BEHDÎNAN – Endamê Komîteya Rêveber a PKK’ê Dûran Kalkan destnîşan kir ku ji 7 heta 70 salî divê civak şervan be, xwe biparêze û got, “Divê jiyana me ya aborî, civakî û çandî li ser bingeha xweparastinê be. Em ê xwe li ser bingeha îdeolojîk, siyasî, leşkerî perwerde bikin, bi rêxistin bikin. Em ê sîstema xwe ya xweparastinê pêk bînin û bêyî li benda kesî bimînin em ê mal, gund, tax, kolan, bajarok, zevî, herêm, bajarê xwe biparêzin. Eger pêwîstî pê hebe em ê bi lehengî şer bikin û fedakariyê bikin.”
Endamê Komîteya Rêveber a PKK’ê Dûran Kalkan bi wesîleya salvegera 41’ê ya damezrandina PKK’ê bersiv da pirsên ANF’ê.
Kalkan di beşa duyemîn a hevpeyvînê de bi taybetî kêmasiyên di nava 10 salên dawî yên têkoşînê de rû dan nirxand.
Kalkan destnîşan kir, ji ber ku di nava 10 salê dawî de bi Stratejiya Şerê Gel ê Şoreşgerî tênekoşiyan nekarîn siyaset û zîhniyeta faşîst û qirker têk bibin û got, “Eger bi rastî jî me karîbûna guhertina stratejîk bi lez kiribûna, li gorî Stratejiya Şerê Gel ê Şoreşgerî xwe bi rêxistin kiribûna û şerê xweparastinê li her deverê pêk bianiya, niha rêveberiya Erdogaln têk çûbû. Ji ber ku em nekarî welê bike temenê rêveberiya Erdogan dirêj bû. Niha hewl dide hîn bêhtir êriş bike. Em bala xwe bidin ser; êrişî Başûr dike, êrişî Rojava dike. Ya rast bêyî ku bikeve van deveran hemûyan derfet hebûn ku li Bakur rêveberiya Tayyîp Erdogan bê têkbirin, siyaset û zîhniyeta wî ya faşîst û qirker bê têkbirin.”
Kalkan her wiha got, “Di vê nuqteyê de divê mirov du tiştên din jî bînin ziman. Jin, ciwan, karker, kedkar, civaka Kurd divê vê yekê rast zanibe; Çareseriya pirsgirêka Kurd hêsan nîne. Her wiha jiyaneke azad, wekhev û demokratîk li dinyayê, xwerêvebirin hêsan nîne. Dinya ji aliyê hêzên yekdestî yên desthilatdariya dewletperest ve hatiye parvekirin. Sîstema herî giran a zext û mêtingeriyê hatiye avakirin û vê sîstemê Kurdistan parçe kiriye, Kurd ji nedîtî ve hatiye û dixwaze tine bike. Sîstemeke qirker e. Rewşeke ji rêzê nîne. Ji bo tinekirina hebûna gelê Kurd sed sal in êrişên qirkirinê dike, komkujiyan dike, asîmîlasyonê dike, demografiyê diguherîne, ji çar aliyên dinyayê mirovan kom dike, li şûna Kurdan bi cih dike. Kurdan ji Kurdistanê derdixîne û dibe Stenbol, Îzmîr, Çûkûrova, Ewropa û Emerîkayê. Ji civakên Tirkî tînin li Kurdistanê bi cih dike. Ji Balkanan, ji Ereban mirovan li Kurdistanê bi cih dike. Dibêjin, ‘Bajarê herî mezin ê Kurdan Stenbol e’. Ev rewşeke baş nîne, rast nîne, eger hatibin tiştekî baş nîne. Eger Kurdistan bi kêr hatî nebe çima ewqas mirovan li çar aliyên dinyayê kom dikin û li Kurdistanê bi cih dikin? Kurdistan bihişta dinyayê ye. Nabe ku em dest ji bihiştê berdin û ji hev belav bibin.”
‘NABE KU HÊVÎ JI QIRKER Û KUJER BÊ KIRIN’
Kalkan got, “Ti wateya gotina ‘Çima Emerîka, Ewropa, Rûsya me rizgar nake’ nîne. Yên ku Kurdistan parçe kirin, xistine vî halî ji xwe ew in. Yên ku sîstema qirker ava kirine ew in. Nabe ku mirov ji qirker, ji kujer hêvî bikin, nabe ku hêviya rizgariyê ji wan bê kirin. Di vir de şaşitiyek heye. Çima AKP-MHP êriş dike? Çima CHP êriş dike? Çima Îran an jî DAÎŞ êriş dikin? Ji ber ku ev hêz qirker in. Ji aliyê zîhniyet û siyasetê ve bi vî rengî ne û êriş dikin, wê êriş bikin jî. Divê em bi vê zanibin. Rastiya dîrokî bi vî rengî ye. Wê demê eger em dixwazin hebin û azad bin, wê demê divê em li gorî vê yekê tevbigerin. Ev yek jî hişmendî, rêxistinbûn û berxwedana di xeta Neteweya Demokratîk de ye. Rêber Apo ji vê yekê re dibêje ‘Rastiya gelê şervan’.”
