NAVENDA NÛÇEYAN– Di heyameke êrîşên faşîzan li Kurdistanê û cîhanê zêde dibe de rêxîstinên cîwanan ên li Ewropayê TCŞ û TEKO-JIN, ragihandin ku ew dest bi pêngaveke çalakiyê ya nû kirine.
Di daxuyaniya ku pêngava “Bi Hev re Serhildan”ê hatiye ragihandin de bang li ciwanên Kurdistanê û antîfaşîst hate kirin. Di daxuyaniyê de wiha hat gotin; “Ji bo cîhaneke azad têkoşîna hevpar çiqas girîng e em dixwazin dîsa bînin ziman. Em bang li ciwanan û jinên ciwan dikin; Bi giyanê şoreşên Madrîd, Nîkaragua û Rojavayê dest bi raperînan bikin, têkoşînê mezin bikin û bi hev re cîhaneke azad biafirînin. Werin! Em bi tenê xeyalkirinê ve xwe sînordar nekin, xeyalên xwe pêk bînin û biparêzin!”.
Daxuyaniya rêxistinên ciwanan bi giştî wiha ye;
TCŞ & TEKO-Jin: Dem dema Serhildanê ye – Bi hev re serhildan!
Em îro Salvegera Şoreşa Rojava yên pakrewanên ku di oxira vê riyê de ji bo jiyanek bi rûmet bi qehremanî têkoşîn meşandine û li hemû hevalan pîroz dikin. Li beramberî tunekirina nasnameya gelê Kurd û nirxên mirovahiyê bi hezaran hevalan û gelê me yê bi rûmet canê xwe feda kirine. Herî dawî bi taybetî jî hevalên ku di Berxwedana Başûrê Kurdistanê û Rojavayê de şehîd ketine em bi rêzdarî bi bîr tînin.
Rejîma Tirk a faşîst û qirker siyaseta qirkirin, asîmîlekirinê û mêtingeriya li ser Kurdistanê bi awayekî hovane didomîne. Tîfaqa faşîst a AKP-MHP, bi mêtingeriya tevahiya Kurdistanê dixwaze qeyrana heyî kûrtir bikin u emrê desthilatdariya xwe dirêj bikin. Dewleta tirk bi êrîşên dijmirovî yên li ser civak, nirx û deskeftiyên Kurdistanê dixwaze nasname û çanda gelê Kurd tune bike. Ji ber ku utopyaya jiyanek azad û jiyanek alternatîf her ku diçe dibe rastî û ev jî mîna stiriyek di nava çavên hêzên emperyalîst û kapitalîst de ye.
Rejîma Erdogan a faşîst tu rêgezek hiqûqî ya gerdûnî û sincî nas nake. Destdirêjî, êşkence, kuştin, talankirina şehîdgehan ji bo gelê me rewa tê dîtin. Li gor xeyalên wan ên “Osmaniya nû”, ne tenê bi navê Kurd, hizirek jî bi navê Kurdayetiyê li mezopotamya û cihanê nemîne. Dema Ewropa rola sê meymûna dilîst de, zarok rastî destdirêjiyê tên, jin bi awayekî sistematîk tên qetilkirin û bi hezaran siyasetvan û aktîvîstên Çepgir dixin zindanan. Bêdengiya yekîtiya ewropayê pir zelal nîşan dide ku nirxên etîk û exlaqî li hemberî berjewendiyên fêde û sermayeyê tên firotin. Êşkence û tecrîda sîstematîk a li ser girtîgeha Îmraliyê, nîşan dide ku hevpariya dewletên faşîst jinûvekirina di qomploya navneteweyî de berdewam dike. Paradigmaya Rêber Apo ku li Rojava nefes digire û distîne ji bo Modernîteya Kapitalîst xeteriyek mezin e. Ji ber ku li çar aliyê cîhanê mirovahî, pergala Konfederalîzma Demokratîk weke hêviya jiyaneke alternatîf dibînin. Di cihanek ku xweza tê talankirin, tundî ji bo desthilatdariyê tê bikaranîn, nexweşî derdikevin, meqesa di navbera dewlemend û feqîr mezin dibe de berxwedan erkê herkesî ye.
