BEHDÎNAN – Endamê Komîteya Rêveber a PKK’ê Dûran Kalkan li ser pêvajoya heyî ji malpera înternetê ya PKK’ê re bi sernavê https://www.pkk-online.com/tr/index.php/boeluemler/degerlendirmeler/635-2022-devri-m-yilidir-devri-mci-halk-savasi-yilidir gotarek nivîsî.
Dûran Kalkan diyar kir ku rejîma qirkirina çandî li ser bingeha konsepta şerê taybet ê topyekûn ji bo tasfiye û îmhakirina Tevgera Azadiyê di asta herî bilind de êriş dike û destnîşan kir, ku li gel van êrişên topyekûn ên tunekirinê jî şoreş dewam dike, têk naçe.
Dûran Kalkan anî ziman ku weke tevger divê helwest û sekna wan a li dijî vê yekê, berxwedana topyekûn a li ser bingeha Stratejiya Şerê Gel ê Şoreşgerî be û got, “Ev yek jî ji bo mirovên fêhm dikin tê wateya ‘bi her awayî dikarî têbikoşe’. Ji ber vê yekê di sala 2022’an de em di pêvajoyeke xurt a şer û têkoşînê de ne.
Em ji nişka ve derbasî nava pêvajoyeke bi vî rengî nebûne. Divê pêvajo ji rêzê û weke dewama ya berê neyê fêhmkirin. Ji aliyê nûbûnê û guherînê ve divê lawazî neyê kirin. Dem ew dem e ku bi rengekî kûr û rast bê fêhmkirin, bi îrade û xwedî însiyatîf bin.”
Dûran Kalkan diyar kir ku eniya dijber dixwaze li ser bingeha konsepta şerê taybet ê topyekûn êrişên xwe dewam bike û got, ji ber vê yekê jî êrişa li ser bingeha konsepta şerê taybet ê topyekûn bi şêweyê êrişeke tasfiyekirin û tunekirinê li her cihê ku firsendê dibînin, dewam dike.
Gotara Dûran Kalkan wiha dewam kir: “Ya rast, dixwazin pêşî li pêşketinekê bigirin ku li çar parçeyên Kurdistanê bi pêkanîna şoreşa azadiyê re pêşengî ji Şoreşa Rojhilata Navîn a Demokratîk re tê kirin. Di binê vê êrişê de ev rastî heye û li pişt wê jî paşverûtiya global û herêmî heye.”
Dûran Kalkan destnîşan kir ku bi rêya konsepta êrişê ya ji bo tasfiyekirina PKK’ê gelek derdor hewl dide desthilatdariya xwe dirêj bike, temenê xwe dirêj bike, bi hev re tifaqê çêbikin û got, “Tayyîp Erdogan-AKP’ê mayina xwe ya li ser desthilatdariyê spartiye vê yekê. Tenê bi vî rengî dikarin nakokî û şerê navxweyî bidin aliyekî û tifaqê bi hev re bikin, di heman demê de piştgiriyê ji hêzên navneteweyî werbigirin. Armanca wan ev e. Di navenda vê yekê de jî tifaqa AKP-MHP-PDK heye. Mîna ku me beriya niha gelek caran anîn ziman, polîtîkayên faşîzma AKP-MHP û PDK’ê hevpar in. Van herdu hêzan mayina xwe ya li ser desthilatdariyê li şerê dijî PKK’ê spartine. PDK hewl dide bi şerê dijî PKK’ê re temenê xwe dirêj bike û partiyên din neçarî xwe bike. AKP jî bi tepisandina muxalefeta navxweyî bi gotina ‘li dijî cihêkariyê şer destpê kiriye’ hewl dide piştgiriyê werbigire.”
Endamê Komîteya Rêveber a PKK’ê Dûran Kalkan destnîşan kir ku ji bo van êrişan her wiha hêza taşeron tê bikaranîn û got, “Hin rêxistin û hêz bi rengekî veşartî-eşkere bi rêxistin kirine, têkilî bi wan re danîne û wan bi kar tînin. Êrişên ji herdu aliyan ve tên, êrişên hevpar in. Di vê astê de êriş li hemberî me têne kirin.”
Dûran Kalkan wiha dewam kir, “Ji bo AKP û Tayyîp Erdogan mayina li ser desthilatdariyê û hebûn bûne yek. Bûye meseleyeke man û nemanê. Roja ku ji desthilatdariyê ket wê ji vê cîhanê jî koç bike. Baş bi vê zane û bi her kesî re şer dike. Ji ber vê yekê gelek derdor dinirxîne û dibêje, ‘AKP wê heta dawiyê şer bike. Di hilbijartinê de têk biçe jî wê zû bi zû dest ji desthilatdariyê bernede û hêzên xwe yên paramîlîter ên veşartî afirandiye, ji şer re amade dike’. Faşîzma AKP-MHP’ê il ser xeteke bi vî rengî rûniştiye.”
Di vê çarçoveyê de Kalkan bal kişand ser girîngiya têkoşîna di sala 2022’an de tê meşandin:
“Lewma sala 2022’an di Stratejiya Şerê Gel ê Şoreşgerî de saleke şer e, saleke berxwedana topyekûn e. Ev têkoşîn jî bi esasî li dijî faşîzma AKP-MHP’ê, li dijî siyaset û mejiyê qirker mêtinger tê meşandin. Divê têkoşîneke bi vî rengî ya hevgirtî bê meşandin.
Nêzîkatiya ‘êrişî me dikin, li dijî vê jî em xwe biparêzin’ têrê nake. Ji bo pêkanîna şoreşê, şert e ku têkoşîneke çalak bê meşandin. Têkoşîna çalak jî bi têkoşîneke şoreşgerî ya aktîf dibe.
Ji ber vê yekê sala 2022’an sala şoreşê ye, sala Şerê Gel ê Şoreşgerî ye. Ev têkoşîn jî divê li ser bingeha serketinê bê meşandin.”
Dûran Kalkan di dawiya gotara xwe de bi bîr xist ku li herêmê şer dewam dike, wê dewam bike jî û got, “Di navbera sîstema global û statukoperestiya netewe-dewletê şer û neçareserî wê dewam bike. Rewşeke bi vî rengî ji bo pêngavên şoreşgerî jî firsedan pêşkêş dike. Di vê rewşê de rewşa li Kurdistanê girîng e. Kurdistan ji aliyê fikrî û pratîkî ve pêşeng e. Lewma Şoreşa Kurdistanê xwedî mîsyon, rol û berpirsyariya dîrokî ye. Eşkere ye ku di nava van şert û mercan de hem wê Şoreşa Azadiyê ya Kurdistanê bi ser bixîne hem jî pêşî li konfederalîzma demokratîk a Rojhilata Navîn veke.”
