ŞENGAL – Meclîsa Xweseriya Demokratîk a Şengalê (MXDŞ) li ser êrişa dewleta Tirk a dagirker a doh li dijî Meclîsa Gel a Sinûnê kir, daxuyaniyek da.
Meclîsê diyar kir ku di êrişê de zarokek şehîd bûye û 7 kes jî birîndar bûne, ku birîna hin ji wan gelekî giran e.
Di daxuyaniyê de hate gotin, “Di encama êrişa dewleta Tirk a dagirker de ya li ser Meclîsa Gel a Sinûnê zarokê bi navê Selah Nasir şehîd bû. Em sersaxiyê ji malbata Nasir Xidir Naso re dixwazin. Her wiha ji birîndaran jî şîfa xêrê dixwazin.”
Meclîsê bal kişand ser plan û zexta neyaran a li ser Şengalê û destnîşan kir ku di serî de dewleta Tirk û hevalbendên wê bi planên qirêj hewl didin îrade û destketiyên gel tune bikin.
Di daxuyaniyê de hate ragihandin ku dewleta Tirk a qirker van planan bi hevkariya PDK’ê û hin kesên li nava hikumet û artêşa Iraqê dimeşîne û wiha dewam kir, “Dezgehên Parastinê yên PDK’ê bi îstîxbarata Tirk dest bi zext û zordariyê kirin ku xelkê Şengalê dest ji mafê xwe yê rewa, sazî û dezgehên xwe berde. Ji ber ku bi van zextan negihişt armanca xwe, dest bi êrişên hewayî kirin.”
Meclîsê bal kişand ser êrişa bombeyî ya li ser Meclîsa Gel a Sinûnê û diyar kir ku di encama vê êrişê de zarokê 12 salî Selah Nasir şehîd bû, endamên meclîsa giştî, rojnamevanek û endamên meclîsa gel a Sinûnê jî di nav de 7 kes birîndar bûn. Di nava birîndaran de hinek ji wan rewşa wan giran e.”
Di daxuyaniyê de karên Meclîsa Gel a Sinûnê ya ji bo çareserkirina pirsgirêkên civakî hate bibîrxistin û hate ragihandin ku ji ber van karên xwe yên serketî êriş bi zanebûn li hemberî meclîsê hatiye kirin.
‘PDK HEWL DIDE LI ŞENGALÊ TEVLÎHEVIYÊ ÇÊBIKE Û HERÊMÊ VALA BIKE’
Bi dewamî işaret bi hewldanên PDK’ê yên ji bo tevlîhevkirin û valakirina Şengalê jî hate kirin û hate gotin, “Van demên dawî PDK bi gelek awayan hewl dide ku tevlîheviyê li Şengalê çêbike, Şengalê vala bike û gel ji Rêveberiya Xweser dûr bixe. Bi vî rengî hewl dide pîlana 9’ê Cotmehê pêk bîne. Senaryoya vê êrişê û hewldanên PDK’ê yên piştî êrişê ji mêj ve hatibûn amadekirin.
Di daxuyaniya meclîsê de hate ragihandin ku Dezgeha Îstîxbaratê ya PDK’ê Parastin û MÎT a Tirk beriya êrişê li Hewlêrê li hev rûniştin, li ser Şengalê pîlanên nû nîqaş kirin û wiha dewam kir:
‘PDK BI RÊYA ÇEND KESÊN KIRÊKIRÎ HEWL DA PROVOKASYONÊ BIKE Û GEL LI BER HEV RAKE’
“Piştî êrişa li ser meclîsa gel a Sinûnê jî senaryoya wan hînê dewam dike. Çend kesên kirêgirtî hewl dan provokasyonê bikin û civaka me li ber hev rake. Kesayetên xwe weke berpirsên Êzidiyan dibînin, lê bi ser PDK’ê ve ne, êrişa li ser sivîlan berevajî dikin û hewl didin rê li ber êrişên nû vekin.”
‘RÊVEBERIYA XWESER Û GEL, PROVOKASYON TÊK BIRIN’
Meclîsê destnîşan kir ku heta niha bi hewldanên Rêveberiya Xweser û gelê Şengalê provokasyon bi ser neketine û got, “Lê divê gelê me hişyar be û zanibe ku sedema van êrişan di serî de PDK, ew kesên hevkariya bi wan re dike ne. Em bang li gelê xwe, serokeşîr, rûspî, rewşenbîn, ciwan û her beşên civakê dikin ku êdî rê nedin van lîstikên li ser civakê.”
‘HEVKARÊN PDK’Ê BERPIRSYARÊN SEREKE YÊN RIJANDINA XWÎNA ZAROKÊN ME NE’
Di dawiya daxuyaniyê de biryardariya li ser berxwedanê hate bibîrxistin û hate gotin, “Em ji tevahiya cîhanê re diyar dikin ku berxwedan û têkoşîna me wê heta Şengaleke xweser û azad, heta serketinê dewam bike. Îradeya me ji hemû êrişên dijmin bi hêztir e.”
Meclîsê diyar kir ku kesên hevkariyê bi dijmin re jî dikin wê teqez hesabê bide gel û malbatên şehîdan û got, “Kesên ku bi MÎT û PDK’ê re hevkariyê dikin, berpirsyarê yekemîn ji rijandina xwîna zarokên Êzidiyan e. Divê gelê me van kesan di nava xwe de nehêlin.”
