesî nekariye agirê lûtkeyên Zapê vemirîne. Ev bûye cih û warê ku destê neyaran negihiştiyê . Yek ji çiyayên Bakurê Kurdistanê ye. Ji bo wê her rihekî Bakur maye rûyê xwe daye Zapê. Her ciwanekî kurd ku rihê wî Bakurî bûye rêwiyê Zapê. Ji ber ku azadî di rihê Bakur de şîn dibe û di lûtkeyan de mezin dibe. Zap dibe lûtkeya azadiyê ku hilkêşîner e, Zap dibe serbilindî ku tu carî natew e. Ey Zapê binêr e!, 5 mehe ne li wan deştan û gundan bi hezaran dil di carekî de ji bo te davêjin. Guh bide, kilamên evînê ji bo te bûne yek deng , kal û pîran û dayîkên şehîdan qibleya xwe dane rûyê te. Zarok bi sitrana Zapê mezin dibin. Êdî tu bûye xewn û xeyalên zarokên rojê. Tu bûye evîna jinên kurdan. Ji bo wî hemû hêz û hêrsa vê gelî li dora te kom bûye.
Tu bûye tirsa dilê dijmin. Ji ber ku tu bûye tirsa dilê wan, êdî xewnên şîrîn li wan heram bûne û berê xwe dane bedewbûna te.Wan xwînxar û mijokdaran ji dîroka xwe ders wernegirtine. Bi tank û topan, bi balafir û jehran êrîş dikin ser wan bedewan. Lê nizanin Zap ji dagirkeran re rê nade. Deriyên Zapê ji dijmin re girtiye. Ji ber ku kilîta çiyayên Zapê di nava dilê gerîla de veşartiye. Zap bi hezaran gerîla re malawanî kiriye. Her gerîlayek ku rêwîtiya Bakûr kiriye şevekê ji şevan bûye mêvanê Zapê. Zapê bi heybeta xwe û bi bedewbûna xwe ew pêşwazî kirine. Lê haya wan ji wan nebûye ku Zap dilê wan ji wan diziye û kilîta deriyên xwe di dilê wan de veşartiye. Ji ber wê ye her zinar û latên Zapê ji gerîla re dibin cih û war ji dijmin re dibin merzel. Her kaniyek ji gerîla re dibe zemzem, ji dijmin re dibe jehr. Her darek û kevirek ji gerîla re dibe senger ji dijmin re dibe sitirî. Her lûtkeyek ji dijmin re dibe kapos, ji gerîlla re dibe zafer.
Êdî dem hatiye em bigihîjin hevdu. Ey Zapê!Xwezî têr nebim ji hesreta sedan salî .Heger jiyanek hebê wê di lûtkeyên te de azad bibe. Heger qîret hebê wê di hewraziyên te de bibê. Ma ne ew qîrete di nav agir de bi agir re şer dike. Ma ne ew ğîrete di nav jehr da dibe dujeh. Ez heyrana ev ğîreta te bume. Ez jî dixwazim bibim rêwiyê riya te, ez jî dixwazim bibim gerîlayê serdema zapê. Heger hevaltî hebê wê bi te û hevrêyên te re be. Kena herî bedew di ruyê wan de ye, hêrsa tewra mezin di awiran de ye, heskirina bi dil di fikra wan de û serkeftina teqez di vîna wan de ye.
Em destên xwe bigihînin destê gerîllayên Zapê. Em hêrsa xwe bi hêrsa wan re bikin yek. Ey Zapê! dem hatiye ku em xwe bigihînin lûtkeyên te. Dijmin li kuderê werê bila bê, dixwaze li ezman dixwaze li erdê bê, dixwaze bi tanq ,dixwaze bi top an bi jehr an nukler be. Êdî dawiya wî ye û ew ji bo dawîbûna xwe hatiye,dem hatiye em wî dijminê hov di ava Zapê de bifetisînin.
Dem hatiye li keleha Zapê dengê tilîlîyên serkeftinê bilind bibin. Wê xeyalên me li Zapê bigihêjin serkeftinê.Û Li ser çiyayên Zapê wê 2 merzel bên kolandin: merzelek ji xayîn û nukeran re bê kolandin û merzelek ji faşîzmê re bê kolandin. Wê li ser binivîse ku xiyanet û nukerî li Kurdistanê binax bûye û Osmaniya xeyalî û faşîzim li vê derê miriye.
