NAVENDA NÛÇEYAN
Aysel Avesta nivîsand –
Ji bo jinan di vê demê de xweparastin bi qasî nan û avê girîng û jiyanî ye. Li hemberî her cûre êrişan xweparastin yekane rêya têkoşînê ya li dijî tinekirina jiyanê ye. Rêber Apo xweparastin weke teoriya gulê bi nav dike. Ji ber ku gul dirrikên wê hene û ew dirrik xweşikbûn û hebûna wê gulê diparêze. Ne tenê Gul di xwezaya her zindî de xweparastin heye. Eger xweparastin tine be hebûn û îradeya azadiyê jî dernakeve holê. Zêhnîyeta desthilatdar destpêkê zanebûn û maf ji destê jinan û piştre jî ji destê civakê derxist. Ev jî dibe sedema yekemîn ya kolekirina jinê û civakê. Jin û civak bi hemû hebûna xwe ya îrade û fikra xwe ve dikeve bin destê desthilatdariyê. Herwiha maf û keda wê tê xwarin û tê binpêkirin.Qanûn û hêzên dewletên serdest tenê berjewendîyên dewletê û kujeran diparêzin. Feraseteke ku giştî civakê û jinê bi parêze nîne. Xwedî zêhnîyetek desthilatdar û cinsîyetperest e. Çavkanîya hemû pirskirêkên civakî jinê nîşan dide û diwxaze vê yekê weke îdolojîyekê bi civakê bide qebûlkirin. Ji ber wê ye ku her roj di medya û raya giştî de behsa xwekujî ya jinan, destdirêji ya ser jina tê kirin. Li cîhanê her roj bi sedan jin, di bin navê evîn, namûs û exlaq de tên qetilkirin. Zêhnîyeta desthilatdar wan kiryarên xwe yên gemar û bê exlaqiya xwe hem meşrû dike, hem jî dixwaze bike malê jinê. Lê êdî jin ji van kiryarên wan natirsin. Jiyana koletî û bêrûmetî ji bo xwe qebûl nake. Bi rêxstinbûn û pêşketina jinê re êdî rewş gelek hat guhartin. Ew jina ku weke kole di malê de hatibû hepskirin zincîrê koletiyê şikandin. Jinên ku tahma azadiyê kirine her roj dadikevin kuçe û kolanan û dibêjin; “Em serî li hemberî zilm û êrişên we natewînin”.Îro li çar aliyên Kurdistanê jin bi fikir û felsefeya bîrdoziya azadiyê xwe perwerde û birêxistin dikin. Tevî ewqas êrişên dijwar jî jin teslîm nabin û berxwedana xwe her roj bilindtir dike û pêşengtîya civakê dike. Jina ku berê di nava çar dîwaran de hatibû fetisandin îro li her qada jiyanê çalak tevdigere. Me di Şoreşa Rojavayê Kurdistanê de jî dît ku çawa jin dikare xwe û hemû nirxên mirovahiye bi xwe re biparêze. Em tev bûn şahid bê hemû dunya çawa li hember berxwedanî û qehremantîya jina Kurd matmayî ma. Pergala mêrê serwer ji bo tola xwe ji van jinên têkoşer hilîne bi hovane êriş dike. Bi rêya qanûnan tecawizkar û qatilên jin û zarokan berdidin. Sazî û dezgehên jinan digirin. Jinên ku serî li ber wan natewînin davêjin zîndanan. Lê belê wekî pir caran di dîroka jinên Kurd de tê zanîn, jina Kurd ji bo ku teslîmî dujmin nebe, weke teyran xwe ji zinaran avêtine, fîşek û bombeya dawiyê bi xwe de teqandinin da ku nekevin destê dijmin de. Bi vê têgihiştinê divê jin xwe di her milî de perwerde bike û rêxistina xwe xurt bike. Çiqas jin rexistinkirîbe ewçend dikare xwe biparêze. Asta zanebûna wê ciqas pêş bikeve, ewqasî parastina civakê pêş dikeve, hêza xweparastinê ya civakeke exlaqî û polîtik wê ava bibe. Jin êdî xwedî dîrokeke tijî ezmûnên têkoşînê ye. Xwedî, partî, artêş û eniyeke mezin e. Bi vê hêza xwe dikare di aliyê bîrdozî, rêxistinî, leşkerî û civakî de xwe û derdora xwe biparêze.
YENİ ÖZGÜR POLİTİKA
