NAVENDA NÛÇEYAN – Sîdad Şîrzad, parêzerê Mîhrab Abdullahzade, ku di dema xwepêşandanên “Jin, jiyan, azadî” de hatibû girtin û cezayê darvekirinê lê hatibû birîn, ragihand ku Abdullahzade bi rewşeke ku jiyana wî di xetereyê de ye re rû bi rû ye.
Parêzer Sîdad Şîrzad X di parvekirinek li ser medyaya sanal de diyar kir ku Mîhrab Abdullahzadeh ê ji Rojhilat ku cezayê darvekirinê di Kanûna 2025an de hatiye pesendkirin, bi xetereyeke cidî ya darvekirinê re rû bi rû ye. Şîrzad di parvekirina xwe ya derbarê Abdullahzadeh de, ku di dema xwepêşandanên “Jin, jiyan, azadî” de piştî kuştina Jîna Emînî hatibû girtin û zindanîkirin, got, “Mîhrab Abdullahzade bi xetereyeke cidî ya mirinê re rû bi rû ye. Serlêdana wî ya ji bo ji nû ve darizandinê, ku di 19ê Kanûnê de hatibû kirin, di 27ê Sibatê de ji aliyê Şaxa 39an a Dadgehê ve hatibû redkirin, û tevî serlêdaneke din a di 18ê Sibatê de, Şaxa 39an red kir ku fermana rawestandina darvekirinê bide.”
ÇI QEWIMÎ?
Mîhrab Abdullahzadeh di payîza 2022an de ji ber beşdarbûna di xwepêşandanên “Jin, jiyan, azadî” de ku piştî mirina Jîna Emînî, jineke Kurd ku di Tebaxa 2022an de ji aliyê “polîsên exlaqê” yên Îranê ve hatibû kuştin, dest pê kir, hat girtin û xistin zindanê. Piştî girtina wî, Abdullahzadeh birin Girtîgeha Navendî ya Urmiyê. Doza wî li Şaxa 1emîn a Dadgeha Şoreşê ya Urmiyê, ku ji aliyê Dadwer Necafzade ve dihat birêvebirin, dest pê kir û bi tohmeta “Bexî” (endamtiya di komên ku çalakiyên çekdarî li dijî hikûmeta Îslamî dikin) cezayê darvekirinê lê hat birîn. Cezayê darvekirinê yê li dijî Abdullahzadeh, ku bi kuştina endamekî hêzên Besîc ên girêdayî Pasdaran dihat tawanbarkirin, di Kanûna 2025an de ji aliyê Odeya 9an a Dadgeha Bilind a Îranê ve hat pejirandin. Piştî vê biryarê, ku di 18ê Kanûna 2025an de bi fermî ji Abdullahzade re hat ragihandin, parêzvanên mafên mirovan li Rojhilat daxwaza çalakiyên bilez ji bo piştgiriya Abdullahzade kirin.
