NAVENDA NÛÇEYAN – Ozgur Şerker Endamê Koordînasyona Komalên Ciwan têkilî 15’ê Sibatê Komploya Navneteweyî, sedemên wê, berxwedana Rêberê Gelan Abdullah Ocalan û gelê Kurd a li dijî komploya navneteweyî û rola ciwanan axivî.
Şerker got, “Komploya 15’ê Sibatê ya li dijî Rêber Apo, di şexsê Rêber Apo de li dijî tevahiya gelê Kurdistanê dikeve sala 24’an. Ser komployê re 23 sal derbas bûn. Hêzên hegemomîk, komploger yên ku di nav vê komployê de cih girtin bi taybetî jî bi pêşengiya Emerîk,a Israîl, Ingilistanê, van hêzan bi tundî şermezar dikin. Her wiha li dijî komployê ji roja pêşî ve heta niha li zemîna Kurdistanê ji heft salî bigirin heta heftê salî gelê Kurdistanê li ber xwe da. Girêdayî vê yekê civaka me, 15’ê Sibatê weke roj reş ragihand û li ber xwe da. Her wiha milîtanên tevgera azadiya Kurdistanê bi rihekî fedayî bi ser dijmin de çû û di dil û mêjiyê dijmin de xwe teqandin. Jin weke vîneke azad hebûn û azadiya xwe dîtin, xwe pê re kirin yek û têkoşîna xwe di asta herî jor de kirin. Ciwanên Kurdistanê li dijî komploya navnetewî ya 15’ê Sibatê, ji roja destpêkê ve, ji 99’an heta niha xwe kirin xelek ji agir û kîn û hêrs û nefreta xwe bi ser dijmin de barandin. Bi vî rengî helwesta li dijî komploya navnetewî ya 15’ê Sibatê ya li dijî Rêber Apo, hemû sal û kêliyên xwe bi berxwedaniyê derbas kir, bi têkoşînê bihurand. Di encamê de jî hemû parçeyên Kurdistanê qêriyan û qêrîna xwe di berxwedaniyê de kilît kir, berdêlên giranbiha jî hatin dayin. Şehîdên mezin di vê pêvajoyê de çêbûn. Hemû jî bi dirûşma, ‘hûn nikarin Roja me tarî bikin’ bûne sembolên vê pêvajoyê û rêya me ronî kirin.”
Li ser sedema komploya navneteweyî ya 15’ê Sibatê ya li ser Rêberê Gelê Kurd Abdullah Ocalan Ozgur Şerker diyar kir ev hêzên komploger bûn ku 100 salan di bin konsepta dagirkirinê de Kurd dane jiyîn, ji ber encama vê siyaseta hegemonîk û komploger gelê Kurd koletî jiya, her wiha ji ber vê sedemê pirsgirêka gelê Kurd ya ku tê behskirin çêbûye û gelê Kurd di bin pençên qirkirinê de mecbûr maye ku bijî û tim di nav êşeke mezin de maye.
Şerker got, “Derketina Serokatî ya li dijî vê siyasetê, hişmendiyê, polîtîka û konseptê herikandina dîrokê guherand. Tiştên ku bi salan hatibû rûniştandin, tiştên ku bi hinek polîtikayan, li ser esasê hinek berjewendiyan, plansaziya wê hatibû kirin û di rêya xwe de dimeşiya, bi derketina Serokatî re derbeke mezin xwarin. Serokatî ev siyaseta hêzên hegemonîk parçe parçe kir. Serokatî kir ku gelê Kurd ji nû ve veje, kir ku van pranga û zincîrên koletiyê ji ser xwe bavêje. Her wiha aliyê civakî, çandî, leşkerî, îdeolojîk, civak hi her alî ve vejiya. Şoreşa vejînê li Kurdistanê çêbû. Ev polîtîka bi temamî têk çû, pûç bû. Her wiha ev siyaseta ku bi salan dihate meşandin, kesî jî nikarîbû li pêşiya wê bibe asteng, bi Serokatî re ev jî ji holê rabû.”
Şerker di axaftina xwe de bi berdewamî diyar kir Rêberê Gelê Kurd Abdullah Ocalan ne tenê ji bo gelê Kurd ji bo tevahiya gelên bindest xeteke azadiyê çêkiriye, kûr kir, têkoşîna azadiyê azadiyê geş kir û got, “Ji ber vê jî ev hêzên komploger, derketin, hebûna Rêber Apo ji bo xwe weke talokeyeke herî mezin dîtin, ji ber vê jî serokatî, bi komployeke wiha re,ya ku jê komploya sedsalê tê gotin, di dîrokê de kesek bi komployeke wiha re hevrû nebûye, nehatiya serê ti civakê û pêşengê civakê, rû bi rû ma.”
Şerker bal kişande ser berxwedana Rêberê Gelê Kurd Abdullah Ocalan a li Imraliyê, diyar kir, vê berxwedanê hêzên komploger şaş kiriye û got, “Îmralî, ne tenê ji bo gelê Kurd ji bo tevahiya cîhanê bûye qibleya azadiyê. Li devereke weke Îmraliyê, ku bi rengê ‘tabût’ê tê pênasekirin, bû dibistana îdeolojiya azadiyê. Ew der bû çavkaniya nêrînên azad. Ji bo jinan, ciwanan û tevahiya gelê Kurdistanê bû çavkaniya ronahiyê. Çavkaniya hêzê.”
Şerker bal kişande ser rola ciwanên Kurdistanê, diyar kir Rêberê Gelê Kurd Abdullah Ocalan rol û misyona pêşengiyê ji bo ciwanan daniye, ev girîngî daye ciwanan, got ciwan jî bi vê rolê rabûne, tevlî nav têkoşîna azadiya Kurdistanê bûne. Şerker got divê Tevgera Ciwanên Kurdistanê xeta Rêberê Gelê Kurd Abdullah Ocalan bişopînin, pê re bijîn.
Endamê Koordînasyona Komalên Ozgur Şerker got, “Li çar parçeyên Kurdistanê divê ev xet serwer bibe, rêxistiniya vê xetê were kirin. Ciwanên bakurê Kurdistanê heta rojhilatê Kurdistanê û rojavayê Kurdistanê, hetanî Şengalê, derveyî, qibleyeke me hebe, ev qible Rêber Apo ye. Pîvaneke me hebe ew pîvan Rêber Apo ye.”
Şerker herî dawî got divê herî zêde ciwan bersiva berxwedaniya Rêberê Gelê Kurd Abdullah Ocalan bidin, bibin layiqî vê berxwedanê, sala 2022’an jî bibe derketineke nû, her parçeyê Kurdistanê, her ciwanê Kurd bi vê rol û misyonê rabe ser xwe û vê sale bike sala serketinê.
ÇAVKANÎ: ANF