Em rojane dibînin ku faşîzm çawa zêde dibe û qeyrana ku pergala kapîtalîzm dijî çawa kûrtir dibe. Talankirin, faşîzm û zayendparêzî lingên esas ên kapîtalîzmê ne. Faşîzm mîna Leviathanek mezin dibe û nayê qontrolkirin. Faşîzm mîna kûçikeke li ber deriyê mala dewletê ye û her ku teng dibe êrîş dike. Yekîtiya Ewropayê ji ber berjewendiyên xwe yên siyasî û aboriyê, rêgezên xwe binpê dikin, ji bo xapandinê jî tenê hişyariyên biçûk ji Erdogan re dikin. Dewletan bi hemû hêzên xwe ve dixwazin jiyana alternatîf tune bikin. Yên ku dixwazin jiyanek alternativ bijîn an tên kuştin an jî tên girtin. Bûyerên li Amerîka, Tirkiyê û li Elmanya ku heri dawî hatine jiyîn, ji me re nişan dide ku sînora faşîzmê nîne. Em di nava qeyraneke cihanî de ne û rûyên faşîzmê yên cuda hene lê belê her yekî jî bi tenê rûpoşek in. Georg Floyd, Bariş Çakan, êrîşên li bajarê Elmanya Hanauyê ne buyerên yekemîn e û ne jî ya dawî ne.
Asîmîlasyon û şer, rûyê rast ê faşizmê ye. Nexweşiya desthilatdariya ku netewdewlet pê ketine, di militarîzm û tundiya polîsan de xuya dibe. Berxwedan û serhildanên ku li bajarên Kurdistan, Emerîka û Elmanyayê tên jiyîn ji me re rihê ciwanan ê çalak û sekna wan ên zindî nîşan didin. Ciwan û bi taybet Jinên Ciwan wê welatê xwe ji kapîtalîstan, faşîstan û mêtingeran re nehêlin. Girîng e ku em hêza xwe bibînin û bi hev re li hemberî şerê ku li ser axa me tê meşandin, têkoşîn bimeşînin. Ciwan, hêza berxwedanê ye; pêwîst e ku em bi hev re serî hildin û li dijî faşîzm, kapîtalîzm û baviksalariyê têbikoşin. Miroveke ku cesareta wî ya xeyalkirinê tunebe, hêza wî/ê ya şerkirinê jî tuneye.
Ji bo cîhaneke azad têkoşîna hevpar çiqas girîng e em dixwazin dîsa bînin ziman. Em bang li ciwanan û jinên ciwan dikin; Bi giyanê şoreşên Madrîd, Nîkaragua û Rojavayê dest bi raperînan bikin, têkoşînê mezin bikin û bi hev re cîhaneke azad biafirînin. Werin! Em bi tenê xeyalkirinê ve xwe sînordar nekin, xeyalên xwe pêk bînin û biparêzin!
Bi vê wesîleyê, dubare dikin ku em pêngava “Bi Hev re Serhildan”ê ku pê mêtingeriyê û kapîtalîzmê em ê hilweşînin, didin destpêkirin. Bi tenê têkoşîneke hevpar û “Bi Hev re” ve em dikarin zayendparêzî, desthilatdarî, faşîzm û mêtingeriyê tune bikin û cîhaneke nû biafirînin. Em bang li herkesî dikin ku tev li meşa me ya serhildanê ku me ji bo jiyan û cîhaneke azad daye destpêkirin, bibin. Roj roja bi pêngava “Bi Hev re Serhildan”ê ve hilweşandina faşîzmê û afirandina jiyaneke azad e. Bi pêngava “Bi Hev re Serhildan”ê ve tecrîdê bişkînin, faşîzmê hilweşînin û Kurdistanê azad bikin.
Bijî Şoresa Rojava!
Bijî salvegera Şoresa Madrid u Niccaragua!
Bijî Serok APO!
Bijî berxwedana Heftanîn!
Bi hev re Serhildan!
