QSD’ê bi daxuyaniyekê bîlançoya mehekê ya Pêngava Bagera Cizîrê ya ‘Şerê Tinekirina Terorê’ eşkere kir û diyar kir ku di mehekê de 615 çete hatine kuştin, 6 çete jî bi saxî hatine desteserkirin, dîsa li gel çek û cebilxaneyeyan.
NAVENDA NÛÇEYAN-Navenda Ragihandin û Çapemeniyê ya QSD’ê bi daxuyaniyekê ragihand ku di mehekê de 651 çete hatine kuştin, 6 çete bi saxî hatine girtin, dîsa rêjeyek zêde çek û cibilxane hatine desteserkirin û her wiha bi dehan mayîn hatine bêbandorkirin. QSD’ê diyar kir şervanê QSD’ê tevlî 58 çalakiyan bûne, di şer û çalakiyên mehekê de 37 şervan şehîd bûne û li gel rizgarkirina bi sedan sivîlî 2 jinên Êzidî jî bi saxî rizgar kirine.
QSD’ê di daxuyaniya xwe de ev agahî parve kirin:
“Di çarçoveya “Şerê Tunekirina Terorê” yê qonaxa dawî ya pêngava Bagera Cizîrê de ji bo tunekirina DAÎŞ’ê li rojhilatê çemê Firatê, Hêzên Sûriya Demokratîk (QSD) bi alîkariya Hêzên Koalîsyona Navneteweyî ji 10’ê Îlona borî ve berxwedaneke dijwar li dijî terorîstan dide meşandin da ku deverên di bin dagirkeriya çeteyên DAÎŞ’ê de yên weke Hecîn, Sûsê, El-Şehfê û derdora wan ên gundewarên Dêra Zorê rizgar bike.
Hêzên me ji 11’ê Îlona borî ve heta niha serkeftinên mezin bi dest xwe ve anîn û devereke berfireh ji terorîstên DAÎŞ’ê rizgar kirin. Her wiha gelek baregehên çeteyan rûxandin û miqdareke mezin ji çek û cebilxaneya çeteyan desteser kir. Her wiha gelek êrîşên xwekuj ku terorîstan xwestin li dijî şervanan pêk bînin, bê bandor kirin.
BILANÇOYA ŞER A MEHEKÊ
Hêzên me beşdarî 58 şerên rasterast bi terorîstên DAÎŞ’ê re bûn. Hêzên Koalîsyona Navneteweyî 215 êrîşên ezmanî û 17 êrîşên topavêjan pêk anîn. Hêzên me piştrast kir ku 651 terorîst hatine kuştin û cenazeyên 17 terorîstan ketine destên şervanan û bi rêk û pêk hatine binaxkirin. Her wiha bi dehan cenazeyên terorîstan li nava baxçeyên deverê li ser erdê mane û hêzên me nikaribûn van cenazeyan ji ber mayinên ku terorîstan çandine, hildin. 6 terorîst dîl ketine destê şervanan. Hêzên me 370 nuqteyên nû bi dest xwe ve anîn û karibûn 40 km erd û gundên El-Baxoz, El-Şeclê û Mûzan rizgar bikin.
ÇEK Û CEBILXANEYÊN HATINE DESTESERKIRIN
Doçkayeke 12.5 mm
14 sandoqên guleyên doçkaya 12.5 mm
14 çekên kalaşnîkov
5 çekên BKC
5 B7 û 15 guleyên wê
7 hewanên 120 mm û 268 topên wê
2 çenteyên guleyan
Doçkayeke 23.5 mm
16 sandoqên guleyên doçkaya 23.5 mm
Çekeke M16
Zincîreke guleyên kalaşnîkovê
Firokeyeke keşfê
26 hezar guleyên doçkaya 12.5 mm
25 hezar guleyên BKC’yê
200 topên hewana 120 mm
112 heşweyên hewanan
5 hezar guleyên kalaşnîkovan
2 sebetanên doçkaya 23.5 mm
21 sebetanên doçkaya 14.5 mm
Sebetaneke doçkaya 12.5 mm
Çekeke 24
Hêzên me her wiha hejmareke mezin ji çek û wesayîtên DAÎŞ’ê rûxandin û gelek embarên cebilxaneyê û baregehên kombûna çeteyan rûxandin. Ew jî ev in:
6 topavêjên hewanê
12 wesayîtên leşkerî
11 depoyên çek û cebilxaneyê
9 navendên fermandariyê yên terorîstên DAIŞ`ê
22 wesayîtên bombebarkirî
6 motorsîklêtên bombebarkirî
Qaîdeyeke avêtina moşekên herarî
Kargeheke çêkirina erebeyên bombebarkirî
Navendeke peywendiyan
Du firokeyên keşfê
Du treks
7 tunel
34 ÊRÎŞÊN ÎNTIXARÎ
Di nava çalakiyên şer de, terorîstên DAÎŞ’ê xwestin pêşvehatina şervanan, bi wesayîtên bombekirî û kesên xwekuj asteng bikin û gelek caran jî deverên ku jê vedikişiyan mayîn dikirin. Terorîstan 37 êrîş li dijî baregehên şervanan pêk anîn. 22 êrîş ji wan bi wesayîtên bombebarkirî û 6 bi motorsîklêtên bombebarkirî û 7 êrîşên xwekuj bûn. Hêzên me 246 mayinên ku çeteyan çandine bê bandor bikin.
2 JINÊN ÊZIDÎ HATIN RIZGARKIRIN
Hêzên me bi sedan welatiyên sivîl ku piraniya wan jin û zarok bûn, ji destên çeteyan rizgar bikin û tavilê di kampan de hatin pêşwazîkirin û alîkariya wan hatiye kirin. Yekîneyên taybet ên girêdayî hêzên me karibûn 2 jinên Êzidî yên Şengalê ku di destê çeteyan de bûn, rizgar bikin. Her du jinên Êzidî ev in: “Zaroka bi navê Înas Reşo ya 12 salî ji bajarokê Xanesorê hatiye revandin û Melko Xidir Kûtê 40 salî ye ku ji gundê Koçer ê Şengalê hatiye revandin.”
37 ŞERVAN ŞEHÎD BÛNE
Di nava berxwedana mehekê ya şervanên QSD’ê de 37 şervan piştî berxwedaneke leheng û bêhempa derketin asta şehadetê. Her wiha hejmareke din jî birîndar bûn.”
