NAVENDA NÛÇEYAN- Bi wesîleya Cejna Berxwedana Neteweyî ku ji bo salvegera 47’emîn a damezrandina PKK’ê tê pîrozkirin, li herêmên di bin kontrola gerîla de ne çalakiyeke bi coş hate lidarxistin.
Wêneyên şehîdan, posterên Rêber Apo û alên PKK, YJA Star û HPG’ê li qada pîrozbahiyê hatin daliqandin.
Gerîlayên ku ketin qada pîrozbahiyê, destpêkê silav dan hev, piştre li ser wate û girîngiya rojê axaftin hatin kirin.
Yek ji fermandarên gerîlayên jin bi bîr xist klu beriya niha bi 47 salan Rêber Apo li gel 22 hevrêyên xwe li hev civiya û Partiya Karkerên Kurdistan (PKK) damezrand.
Fermandara gerîla got, “PKK’ê di nava 47 salan de ji bo hebûna gelekî, ji bo mirovahiyê, ji bo heqîqeta civakî bê navber û bi rengekî pir alî têkoşiya û gihîşt vê astê.”
Piştre gerîlayan govend gerandin û di dema pîrozbahiyê de gerîlaya YJA Starê ya bi navê Arjîn got, “Bi berdêlên giran ev ast hatiye afirandin.” Gerîla Arjîng ot, “Em bi saya keda şehîdan û Rêber Apo gihîştin vê serdemê.”
Gerîlayekî din ê bi navê şoreş jî bal kişand ser berdêlên hatin dayin û got, “Baweriya me tam e ku em ê bigihêjin armancên xwe.”
Di pîrozbahiyê de gerîlayan stran gotin.
Gerîlayê HPG’ê Serhed Botan jî destnîşan kir ku Rêber Apo hem ji bo gelê Kurd hem jî ji bo gelên bindest mîrateyeke gelekî girîng afirand.
Gerîla Xabûr Efrîn jî salvegera damezrandina PKK’ê pîroz kir û hevrêyên xwe yên di vê berxwedanê de şehîd bûn bi bîr anî. Xabûr Efrîn got, “Îro roja jinûve vejînê ye, roja heqîqetê ye, roja vejînê ye.”
Gerîlaya YJA Starê Dîlan jî ragihand ku derfetên heyî bi saya têkoşîna bi zehmet a 47 salan hatin afirandin û got, “Me berdêlên gelekî giran dan, me şehîd dan, em bi şehîdên xwe serbilind in. Heta dilopa dawî ya xwîna xwe em ê li ser şopa wan bin.”
Gerîlayan hem hestên xwe yên têkildarî rojê anîn ziman, hem jî di pîrozbahiyê de govend gerandin. Dîmenên pîrozbahiyê li Gerîla TV hatin weşandin.
