BEHDÎNAN – Hevserokatiya Konseya Rêveber a KCK’ê derbarê şewata li Îmraliyê daxuyaniyeke nivîskî weşand.
Di daxuyaniya KCK’ê de ev tişt hate diyarkirin:
“Wezîrê Karê Navxweyî yê faşîst ê tifaqa AKP û MHP’ê diyar kir ku agir bi Îmraliyê ketiye. Ev daxuyanî di nav axaftinekê de hatiye gotin û armanceke wê heye. Vê zivistanê agir bi Îmraliyê ketibe nexwe ev tişt nîşan dide ku li ser Rêberê Gelê Kurd û hevalên wî komployek heye. Di vê pêvajoyê de şerê li Îdlîbê geş dibe û bi daxuyaniya wisa re gel û saziyên Kurd ketine nav tevgerê. Gelê Kurd û rêxistinên wê diyar kirine heta ku ji Rêber Apo agahî were stendin wê li qadan bin. Gelê Kurd jî li her derê daketiye qadan û helwesta xwe zelal kiriye. Gelê Kurd û dostên wan li benda agahiya başbûna tendirustî û ewlehiya Rêber Apo ye.
DIVÊ TEQEZ PARÊZER BI RÊBER APO RE HEVDÎTINÊ BIKIN
Lê dewleta Tirk li ser banga gelê Kurd tu gav neavêtiye. Rêbertiya me bi parêzerên xwe re hevdîtin nekiriye. Dijminatiya dewleta Tirk a li dijî gelê Kurd herî zelal li Îmraliyê derdikeve holê. Rêber Apo li Îmraliyê di bin tecrîdeke giran de ye û bi ser de jî bi nûçeya agir bi Îmraliyê ketiye, êrîşî hest û îradeya gelê Kurd tê kirin. Şerê taybet bi taybetî hevdîtina Rêber Apo ya bi parêzerên wî re pêk nayne. Divê gelê Kurd û hêzên demokrasiyê li her derê serhildanên xwe xurt bike û hevdîtina bi Rêber Apo pêk bînin. Heta ku derbarê tendirustî û ewlehiya Rêber Apo agahiyên pêbawer werin stendin, divê berxwedan bidome.
Vê daxuyaniya şewatê di zivistanê de û di dema şerê Îdlîbê de hatiye kirin. Her agahiya derbarê Rêber Apo ya bi guman wê di asta herî cîddî de were nirxandin. Ji ber ku tendirustî û ewlehiya Rêber Apo ji bo gelê Kurd û Tevgera me ya Azadiyê meseleyeke hebûn û nebûnê ye. Waliyê Bûrsayê daxuyanî daye ku şewat hatiye tefandin lê ev jî dibe sedem ku bi hestên gelê me re were lîstin. Ji bo gelê Kurd tu wateya van daxuyaniyan tune. Ev daxuyanî hêrsa gelê me zêdetir dike. Li Îmraliyê heke rewşeke neyînî pêk were, berpirsê vî tiştî Tayyip Erdogan û AKP ye. Di warê tendirustî û ewlehiya Rêber Apo de jî dewleta Tirk û saziyaên navneteweyî berpirsyar in. Di warê dîlgirtina Rêber Apo de berpirsên yekemîn DYE û NATO ye. Ji ber vê jî divê ev hemû hêz derbarê tendirustî û ewlehiya Rêber Apo gavên pêbawer biavêjin.
Parêzer û malbata Rêber Apo piştî daxuyaniya şewatê ji bo hevdîtinê serlêdan kirin lê ev serlêdan nehatine bersivandin. Rêber Apo pêşengê gelê Kurd e û gelên Rojhilata Navîn di serî de rêberê têkoşîna azadî û demokrasiya hemû gelên cîhanê û hêzên demokrasiyê ye jî.
Gelê me û dostên me piştî daxuyaniya dûrî cîddîyetê ya Suleyman Soylû bihîstiye, bi ruhê berxwedana ‘Hûn nikarin roja me tarî bikin’ daketine qadan û xwedî li Rêber Apo derketine. Heta ku di warê tendirustî û ewlehiya Rêber Apo agahiyên pêbawer werin stendin divê ev berxwedan bidome. Wê sala 2020’an divê bibe sala şikandina tecrîdê, têkbirina faşîzmê , demokratîkbûna Tirkiye û Rojhilata Navîn û sala ku Rêber Apo û gelê Kurd azadiya xwe bi dest xistine.”
