ZURÎCH – Li bajarê Zurîchê yê Swîsreyê, bi pêşengiya Tifaqa Ni Una menos ku Yekîtiya Jinên Kurd a Swîsreyê jî di nav de 156 sazî û tevgerên jinan di nav de ne, li dijî qirkirina jinê meşek hate lidarxistin.
Di şexsê jinên ku bi tundiya mêr hatin qetilkirin, bang li hikumeta federal a Swîsreyê hate kirin ku biryarên Peymana Stenbolê bi cih bîne. Zêdeyî hezar jin bi vê armancê li Helvetiaplatzê li hev civiyan.
Tifaqê xwest ku pênaseya qirkirina jinê bê naskirin û di qanûna ceza de bê bicihkirin. Her wiha ji bo têkoşîna li dijî tundiya li jinan hikumeta federal piştgiriyê bide.
Di çalakiyê de dirûşma “Jin, jiyan, azadî” jî hate qîrîn.
Jin piştî ku li navenda bajêr meşiyan, li Helvetiaplatzê vegeriyan û daxuyanî dan.
Endama Yekîtiya Jinên Kurd a li Swîsreyê Ozen Aytaş qala tundiya mêr û dewletê ya li Tirkiyeyê, têkoşîna jinên Kurd a li dijî vê yekê kir û got, “Em jinên Kurd, em ê têkoşîna xwe bi têkoşîna jinan a cîhanê re bikin yek, bi vî rengî jiyana mirovî, jinan û xwezayê ji xwe re bikin esas û li dijî komkujiyan têkoşîna xwe dewam bikin.”