Kalkan destnîşan kir ku hêza wan têra vê yekê dike û got, “Mirovên Kurd leheng in, wêrek in, fedakar in, berxwedêr in, şervan in û eger xwe bi rengekî rast zane bike, bi hişmendiya xweparastinê xwe bi rêxistin bike, eger li gund, li malbatê her kesên ku dikarin rahêjin çekê xwe bi rêxistin bike, eger li hemberî êrişan paşve gavê neavêje û ji bo parastina wê deverê bi her rengî li ber xwe bide wê teqez bi ser bikevin. Xweparastin bi vî rengî ye. Divê em nebêjin, ‘Bila Emerîka bê biparêze, bila Rûsya qada hewayî qedexe bike, nebû jî bila gerîla bê. Bila çend hezar ciwan ewlekariya me bike’. Divê civak ji 7 heta 70 salî her kes bibe şervan. Divê her kes endamekî xweparastinê be. Divê em xwe ji aliyê leşkerî ve perwerde û bi rêxistin bikin û dema ku dijmin êriş kir bi rengê gerîla şer bikin. Ji bo parastina xaka xwe pêwîste em vê bikin. Êriş nebû jî divê em jiyana xwe bidomînin. Jiyana me ya aborî, civakî û çandî divê hemû li ser bingeha xweparastinê be. Ewlekarî û parastina me divê xwe bispêre hêza me. Dema ku bi vî rengî be hingî têkoşîna me ya hebûn û azadiyê dikare bi ser bikeve. Hingî em ê karibin li dijî her şêwe êrişên dagirkeriyê xwe biparêzin. Ji ber ku em dikarin li dagirkeran bixin.
Mînak; dagirker niha dikevin nava Rojava. Dikarin bikevin, çekên wan pir in. Em bêjin ew bi kar anîn û dagir kir. Lê belê eger tu li wê deverê rêxistinbûyî be, li herêma xwe tu bi şev û roj li dagirkeran bixe, bike ku nikaribin li wê herêmê bimîne, hingî dikarî dagirkeran biqewirîne. Dema ku te xwe li gorî vê yekê amade kir dikarî vê bike.”
RÊXISTINBÛN Û ŞERÊ LI SER BINGEHA XWEPARASTINÊ
Kalkan diyar kir ku divê ew rastiya berbiçav baş bibînin û got, “Azadî bi xweparastinê dibe. Xweparastin hêza mirov bi xwe ye. Mirov di bin parastina hinekan de azad nabin. Di rewşeke welê de mirov ancax dibin kole, dibin hevkar û teslîmiyet pêk tê. Eger em dibêjim em ê azad bin hingî divê xwe bi xwe biparêzin. Ji bo wê jî li ser bingeha îdeolojîk, siyasî û leşkerî em ê xwe perwede û bi rêxistin bikin. Em ê sîstema xwe ya xweparastinê xurt bikin û li hêviya kesî nesekinin, em ê mal, gund, tax, kolan, bajarok, zevî, herêm û bajarê xwe bi xwe biparêzin, xwe bigihînin wê asta rêxistinbûyî. Her wiha dema ku pêwîstî pê hebe em ê bi lehengî şer bikin û bi wêrekî fedakariyê bikin, li dijî her şêwe êrişan sekneke leşkerî nîşan bidin, ji 7 heta 70 salî jin û ciwan tevahiya civakê em ê bi vî rengî tevbigerin. Pêwîstî bi vê yekê heye. Bi vî rengî pêkane. Nabe ku em bêjin nayê kirin. Berê civak bi vî rengî azad bûn. Her wiha jin jî bi vî rengî azad bûn. Hebûneke azad li derveyî vê ykeê nîne. Wê demê eger em dixwazin azad bin hingî rêya azadiyê bi vî rengî ye. Belê em dibêjin, hebûna azad pêkane, lê ev jî bi xweparastin û rêxistinbûn û şerê li ser vê bingehê dibe. Divê em xwe bi hêza xwe biparêzin.”
