Hêzên Sûriya Demokratîk QSD’ê 5’emîn dewreya leşkerî ji 150 ciwanan ku beşdarî nava refên QSD’ê bûne bi merasîmekê bi dawî kir.
NAVENDA NÛÇEYAN – Akademiya Şehîd Egîd ya girêdayî QSD’ê 5’emîn dewreya bi navê şehîd Ehmed El-Ebdullah ku ji 150 ciwanî re hatibû vekirin û 30 rojî dewam kir bi merasîmekê bi dawî kir. Ciwanan di perwerdeya xwe de dersên fikrî û leşkerî dîtin.
Di merasîma bidawîkirina dewreyê de ku li navçeya El-Kisra hatiye lidar xistin, fermandar û şervanên QSD’ê, Endamên hêzên ewlehiya Hundirîn, şêx û rûspiyên herêmê û bi dehan endamên saziyên sivîl ên herêmê beşdar bûn.
Merasîma bidawîkirina dewreyê bi deqeyeke rêzgirtinê û tûreneke leşkerî ji aliyê şervanên nû ve hate destpê kirin. paşê endamên fermandariya QSD’ê Rodî Qamişlo axivî û bidawîkirina dewreyê li hemû şervanên nû pîroz kir û behsa rola sereke ya şervanan di rizgarkirina herêmê de kir. Rodî Qamişlo bang li şervanan kir ku li gorî pîvanên leşkerî tevbigerin û got ku ew bi xebatên şervanan serbilind in û soza şopandina riya şehîdan da.
Şervanê nû yê bi navê Zagros Rojava ji ajansa me ANHA’yê re axivî û wiha got: “Me di dewreya xwe de gelek waneyên fikrî û leşkerî birin em soz didin şehîdan ku em ê riya wan bişopînin û giştî axa welat ji terorê rizgar bikin. Em li hemberî hovîtiya terorê ji gelê xwe re bibin mertal”.
Şehîd Ehmed Ebdullah ku dewre navê wî radike di çarçoveya hemleya rizgarkirina gundewarê Dêrazorê ji destên çeteyên DAIŞ’ê de şehîd bû.
