STENBOL – Parazvanên mafên mirovan diyar kirin ku girtîgeh li dijî vîrûsa corona bi talûkeyê re rû bi rû ne û xwest tedbîr bên girtin. Parazvanan diyar kirin ku dema li rastiya girtîgehan dinerin tu tedbîr nehatiye girtin û bi vê yekê girtî bi mirinê re rû bi rû hiştine.
Vîrûsa corona ku li Çinê derket holê li hemû cîhanê belav bû. Piştî vîrûs li cîhanê belav bû, Rêxistina Tenduristiyê ya Cîhanê (WHO) vîrûs wekî “pandemi” (şewba kurevî) pênase kir. Li cîhanê zêdeyî 7 hezar mirov bi vîrûsê mirin. Li Tirkiyeyê jî li gorî daneyên Wezîrê Tenduristiyê Fahrettin Koca 47 kes bi nexweşiya vîrûsê ketin. Piştî ev nexweşî li Tirkiyeyê belav bû, hevdîtin û ziyaretên bi girtiyan re qedexe kirin. Vê yekê bêtir fikarên parazvanên mafên mirovan û malbatan ên ji bo girtî û girtîgehan zêde kir.
Têkildarî tedbîran Endamê Komîsyna Girtîgehan a Şaxa ÎHD’ê Mehmet Acettin û Xebatkara Tora Tenduristiyê ya Komeleya Civaka Sivîl a Pergala Ceza (CİSST) Jîyan Ay nirxandin kir.
Endamê komîsyona Girtîgehan a Şaxa ÎHD’ê Mehmet Acettin, diyar kir ku girtîgeh di bin rîskek gelek mezin de ne û wiha got: “Li girtîgehên Tirkiyeyê binpêkirina mafan pir zêde ye. Ger ku ev nexweşî li girtîgehekê belav bibe, dê hovîtiyek pir mezin pêş bikeve. Ji ber vê yekê her çend Wezîrê Dadê bêje ‘Em tedbîran digirin’ jî em dema li rastiya girtîgehan dinerin em ji vê yekê bawer nakin. Rastiya girtîgehan li ber çavan e. Qedexe û sînorkirina ziyareta malbatan a bi girtiyan re girtiyan terkî mirinê dikin. Divê bi lez girtî tev bên berdan. Di serî de divê girtiyên nexweş serbest bên berdan. Divê girtiyên din jî cezayên wan bên taloqkirin. Ger ku girtî neyên erdan jî divê teqez bi lez hemû girtîgehan bi rêk û pêk dezenfektan bikin. Divê girtîgeh pir paqij bin. Divê hemû alav û amûrên paqijiyê bê pere li girtiyan bê belavkirin. Dîsa divê li xwarin û vexwarina girtiyan baldar bin. Divê xwarina baş û bi qalîte bidin girtiyan.
Xebatkara Tora Tenduristiyê ya CÎSST’ê Jîsyan Ay jî anî ziman ku her çend Wezareta Dadê bêje girîgehan bi rêk û pêk dezenfekte dikin jî agahiyên ji wan re tên şandin, dijberi vê yekê ne. Ay, da zanîn ku dema xwarinê dîsa li heman salonê bi hevre xwarin dixwin û wiha got: “Li gorî agahiyên gihiştin destê me, li girtîgehan tu tedbîr nehatiye girtin. Ev rewş tenduristiya civakê ye. Ji ber vê yekê divê bi lez li girtîgehan tedbîr bên girtin. Divê rayedar malzemeyên paqijiyê bidin girtîyan. Gelek girtî ji ber rewşa wan a maddî nebaş e, nikarin bi pereyên xwe malzemeyên paqijiyê bistînin. Divê bi lez tedbîr bên girtin û ev yek çareser bibe. Malbatên girtiyan bi fikar in. Malbat xwedî maf in der barê xizm û zarokên xwe de bibin xwedî agahî. Divê ev yek neyê astengkirin. Malbat diyar dikin ku heta niha daxuyaniya wezaretê neketiye pratîkê. Malbat xwedî fikar in.
Ay, anî ziman ku gardiyan jî di bin rîskê de ne û xwest gardiyan hem ji bo xwe û hem jî ji bo girtiyan tedbîrên girîng bistînin. Ay, anî ziman ku gardiyanên ji derve vîrûsê bigirin dikarin bigînin girtiyan û ev yek talûkeyek mezin bi xwe re tîne û wiha got: “Niha ji bo personelên tenduristiyê çawa tedbîr tên girtin, divê ji bo gartiyanan jî heman tedbîr bên girtin.”
ÇAVKANÎ: MA (Ajansa Mezopotamya)/ Nacî Kaya
